MC: ក្រុមហ៊ុន CAMBODIAN XUAN YI MINERALS CO., LTD. ដែលបានបង្ហូរសារធាតុគីមីគ្រោះថា្នក់ចូលក្នុងប្រព័ន្ធអូរឬស្សី ខេត្តកំពង់ឆ្នាំង ត្រូវបានអាជ្ញាធរចាត់វិធានការក្តៅ ដោយសម្រេចបិទអាជីវកម្មរបស់ក្រុមហ៊ុននេះតែម្តង។

Read: ក្រសួងបរិស្ថានបានសម្រេចបិទអាជិវកម្មក្រុមហ៊ុន CAMBODIAN XUAN YI MINERALS CO., LTD. ដែលបង្កឲ្យមានការបំពុលបរិស្ថាននៅតំបន់អូរឬស្សីក្នុងខេត្តកំពង់ឆ្នាំង។ ក្រសួងបានរកឃើញក្រុមហ៊ុន បានប្រព្រឹត្តល្មើសច្បាប់បរិស្ថាន ដោយបានបញ្ចេញសំណល់រាវមិនត្រឹមត្រូវ ប៉ះពាល់ទឹកនៅក្នុងប្រព័ន្ធទឹកអូឬស្សី ក្នុងភូមិសាស្ត្រឃុំខ្លុងពពក ឃុំជាប ឃុំអភិវឌ្ឍ និងឃុំតាំងក្រសាំង ស្រុកទឹកផុស ខេត្តកំពង់ឆ្នាំង ។

ក្រសួងបរិស្ថានបញ្ជាក់ថា ក្រុមហ៊ុននេះពុំមានប្រព័ន្ធគ្រប់គ្រងសំណល់រាវត្រឹមត្រូវទេ ដោយអាងស្តុកសំណល់រាវជាស្រះស្តុកធម្មតា មិនមានបំពាក់ប្រព័ន្ធសម្អាត ហើយសំណល់រាវទាំងអស់ចេញពីទីតាំងកិន និងរែងរ៉ែត្រូវបានបង្ហូរលាយឡំជាមួយប្រព័ន្ធលូទឹកភ្លៀង។ លើសពីនេះ ក្រុមហ៊ុនមិនមានកន្លែងទុកដាក់គសំណល់រឹង និងសារធាតុគ្រោះថ្នាក់ត្រឹមត្រូវឡើយ។ ជាងនេះទៅទៀត ក្រុមហ៊ុនពុំបានអនុវត្តការធ្វើរបាយការណ៍វាយតម្លៃផលប៉ះពាល់បរិស្ថាន ស្របតាមក្រមបរិស្ថាន និងធនធានធម្មជាតិ និងបទដ្ឋានគតិយុត្តជាធរមានទេ។

សូមបញ្ជាក់ថា យោងតាមលទ្ធផលសំណាកទឹកទាំង៦ទីតាំងខាងលើ គឺមានស្ថានភាពគុណភាពទឹកមិនអនុលោមតាមស្តង់ដារទឹកសាធារណៈ ជាពិសេសប៉ារ៉ាមែត្រសាយ៉ានីដ (Cyanide) នៅចំនួន៥ទីតាំង និងមានកំហាប់ប្រែប្រួល ទាប់ ខ្ពស់ ។ សារធាតុសាយ៉ានីដនេះត្រូវបានគេប្រើប្រាស់ជាទូទៅនៅក្នុងវិស័យឧស្សាហកម្មសម្រាប់ចម្រាញ់រ៉ែមាស។ ចំពោះប៉ារ៉ាមែត្រ CODCr ជាប៉ារ៉ាមែត្របញ្ជាក់ពីសាធាតុគីមីចេញពីរោងចក្រ ដែលជាធម្មតាមិនអាចរកឃើញនៅក្នុងទឹកធម្មជាតិទេ ប៉ុន្តែវាបែរជាត្រូវបានរកឃើញនៅគ្រប់ទីតាំងយកសំណាកទាំងអស់ ទោះបីជាស្ថិតក្នុងកម្រិតទាបក៏ដោយ។

ក្រសួងបរិស្ថាន បានចាត់វិធានការបន្ទាន់ដោយស្នើដល់ប្រជាពលរដ្ឋពាក់ព័ន្ធនៅក្នុងតំបន់ប្រើប្រាស់ទឹកអូរឬស្សី ក្នុងស្រុកទឹកផុស ខេត្តកំពង់ឆ្នាំង ផ្អាកការប្រើប្រាស់ទឹក នេសាទ ឬយកសត្វចិញ្ចឹមចុះផឹកទឹកអូរ ជាបណ្តោះអាសន្ន រហូតដល់មានការណែនាំជាថ្មី។ បន្ថែមពីលើការបិទអាជីវកម្មក្រុមហ៊ុន CAMBODIAN XUAN YI MINERALS ក្រសួងនឹងអនុវត្តវិធានការច្បាប់ និងលិខិតបទដ្ឋានគតិយុត្តជាធរមានចំពោះក្រុមហ៊ុន ដែលបានប្រព្រឹត្តល្មើស បង្កឱ្យមានការបំពុលទឹកនៅក្នុងប្រព័ន្ធទឹកអូរឬស្សី។

ទន្ទឹមនឹងនេះដែរ ក្រសួងកំពុងចាត់វិធានការបច្ចេកទេសទប់ស្លាត់ការបំពុលតំបន់ទឹកអូរឬស្សី ដោយមានការសហការពីក្រសួង ស្ថាប័នពាក់ព័ន្ធ រដ្ឋបាលខេត្តកំពង់ឆ្នាំង អាជ្ញាធរមូលដ្ឋាន និងសហគមន៍ប្រជាពលរដ្ឋបន្ថែមទៀត៕

ដោយ៖ង៉ាន់ ទិត្យ