ក្រសួងរៀបចំដែនដី សហការជាមួយក្រសួងមហាផ្ទៃ ផ្សព្វផ្សាយគោលនយោបាយភូមិឃុំសង្កាត់មានសុវត្ថិភាព ធានាបាននូវការរស់នៅប្រកបដោយភាពសុខសាន្តជូនប្រជាពលរដ្ឋ
(ភ្នំពេញ)៖ ដើម្បីធានាបាននូវសន្តិសុខ សុវត្ថិភាព គ្មានអំពើហិង្សា គ្មានគ្រឿងញៀន គ្មានការលេងល្បែងស៊ីសងខុសច្បាប់ មានសណ្ដាប់ធ្នាប់របៀបរៀបរយ និងធានាបាននូវការរស់នៅប្រកបដោយភាពសុខសាន្តជូនដល់ប្រជាពលរដ្ឋក្នុងមូលដ្ឋាននីមួយៗ ក្រសួងរៀបចំដែនដី នគរូបនីយកម្ម និងសំណង់ បានសហការជាមួយក្រសួងមហាផ្ទៃ រៀបចំផ្សព្វផ្សាយគោលនយោបាយភូមិឃុំសង្កាត់មានសុវត្ថិភាព ។
ថ្លែងក្នុងពិធីផ្សព្វផ្សាយគោលនយោបាយភូមិ ឃុំ សង្កាត់មានសុវត្ថិភាព នាថ្ងៃទី១៧ ខែវិច្ឆិកា ឆ្នាំ២០២៥ នៅទីស្តីការក្រសួង ឯកឧត្តមឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានថ្លែងអំណរគុណដល់ក្រុមការងារក្រសួងមហាផ្ទៃ ដែលបានសហការរៀបចំពិធីនេះឡើង និងបានបញ្ជាក់ថា កិច្ចការភូមិឃុំសង្កាត់មានសុវត្ថិភាព គឺជាកិច្ចការស្នូល ឬជាមុខងារសាធារណៈកម្រិតមជ្ឈិម សម្រាប់ឱ្យគ្រប់បណ្ដាមូលដ្ឋានភូមិឃុំសង្កាត់ទាំងអស់នៅទូទាំងប្រទេស ឯកភាពគ្នាអនុវត្តកិច្ចការមួយជារួម ។
ឯកឧត្តមឧបនាយករដ្ឋមន្រ្តី សាយ សំអាល់ បានលើកឡើងថា កិច្ចការភូមិឃុំសង្កាត់មានសុវត្ថិភាព គឺជាកិច្ចការសំខាន់ដែលយើងទាំងអស់គ្នាត្រូវរៀនសូត្រខ្លួនឯងផង និងដកស្រង់បទពិសោធន៍ខ្លួនឯងផង ហើយសម្រាប់ក្រុមការងាររាជរដ្ឋាភិបាលចុះមូលដ្ឋាន ក៏ត្រូវជួយតម្រង់ទិសលើកិច្ចការនេះដល់អាជ្ញាធរ និងក្រុមការងារថ្នាក់មូលដ្ឋាននីមួយៗផងដែរ ។
ជាមួយគ្នានេះ ឯកឧត្តមឧបនាយករដ្ឋមន្ត្រី បានលើកឡើងនូវគោលគំនិតមួយចំនួន ដើម្បីពិចារណាបន្ថែមលើគោលនយោបាយភូមិឃុំសង្កាត់មានសុវត្ថិភាព ដោយផ្សារភ្ជាប់ទៅនឹងតំបន់ឆ្នេរ គឺ ទី១: សន្តិភាពនិងស្ថិរភាពនយោបាយ ជាមូលដ្ឋានគ្រឹះដ៏សំខាន់មិនអាចខ្វះបានក្នុងការអនុវត្តគោលនយោបាយភូមិឃុំសង្កាត់មានសុវត្ថិភាព ហើយកិច្ចការភូមិឃុំសង្កាត់មានសុវត្ថិភាព និងកិច្ចការវិមជ្ឈការ និងវិសហមជ្ឈការ គឺជាកិច្ចការសំខាន់ដើម្បីឈានសម្រេចបាននូវចក្ខុវិស័យរបស់រាជរដ្ឋាភិបាលនាឆ្នាំ២០៣០ និងឆ្នាំ២០៥០ ។ ទី២: ការសាងសង់ហេដ្ឋារចនាសម្ព័ន្ធផ្លូវថ្នល់ស្ពានឱ្យបានគ្រប់គ្រាន់ដោយប្រើប្រាស់យុទ្ធសាស្ត្រធ្វើផ្លូវ ដើម្បីផ្ដល់ជីវិតផ្ដល់ដង្ហើមសេដ្ឋកិច្ចនៅក្នុងខេត្តតំបន់ឆ្នេរ ។ ទី៣: ការសាងសង់ប្រព័ន្ធចែកចាយទឹកស្អាត និងអគ្គិសនី ឱ្យធានាបាននិរន្តរភាព ដើម្បីបង្កើនសក្តានុពលរោងចក្រ និងទេសចរណ៍នៅក្នុងខេត្តតំបន់ឆ្នេរ ជាពិសេសខេត្តកំពត និងការវិនិយោគលើប្រព័ន្ធលូបង្ហូរទឹកកខ្វក់នៅកោះរ៉ុង និងកោះរ៉ុងសន្លឹម ដើម្បីផ្ដល់ឱ្យសហគមន៍មានការងារធ្វើជាដើម ។
បន្ថែមពីលើនេះ ឯកឧត្តមឧបនាយករដ្ឋមន្ត្រី សាយ សំអាល់ បានគូសបញ្ជាក់ថា កិច្ចការភូមិឃុំសង្កាត់មានសុវត្ថិភាព គឺត្រូវគិតពីអ្វីដែលជាភាពជាក់ស្ដែង ដោយភ្ជាប់ជាមួយការជួយកែលម្អជីវភាពប្រជាពលរដ្ឋក្នុងមូលដ្ឋានឱ្យប្រសើរឡើងផងដែរ ៕
អត្ថបទ ៖ ហេង វណ្ណា
រូបភាព ៖ គ្រី សម្បត្តិ
