ជនសង្ស័យ១២៥នាក់ពាក់ព័ន្ធនឹងការឆបោកតាមប្រព័ន្ធបច្ចេកវិទ្យា ត្រូវបានឃាត់ខ្លួនក្នុងប្រតិបត្តិការចំនួនពីរ
ព្រះសីហនុ៖ក្រុមជនសង្ស័យមានស្រីមានប្រុសចំនួន១២៥នាក់(ស្ត្រី៥២នាក់)ក្នុងនោះមានជនជាតិថៃចំនួន៧៥នាក់ផង ត្រូវបានកម្លាំងសមត្ថកិច្ចចម្រុះឃាត់ខ្លួនក្នុងប្រតិបត្តិការចំនួនពីរដាច់ដោយឡែកពីគ្នាក្នុងថ្ងៃតែមួយនៃថ្ងៃទី៩ ខែធ្នូ ឆ្នាំ២០២៥ នៅរាជធានីភ្នំពេញ និងខេត្តព្រះសីហនុ ។ខណៈនេះជនសង្ស័យពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា (Online Scam)ត្រូវបានសមត្ថកិច្ចបន្តអនុវត្តតាមនីតិវិធីច្បាប់និងស្វែងរកមេខ្លោង។
ប្រតិបត្តិការទី១ជាប្រតិបត្តិការចម្រុះរវាងសមត្ថកិច្ចកម្ពុជានិងកូរ៉េ ប្រព្រឹត្តទៅនៅទីតាំងអគារ XIN DU HAI (ជាន់ទី៥) ស្ថិតក្នុងភូមិ៤ សង្កាត់៤ ក្រុង ខេត្តព្រះសីហនុក្រោយរបាយការណ៍ស្រាវជ្រាវរបស់សមត្ថកិច្ចបញ្ជាក់ការសង្ស័យថា មានការលបលួចប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា។ក្រោយការឆ្មក់ឆែកឆេរជនសង្ស័យចំនួន៥០នាក់ ក្នុងនោះមានស្ត្រី៤នាក់ ត្រូវបានកម្លាំងសមត្ថកិច្ចឃាត់ខ្លួន។ជាមួយគ្នានេះសមត្ថកិច្ចក៏បានជួយសង្គ្រោះជនជាតិកូរ៉េខាងត្បូងចំនួន២នាក់ ដែលជាជនរងគ្រោះ និងបានរឹបអូសសម្ភារៈជាវត្ថុតាងរួមមាន កុំព្យូទ័រ (All in one) ចំនួន ៦៣គ្រឿង, ទូរសព្ទចំនួន ៦០គ្រឿង និង IPAD ចំនួន ៦០គ្រឿង។
ប្រភពបានបញ្ជាក់ថា ប្រតិបត្តិការរួមគ្នារវាងកម្ពុជា និងកូរ៉េខាងត្បូងនេះ ត្រូវបានដឹកនាំធ្វើឡើងកាលពីថ្ងៃទី៩ ខែធ្នូ ឆ្នាំ២០២៥ ក្រោមការសម្របសម្រួលពីលេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា សហការជាមួយអគ្គស្នងការដ្ឋាននគរបាលជាតិ គណៈបញ្ជាការឯកភាពខេត្តព្រះសីហនុ ដោយមានការសម្របសម្រួលនីតិវិធីពីតំណាងអយ្យការអមសាលាដំបូងខេត្ត និងអាជ្ញាធរពាក់ព័ន្ធ ដោយបានចុះត្រួតពិនិត្យទីតាំងសង្ស័យខាងលើ និងបានឈានដល់ការឃាត់ខ្លួនជនសង្ស័យទាំងនោះ។
ចំណែកប្រតិបត្តិការទី២ ធ្វើឡើងនៅទីតាំងកសិដ្ឋានឈ្មោះ អមរៈ ស្ថិតក្នុងភូមិកោះក្របី១ សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញក្រោមបទសង្ស័យដូចគ្នា។ ជនជាតិថៃចំនួនចំនួន ៧៥នាក់ ក្នុងនោះមានស្ត្រី ៤៨នាក់ ត្រូវបានកម្លាំងសមត្ថកិច្ចចម្រុះកម្ពុជាឃាត់ខ្លួនក្នុងប្រតិបត្តិការនេះ។ជនសង្ស័យនិងវត្ថុតាង ត្រូវបានប្រគល់ជូនអគ្គស្នងការដ្ឋាននគរបាលដើម្បីបន្តអនុវត្តតាមនីតិវិធីច្បាប់។ ចំណែកឯទីតាំងកសិដ្ឋានត្រូវបានបិទបណ្តោះអាសន្ន។
សូមបញ្ជាក់ថា ក្នុងក្របខ័ណ្ឌយុទ្ធនាការបោសសម្អាតការឆបោកតាមប្រព័ន្ធ បច្ចេកវិទ្យានេះ សមត្ថកិច្ចចម្រុះទូទាំងប្រទេសនឹងចាត់វិធានការតាមផ្លូវច្បាប់ យ៉ាងតឹងរឹងបំផុតចំពោះមេខ្លោងទាំងឡាយ ដែលជាប់ពាក់ព័ន្ធនឹង អំពើឆបោកតាមប្រព័ន្ធបច្ចេកវិទ្យានេះ ដោយគ្មានការលើកលែង៕
ដោយ៖មុនី
