ឧបនាយករដ្ឋមន្រ្តី ហ៊ុន ម៉ានី ៖ វិស័យអប់រំនៅតែជាវិស័យអាទិភាព ខណៈក្នុងអាណត្តិទី៧នេះ បានធ្វើការប្រឡងជ្រើសរើសមន្រ្តីជាង ៥ពាន់នាក់
(ភ្នំពេញ)៖ ឯកឧត្តម ឧបនាយករដ្ឋមន្រ្តី ហ៊ុន ម៉ានី មានប្រសាសន៍លើកឡើងថា ការយកចិត្តទុកដាក់របស់រាជរដ្ឋាភិបាល ទៅលើវិស័យអប់រំ ជាពិសេសវិស័យអប់រំ គ្រូបង្រៀន ដោយក្នុងនោះយុទ្ធសាស្រ្តបញ្ចកោណដំណាក់កាលទី១ មនុស្ស ទឹក ផ្លូវ ភ្លើង និងបច្ចេកវិទ្យា ខណៈមនុស្សនៅតែជាវិស័យគន្លឹះរបស់រាជរដ្ឋាភិបាល។ ក្រៅពីនេះ បើយើងមើលទៅលើអ្វីដែលជាការផ្តល់ជាអាទិភាព ចាប់តាំងពីអាណត្តិមុនៗ និងនៅក្នុងអាណត្តិទី៧ ដូចគ្នា ការជ្រើសរើសចំនួនក្របខណ្ឌ និងមន្រ្តីចូលបម្រើការងារនៅក្នុងវិស័យអប់រំ នៅតែទទួលបាននូវចំនួនការជ្រើសរើសច្រើនជាងគេ បើប្រៀបទៅនឹងក្រសួងដ៏ទៃទៀត ជាអាទិភាព នៅលើវិស័យអប់រំគឺមកដល់ពេលបច្ចុប្បន្ននេះ បានធ្វើការជ្រើសរើសប្រមាណ ៥៣០១នាក់រួចមកហើយ ដែលក្នុងនោះមាន គ្រូកីឡា គ្រូបឋមសិក្សា គ្រូអនុវិទ្យាល័យ គ្រូវិទ្យាល័យ ហើយចុងក្រោយនេះគឺគ្រូវផ្អែកលើកិច្ចព្រមព្រៀងការងារក្នុងគោលដៅចំនួន ៥ខេត្ត។
ឯកឧត្តម ឧបនាយករដ្ឋមន្រ្តី ហ៊ុន ម៉ានី រដ្ឋមន្រ្តីក្រសួងមុខងារសាធារណៈ មានប្រសាសន៍ បែបនេះនៅថ្ងៃទី ២០ ខែវិច្ឆិកា ឆ្នាំ២០២៥ ក្នុងសន្និសីទសារព័ត៌មាន ស្ដីពីវឌ្ឍនភាពព័ត៌មានអំពីដំណើរការជ្រើសរើស និងគ្រប់គ្រងគ្រូបង្រៀនផ្អែកលើកិច្ចព្រមព្រៀងការងារឱ្យចូលបម្រើការងារក្នុងគ្រឹះស្ថានបឋមសិក្សាសាធារណៈ នៅសាលាភូមិន្ទរដ្ឋបាល ដោយមានការចូលរួមពីឯកឧត្តមបណ្ឌិត ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា និង ឯកឧត្តម យក់ ប៊ុនណា រដ្ឋលេខាធិការប្រចាំក្រសួងមុខងារសាធារណៈ។
ឯកឧត្តម ឧបនាយករដ្ឋមន្រ្តី បន្ថែមថា ការយកចិត្តទុកដាក់ទៅលើគ្រូបង្រៀន មានទាំងគ្រូក្របខណ្ឌ គ្រូកិច្ចសន្យា ក៏ដូចជាគ្រូផ្អែលើកិច្ចសន្យាការងារ ដែលជាដំណាក់កាលចុងក្រោយ។ ការយកចិត្តទុកដាក់របស់រាជរដ្ឋាភិបាល គឺបានធ្វើការកែប្រែជាបន្ទាប់ ខណៈការគិតគូរទៅលើប្រាក់បៀរវត្ស កាលនៅឆ្នាំ២០១៣ ប្រាក់បៀរវត្សអប្បបរមា ត្រឹមតែ ៤សែនរៀល ហើយប្រាក់បៀរវត្សអតិបរមាគឺប្រមាណជា១លាន៧សែនរៀល ខណៈមកដល់ឆ្នាំ២០២៤ ប្រាក់បៀរវត្សអប្បបរមា ១លាន ៤សែនរៀល និងមិនទាន់បានគិតប្រាក់បំណាច់មុខងារ ការតម្លើងឋានន្តរសក្ត័ មេដៃការងារ គួបផ្សុំទៅប្រាក់ឧបត្ថម្ភបន្ថែមក្នុងពេលបុណ្យចូលឆ្នាំខ្មែរ បុណ្យភ្ជុំបិណ្ឌ បបស និង មូលនិធិគាំពារសង្គមផ្សេងៗ។
ឯកឧត្តម ឧបនាយករដ្ឋមន្រ្តី ហ៊ុន ម៉ានី គូសបញ្ជាក់បន្ថែមថា ការអភិវឌ្ឍ ក៏ដូចជាការយកចិត្តទុកដាក់ដាក់ទៅលើលោកគ្រូអ្នកគ្រូ វិស័យអប់រំបានបន្តវិវត្តន៍ពីដំណាក់កាលមួយទៅដំណាក់កាលមួយ ពោលគឺចាប់ពី «អ្នកចេះច្រើនបង្រៀនអ្នកចេះតិច ហើយអ្នកចេះតិចបង្រៀនអ្នកអត់ចេះសោះ» ដែលនេះជាបរិបទមួយដែលឆ្លុះបញ្ចាំងទៅលើវិស័យអប់រំមកដល់ពេលបច្ចុប្បន្ននេះ គឺមានការវិវិត្តន៍ច្រើនផងដែរ៕
អត្ថបទ ៖ ង៉ាន់ ទិត្យ
រូបភាព ៖ រិន រចនា
