សម្ដេច ម៉ែន សំអន៖ស្នាក់ការថ្មីគណបក្សប្រជាជនកម្ពុជាឃុំសំបួរនឹងលេចរូបរាងនៅពេលខាងមុខ
ស្វាយរៀង៖ការដ្ឋានសាងសង់ទីស្នាក់ការគណបក្សប្រជាជនកម្ពុជា ឃុំសំបួរ ស្រុកស្វាយទៀប ខេត្តស្វាយរៀង និងហេដ្ឋារចនាសម្ព័ន្ធនានា ភូមិអូក្អាម ឃុំសំបួរ ស្រុកស្វាយទាប បានប្រារព្ធពិធីបញ្ចុះបឋមសិលាកាលពីថ្ងៃទី៤ ខែធ្នូ ឆ្នាំ២០២៥ក្រោមអធិបតីភាពសម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជា អនុប្រធានគណបក្សប្រជាជនកម្ពុជា ។
ថ្លែងក្នុងពិធីបញ្ចុះបឋមសិលាសម្តេចកិត្តិសង្គហបណ្ឌិត ម៉ែន សំអន បានកោតសសើរ ឯកឧត្តម សៅ សុខា ប្រធានក្រុមការងារគណបក្សចុះមូលដ្ឋានស្រុកស្វាយទៀប រួមជាមួយក្រុមការងារ បានរួមសហការជួយគ្នាកសាងសមិទ្ធផលជាច្រើន នៅក្នុងខេត្តស្វាយរៀង ពិសេស ស្រុករមាសហែក ស្រុកស្វាយទៀប រួមមាន ការកសាងមន្ទីរពេទ្យ សាលារៀន ផ្លូវថ្នល់ ស្នាក់ការបក្ស ជាដើម ។សម្ដេចបន្តថា គណបក្សប្រជាជនកម្ពុជា ចងចាំមិនភ្លេច នូវស្នាដៃ និង សមិទ្ធផលរាប់មិនអស់របស់ ឯកឧត្តម និងក្រុមការងារ ។ ដោយឡែកស្នាក់ការបក្សនេះ នឹងបានចូលរួមចំណែកក្នុងការបំពេញតាមតម្រូវការរបស់ប្រជាពលរដ្ឋ និងជួយសម្រួលដល់ការបម្រើការងារ របស់គណបក្សនៅមូលដ្ឋានផងដែរ ។
សូមជម្រាបថា ទីស្នាក់ការគណបក្សប្រជាជនកម្ពុជាឃុំសំបួរ ដែលត្រូវសាងសង់មានទទឹង ៣១,៥ម៉ែត្រ , បណ្តោយ ១២ម៉ែត្រ ,ផ្នែកខាងមុខ ៨ម៉ែត្រ គុណ៨ម៉ែត្រ ៕
អត្ថបទ ៖ ឈឹម សុផល
រូបភាព ៖ ថេត វិចិត្រ
