អង្គការផ្កាយសមុទ្រកម្ពុជា បម្លែងបាល់ទាត់សម្រាប់សហគមន៍ ទៅជាការគាំទ្រការអប់រំសម្រាប់កុមារ
(ភ្នំពេញ)៖ អង្គការផ្កាយសមុទ្រកម្ពុជា កាលពីចុងសប្តាហ៍កន្លងទៅ បានបង្កើតព្រឹត្តិការណ៍បាល់ទាត់សប្បុរសធម៌ ឆ្នាំ២០២៥ ដើម្បីស្វែងរកការគាំទ្រថវិកាឧបត្ថម្ភយកទៅជួយដល់ការសិក្សារបស់កុមារក្រីក្រឱ្យទទួលបានការអប់រំបណ្តុះបណ្តាលក្លាយជាទំពាំងស្នងឬស្សីរបស់ប្រទេសជាតិសម្រាប់អនាគត។
ព្រឹត្តិការណ៍បាល់ទាត់សប្បុរសធម៌នេះ ទទួលបានអ្នកចូលរួមជាង ៧០០នាក់ រួមទាំងកីឡាករបាល់ទាត់មិនមែនអាជីពចំនួន ៣៥០នាក់ មកពីក្រុមហ៊ុន និងសហគមន៍ចំនួន ២៤ក្រុម ។ ការប្រកួតបាល់ទាត់សម្រាប់សហគមន៍នេះ បានផ្សារភ្ជាប់ការប្រកួតមិត្តភាពឲ្យក្លាយជាការគាំទ្រដ៏មានន័យ សម្រាប់ការអប់រំរបស់កុមារក្រីក្រក្នុងរាជធានីភ្នំពេញ។ ជាមួយការគាំទ្រពីដៃគូរ ២២ ក្រុមហ៊ុន ព្រឹត្តិការណ៍នេះបានជួយលើកកម្ពស់ការយល់ដឹង និងស្វែងរកថវិកាសម្រាប់កម្មវិធីរបស់អង្គការផ្កាយសមុទ្រកម្ពុជាដែលផ្តល់ឱកាសអប់រំ សុខភាព ជំនាញជីវិត និងការលេងកីឡា ដល់យុវជនយ៉ាងហោច ៤,០០០នាក់ រៀងរាល់ឆ្នាំ។
បរិយាកាសប្រកួតពេញមួយថ្ងៃ បានឆ្លុះបញ្ចាំងពី ស្មារតី “កីឡាដើម្បីការអប់រំ” និងការរីកចម្រើនរបស់ព្រឹត្តិការណ៍នេះ ដែលត្រូវបានរៀបចំឡើងជាលើកទី៤ហើយគិតត្រឹមឆ្នាំ២០២៥នេះ ។
អ្នកស្រី ជួប វិច្ឆិកា នាយកប្រតិបត្តិអង្គការផ្កាយសមុទ្រកម្ពុជា បានមានប្រសាសន៍ថា៖“ព្រឹត្តិការណ៍នេះគឺចង់រំលេចពីសារៈសំខាន់នៃកីឡាបាល់ទាត់សម្រាប់សហគមន៍ដែលមានការចូលរួមមិនថាពីសហគមន៍ ឬក្រុមហ៊ុនឯកជនឡើយ គឺនៅពេលដែលយើងមានគោលបំណងតែមួយគឺយើងអាចកែប្រែ កីឡាបាល់ទាត់ក្លាយជាស្ពានទៅកាន់ការអប់រំ ឱកាស និងទំនុកចិត្តសម្រាប់កុមារដែលកំពុងមានតម្រូវការ។
ឆ្លងកាត់ ការប្រកួតផ្តាច់ព្រ័ត្រយ៉ាងស្វិតស្វាញ ក្រុម Khemerak Angkor បានឈ្នះពានជើងឯកក្នុងរដូវកាលឆ្នាំ២០២៥នេះ។ ខណៈក្រុម The Legacy FT ទទួលបានចំណាត់ថ្នាក់លេខ ២ និងក្រុម Courtyard By Marriott Phnom Penh ស្ថិតក្នុងចំណាត់ថ្នាក់លេខ ៣។
ថវិកាដែលប្រមូលរៃអង្គាសពីកម្មវិធីបាល់ទាត់សប្បុរសធម៌នេះ យកទៅជួយដល់អង្គកាផ្កាយសមុទ្រលើការអប់រំ ។
សូមបញ្ជាក់ថា ជារៀងរាល់ឆ្នាំ កម្មវិធីអប់រំរបស់អង្គការផ្កាយសមុទ្រគាំទ្រដល់សិស្សានុសិស្សជាង ៧០០នាក់ ឲ្យរៀនសូត្រចាប់ពីថ្នាក់ពន្លឿនរហូតដល់ថ្នាក់ បឋមសិក្សា មធ្យមសិក្សា ឧត្តមសិក្សា និងរហូតដល់ពួកគេមានការងារធ្វើសមរម្យ។ បន្ថែមពីនេះ ក្រុមគ្រួសាររបស់សិស្សជាង ៣,០០០នាក់ ក៏ទទួលបានការឧបត្ថម្ភគាំទ្រ តាមរយៈគម្រោង ផ្សេងៗរបស់អង្គការផងដែរ ៕
រូបភាព ៖ ជីម ភារ៉ា
អត្ថបទ ៖ ជាវ ចន្ធូ
