ពង្រឹងគុណភាពអប់រំវិស្វកម្ម ជាបង្គោលអាទិភាពមួយ ក្នុងផែនការយុទ្ធសាស្ត្រអភិវឌ្ឍន៍ជាតិ
(ភ្នំពេញ)៖ ពង្រឹងគុណភាពអប់រំវិស្វកម្ម គឺជាបង្គោលអាទិភាពមួយ ក្នុងផែនការយុទ្ធសាស្ត្រអភិវឌ្ឍន៍ជាតិរបស់រាជរដ្ឋាភិបាលកម្ពុជា ។ ឯកឧត្តម សុខុម រិទ្ធីវុធ គ្គលេខាធិការគណៈវិស្វករកម្ពុជា បានថ្លែងដូច្នេះ ក្នុងវគ្គបណ្តុះបណ្តាល ស្តីពី បច្ចេកទេសសំណង់ប្រកប ដោយនវានុវត្តន៍ តាមរយៈការប្រើប្រាស់បេតុង ប្រេកុងត្រាំង ប្រព័ន្ធពុម្ព និងបច្ចេកវិទ្យាតម្លើងស្ពាន រយៈពេល ១ថ្ងៃពេញ នៅសណ្ឋាគារកាំបូឌីយ៉ាណា ។
លោកជំទាវ ខ្វៃ សុភាព អគ្គលេខាធិការរងគណៈវិស្វករកម្ពុជា បានថ្លែងថា ធនធានមនុស្សកម្លាំងពលកម្ម គំនិតច្នៃប្រឌិតថ្មីៗ និងនវានវត្តន៍ក្នុង ការប្រើប្រាស់បច្ចេកវិទ្យា គឺជាកត្តាចម្បងដែលយើងកំពុងត្រូវការជាចាំបាច់ នាពេលបច្ចុប្បន្ន ហើយធនធានវិស្វករជាតិ ជាកត្តាលីករដ៏ល្អពិសេសមួយ ក្នុងការអភិវឌ្ឃជាតិ ជាពិសេសមានការចូលរួម ចំណែកយ៉ាងសកម្ម ពីបណ្តាប្រជាពលរដ្ឋទូទៅ វិស័យឯកជន និង រាជរដ្ឋាភិបាល ។
ថ្លែងក្នុងពិធីបិទវគ្គបណ្តុះបណ្តាលនេះ ឯកឧត្តម សុខុម រិទ្ធីវុធ បានថ្លែងអំណរគុណដល់វាគ្មិនទាំងអស់ មកពីប្រទេសវៀតណាម និងសឹង្ហបូរី ដែលបាន មកផ្តល់បទបង្ហាញដ៏មានសារៈសំខាន់ ស្តីពី ៖ បច្ចេកវិទ្យាបន្តឹងសរសៃដែក ក្រោយបេតុងរឹង ដើម្បីសម្រេចបានប្រសិទ្ធភាពគ្រឿងបង្គុំនៃសំណង់អគារខ្ពស់ៗ ការបន្តឹងសរសៃដែកក្រោយបេតុងរឹង ដោយមិនប៉ះពាល់ដល់លទ្ធភាពទ្រទ្រង់ នៃគ្រឿងបង្គុំ។ គន្លឹះនៃការសិក្សាគម្រោងប្លង់ វិធីសាស្ត្រសាងសង់ និងផលចំណេញ ។ គុណសម្បត្តិនៃការប្រើប្រាស់ ប្រព័ន្ធរៀបចំពុម្ព និងតួនាទីរបស់វា ក្នុងការផ្លាស់ប្តូរ នៃការអនុវត្តក្នុងការសាងសង់តាមបែបទំនើប ការប្រើប្រាស់ម៉ូឌុលពុម្ពកម្រាលខណ្ឌ ពីអាលុយមីញ៉ូម និងប្រព័ន្ធពុម្ពផ្សេងៗទៀត ដែលផ្តល់ផលចំណេញពេលវេលា ក្នុងការតម្លើងពុម្ពឡើងវិញ បង្កើនភាពត្រឹមត្រូវ និងវិធានការគ្រប់គ្រងគុណភាព ។ ភាពច្នៃប្រឌិត ក្នុងការប្រើប្រាស់បច្ចេកវិទ្យាតម្លើងស្ពាន ដែលជាដំណោះស្រាយគន្លឹះ សម្រាប់ការសាងសង់ស្ពានប្រកបដោយប្រសិទ្ធភាព និងសុវត្ថិភាព ។ វិធីសាស្ត្រទាំងនេះ បានផ្តល់នូវគុណសម្បត្តិ រួមមានការកាត់បន្ថយរយៈពេល កម្រិតលំអៀង នៃការសងសង់ និងភាពប្រថុយប្រថានលើលក្ខខណ្ឌប្រឈមនៅការដ្ឋាន។
ឯកឧត្តម បានសង្កត់ធ្ងន់ថា ចំណុចទាំងអស់នេះ ជាពុទ្ធិដ៏ប្រសើរ និងជាប្រយោជន៍ សម្រាប់យកទៅប្រើប្រាស់ក្នុងការវិភាគ វាយតម្លៃ ច្នៃប្រឌិត ជួយសម្រួល ដល់កិច្ចប្រតិបត្តិការ វិជ្ជាជីវៈរបស់វិស្វករ ឱ្យកាន់តែមានគុណភាព សុក្រឹត្យភាព ប្រកបដោយសុវត្ថិភាពខ្ពស់។ រាជរដ្ឋាភិបាល បានចាត់ទុកការអប់រំបណ្តុះបណ្តាល ប្រកបដោយគុណភាព គឺជាចំណុចគន្លឹះមួយដែលមិនអាចខ្វះបាន សម្រាប់អភិវឌ្ឍន៍មូលធនមនុស្ស និងការអភិវឌ្ឍសង្គមជាតិ ប្រកបដោយនិរន្តរភាព និងបរិយាប័ន ដែលប្រទេសយើង ត្រូវការជាចាំបាច់ ក្នុងការជំរុញការអភិវឌ្ឍសង្គម និងសេដ្ឋកិច្ច ដើម្បីដើរឱ្យទាន់ប្រទេសជិតខាង ក្នុងតំបន់ និងបណ្ដាប្រទេសផ្សេងទៀត ក្នុងពិភពលោក ។
ឯកឧត្តមអគ្គលេខាធិការគណៈវិស្វករកម្ពុជា ក៏សូមអំពាវនាវដល់អ្នកចូលរួម ជាមួយគណៈវិស្វករកម្ពុជា ជួយជំរុញឱ្យស្ថាប័នជាតិមួយនេះ មានលទ្ធភាព និងសមត្ថភាពគ្រប់គ្រាន់រួមចំណែកបន្តអនុវត្តគោលនយោបាយរបស់រាជរដ្ឋាភិបាល ព្រមទាំងសមាហរណកម្មវិជ្ជាជីវៈវិស្វកម្មក្នុងតំបន់ និងសកលភាវូបនីយកម្ម ។
គួរបញ្ជាក់ថា ឆ្នាំ២០២៥ អគ្គលេខាធិការដ្ឋានគណៈវិស្វករកម្ពុជា បានរៀបចំវគ្គបណ្តុះបណ្តាលដោយផ្ទាល់បានចំនួន ៥លើក មានអ្នកចូលរួមចំនួន ១ ២៩៥នាក់ ស្រីចំនួន ១៣២នាក់ ខណៈវគ្គបណ្ដុះបណ្ដាលនេះ មានអ្នកចូលរួមជាង ២០០នាក់ ៕
ដោយ ៖ វណ្ណលុក
