ភ្នំពេញ៖ ឯកឧត្តម អ៊ាត សីលា រដ្ឋលេខាធិការក្រសួងបរិស្ថាន បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំអគ្គនាយកដ្ឋាន ក៏ដូចជាមន្ត្រីរាជក្រោមឱវាទ ដែលបានលះបង់កម្លាំងកាយចិត្ត ប្រាជ្ញា ស្មារតី ក្នុងការបំពេញកិច្ចការងារអប់រំផ្សព្វផ្សាយ បញ្ជ្រាបចំណេះដឹងបរិស្ថានដល់សាធារណជន ដោយទទួលបានលទ្ធផលគួរជាទីកត់សម្គាល់។

ឯកឧត្តម អ៊ាត សីលា កាលពីព្រឹកថ្ងៃទី១៣ ខែវិច្ឆិកា ឆ្នាំ២០២៥ បានអញ្ជើញជាអធិបតីបើកសិក្ខាសាលាបូកសរុបលទ្ធផលការងារសម្រេចបានប្រចាំឆ្នាំ២០២៥ និងលើកទិសដៅបន្តរបស់អគ្គនាយកដ្ឋានចំណេះដឹងនិងព័ត៌មានបរិស្ថាន ក្រោមប្រធានបទ«ការពង្រឹងអប់រំ ផ្សព្វផ្សាយ ដើម្បីជំរុញសកម្មភាពប្រតិបត្តិមេត្រីបរិស្ថាន» ។ឯកឧត្តមបានគូសបញ្ជាក់បន្ថែមថាការផលិតនិងផ្សព្វផ្សាយព័ត៌មានបរិស្ថានជាកិច្ចការដ៏សំខាន់មួយក្នុងការចែករំលែកព័ត៌មានស្តីពីបរិស្ថានទៅកាន់សាធារណជនដើម្បីជ្រាប និងលើកកម្ពស់ការយល់ដឹងបរិស្ថាន ការការពារអភិរក្សធនធានធម្មជាតិ ក៏ដូចជាការទប់ស្កាត់នូវព័ត៌មានមិនពិតក្នុងវិស័យបរិស្ថាន។
ជាមួយគ្នានេះ ឯកឧត្តមបានអំពាវនាវដល់បងប្អូនប្រជាពលរដ្ឋមើល ឬចែករំលែកព័ត៌មានទាំងឡាយណា ដែលមានប្រភពច្បាស់លាស់ផ្លូវការពីក្រសួង ស្ថាប័នពាក់ព័ន្ធ ដើម្បីចៀងវាងធ្វើការចែករំលែកនូវព័ត៌មានក្លែងក្លាយ ដែលអាចនាំមានបញ្ហាប្រឈមនឹងច្បាប់។

គួរបញ្ជាក់ឱ្យដឹងថា សិក្ខាសាលាបូកសរុបលទ្ធផលការងារសម្រេចបានប្រចាំឆ្នាំ២០២៥ និងលើកទិសដៅបន្តរបស់អគ្គនាយកដ្ឋានចំណេះដឹងនិងព័ត៌មានបរិស្ថាន ក្រោមប្រធានបទ«ការពង្រឹងអប់រំ ផ្សព្វផ្សាយ ដើម្បីជំរុញសកម្មភាពប្រតិបត្តិមេត្រីបរិស្ថាន» ដែលប្រព្រឹត្តទៅរយៈពេលពេញមួយថ្ងៃ ធ្វើឡើងក្នុងគោលបំបំណងសំខាន់ចំនួន២ រួមមាន៖ ១)បង្ហាញបទពិសោធន៍ការងារក្នុងឆ្នាំ២០២៥ បញ្ហាប្រឈមនិងដំណោះស្រាយរបស់អង្គភាពជំនាញ និងផែនការសកម្មភាពសម្រាប់អនុវត្តឆ្នាំ២០២៦ និង២)ពង្រឹងកិច្ចសហការភាពជាដៃគូក្នុងការពង្រីកការអប់រំ ផ្សព្វផ្សាយចំណេះដឹងព័ត៌មានបរិស្ថាន និងពង្រឹងការគ្រប់គ្រងព័ត៌មានភូមិសាស្ត្រ ដើម្បីជំរុញឥរិយាបថ ផ្នត់គំនិតមេត្រីភាពបរិស្ថានរបស់សាធារណជន និងគ្រប់គ្រងធនធានធម្មជាតិ។
សិក្ខាសាលាមានការអញ្ជើញចូលរួមពីឯកឧត្តម លោកជំទាវអនុរដ្ឋលេខាធិការ ឯកឧត្តមអគ្គនាយក លោក លោកស្រី អគ្គនាយរង ប្រធាននាយកដ្ឋាន តំណាងមន្ទីរបរិស្ថានរាជធានី-ខេត្ត អង្គការដៃគូ សារព័ត៌មានដៃគូ ព្រមទាំងមន្ត្រីរាជការចំណុះអគ្គនាយកដ្ឋានចំណេះដឹងនិងព័ត៌មានបរិស្ថាន ប្រមាណ២០០នាក់៕
ដោយ៖ង៉ាន់ ទិត្យ
រូបភាព៖ រិន រចនា