ឯកឧត្តម សាយ សំអាល់ បង្ហាញការស្វាគមន៍ចំពោះគម្រោងវិនិយោគរបស់ក្រុមហ៊ុនចិន CENTRAL GAIN
(ភ្នំពេញ)៖ កាលពីថ្ងៃទី២៤ ខែវិច្ឆិកា ឆ្នាំ២០២៥ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតឲ្យលោកស្រី Shao Liyu ប្រធានក្រុមហ៊ុន CENTRAL GAIN និងក្រុមការងារ ចូលជួបសម្ដែងការគួរសម និងរាយការណ៍ជូនអំពីវឌ្ឍនភាពនៃគម្រោងវិនិយោគលើវិស័យថាមពលអគ្គិសនីរបស់ក្រុមហ៊ុននេះនៅខេត្តព្រះសីហនុ។
លោកស្រី Shao Liyu បានកោតសរសើរចំពោះភាពទាក់ទាញនៃបរិយាកាសវិនិយោគនៅប្រទេសកម្ពុជា ដែលកំពុងមានសន្តិសុខ និងស្ថិរភាពនយោបាយ ហើយប្រជាជនមានជីវភាពរស់នៅសមរម្យ មានភាពរួសរាយរាក់ទាក់ និងមានសាមគ្គីភាពល្អ។ លោកស្រីបញ្ជាក់ថា ដោយសារតែកត្តាអំណោយផលទាំងនេះហើយទើបក្រុមហ៊ុន CENTRAL GAIN មានបំណងមកបណ្ដាក់ទុននៅកម្ពុជា។ នៅខេត្តព្រះសីហនុ ក្រៅពីថាមពលអគ្គិសនី ក្រុមហ៊ុនរបស់លោកស្រីក៏មានចំណាប់អារម្មណ៍វិនិយោគលើវិស័យសំខាន់ៗជាច្រើនទៀតដូចជា៖ ថាមពលកកើតឡើងវិញ ការចម្រាញ់ប្រេង រួមទាំងបញ្ញាសិប្បនិមិត្ត និងការរៀបចំទីក្រុងជាដើម។ លោកស្រីសង្ឃឹមថា គម្រោងទាំងនេះនឹងទទួលបានការគាំទ្រពីរាជរដ្ឋាភិបាលកម្ពុជា។
ជាការឆ្លើយតប ឯកឧត្តមឧបនាយករដ្ឋមន្រ្តី សាយ សំអាល់ បានបង្ហាញការស្វាគមន៍យ៉ាងកក់ក្តៅចំពោះគម្រោងវិនិយោគរបស់ក្រុមហ៊ុនចិន CENTRAL GAIN ហើយលើកទឹកចិត្តឱ្យមានការកៀរគរអ្នកវិនិយោគកាន់តែច្រើនមកបណ្ដាក់ទុននៅតំបន់ឆ្នេររបស់កម្ពុជា ជាពិសេសខេត្តព្រះសីហនុ ដោយហេតុថា កម្ពុជាកំពុងរៀបចំតំបន់ឆ្នេរសមុទ្រឱ្យទៅជារបៀងសេដ្ឋកិច្ចដ៏សំខាន់មួយ។ ឯកឧត្តមឧបនាយករដ្ឋមន្ត្រី ដែលជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកែប កំពត និងខេត្តព្រះសីហនុផងដែរនោះ បានសន្យាជួយសម្របសម្រួល និងផ្ដល់ភាពកក់ក្តៅជូនក្រុមហ៊ុន និងអ្នកវិនិយោគទាំងអស់ ដែលចង់មកបណ្តាក់ទុន និងរួមចំណែកដល់ការអភិវឌ្ឍប្រទេសកម្ពុជា។ ឯកឧត្តមកត់សម្គាល់ថា គម្រោងវិនិយោគរបស់ក្រុមហ៊ុន CENTRAL GAIN គឺស្របតាមយុទ្ធសាស្ត្រអភិវឌ្ឍន៍រយៈពេលវែងរបស់រាជរដ្ឋាភិបាល ដែលចង់ប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
ចុងក្រោយ ឯកឧត្តមឧបនាយករដ្ឋមន្រ្តីបានរម្លឹកពីចំណងមិត្តភាពដែកថែករវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ដែលកំពុងស្វែងរកទីទួលសុវត្ថិភាពមួយ ដើម្បីធ្វើធុរកិច្ចជាមួយគ្នា និងរីកចម្រើនទាំងអស់គ្នា។ ឯកឧត្តមក៏បានកោតសរសើរផងដែរដល់យុទ្ធសាស្ត្រផ្លូវ១ ខ្សែក្រវ៉ាត់១ របស់ចិន ហើយយល់ឃើញថា ប្រទេសទាំងពីរត្រូវរិះរកវិធីសាស្ត្រសហការគ្នាបន្ថែមទៀត ដើម្បីបង្កើនផលិតភាពផលិតផលសម្រាប់ចែកចាយក្នុងពិភពលោក៕
