ភ្នំពេញ៖លើបណ្ដាញសង្គមហ្វេសប៊ុកផ្លូវការនារសៀលថ្ងៃទី១៥ ខែធ្នូ ឆ្នាំ២០២៥ ឯកឧត្តម ខៀវ កាញារីទ្ធ ឧត្តមប្រឹក្សា​ព្រះមហាក្សត្រ និងជាតំណាងរាស្រ្តមណ្ឌលខេត្តកំពង់ចាម បានបង្ហោះសំណេរបែប​វិភាគទាក់ទងនឹងសកម្មភាពឈ្លានពាន​របស់យោធាថៃ។ សំណេរនេះ​ស្របពេលដែលនៅព្រឹកថ្ងៃទី១៥ ខែធ្នូនេះយោធាថៃបាន​ប្រើប្រាស់​យន្តហោះ F-16 ទម្លាក់មួយគ្រាប់ នៅភូមិសាស្ត្រស្ពានអូរជីក នៃព្រំ​ប្រទល់ស្រុកស្រីស្នំ ខេត្តសៀមរាប។

ឯកឧត្តម ខៀវ កាញារីទ្ធបានសរសេរយ៉ាងដូច្នេះថា ទាហានសៀម​វាយកាន់តែជ្រៅចូលក្នុងទឹកដីកម្ពុជាមិនមែនរឿងពង្វាតទឹកដី​នោះទេ។ បើពង្វាតទឹកដី សៀមច្បាស់ជាប្រមូលផ្តុំកម្លាំងវាយ​ផ្តាច់ចំណុចទាមទារមួយចំនួនហើយ ព្រោះពេលសៀមវាយគ្រប់​កន្លែង​គឺចង់ឱ្យ​ខ្សែការពារកម្ពុជាស្តើង ( ពិតមែនតែសៀមមិនច្បាស់​ថាក្បាលពួកគេទ្រគ្រាប់ផ្លោងរបស់​កម្ពុជាបានប៉ុន្មាន​ពេលក៏ដោយ ) តែពេលនេះជិតបោះឆ្នោត​ មានន័យថា ទឹកដល់ច្រមុះទោះស្រវាអោប​គម្រង់ខ្មោចឆ្កែក៏អោបដែរ ហេតុនេះ​យុទ្ធសាស្ត្រចំពោះមុខរបស់គេ​អាចមាន ៣ ហើយបើជោគជ័យអាចក្លាយជាយុទ្ធសាស្ត្រយូរអង្វែង​បាន ។ យុទ្ធសាស្ត្រទាំងនោះ គឺ ៖
១. លើកទំនុកចិត្តប្រជាជនសៀមឡើងវិញឱ្យជឿថា សៀមនៅ​តែជាបងធំក្នុងតំបន់ ហេតុនេះមិនត្រូវអ្នកណាមកច្បូតពុក​មាត់ខ្លា​បានទេ ពិសេសកម្ពុជាដែលជាប្រទេសតូចតាច ធ្លាប់​រហេមរហាម​ពីមុន ( នៅក្រោយសម័យអ៊ុនតាក់ ពួកកាសែតបរទេស​តែងហៅទី​ក្រុងភ្នំពេញថាជាបាងកកកាលពី ៣០ ឆ្នាំមុន ) ។ ប្រជាជនសៀម​កើនទំនុកចិត្តបានន័យថា​ សន្លឹកឆ្នោតគាំទ្រ​សឹងកើនឡើង ។
២. សង្កត់សេដ្ឋកិច្ចកម្ពុជាឱ្យធ្លាក់ចុះ អាស្រ័យការបង្ខំឱ្យមាន​ប្រជាជន​ភៀសសឹករាប់សែននាក់ ( មកដល់ពេលនេះ​ជិតកន្លះលាន​នាក់ហើយ ) ដែលនឹងក្លាយជាដុំថ្មមួយដែលរាជរដ្ឋាភិបាលត្រូវទទួល​ ( បើគិតថា ក្នុងមួយថ្ងៃរដ្ឋាភិបាលចំណាយ ៥ ដុល្លារ​រ៉ាប់រង​ម្ហូបអាហារ ទឹក ជំរក ថ្នាំពេទ្យ….តើត្រូវចំណាយប៉ុន្មាន ?) ហើយនេះគឺជាសង្គ្រាមមួយដែលសៀមមិនចាំបាច់ចំណាយធំ ។ តែអ្វីដែលសៀមគិតមិនដល់ គឺចលនាប្រជាជនកម្ពុជាទូទាំងប្រទេស​ដែលបាននាំគ្នាជួយបងប្អូនអ្នកភៀសខ្លួនដែលជួយបន្ថយ​បន្ទុករាជរដ្ឋាភិបាលមួយចំណែកធំ ។ អ្វីដែលកាន់តែពិសេស គឺចលនាប្រើផលិតផលខ្មែរជួយខ្មែរ ធ្វើឱ្យខ្សែផលិតកម្មក្នុងស្រុក និង ការចំណាយក្នុងស្រុក ( Domestic spending ) កើនឡើងទៅវិញ ។

៣. អ្វីដែលជាយុទ្ធសាស្ត្រកំណត់របស់សៀម គឺការវាយលុកកាន់តែ​ជ្រៅចូលក្នុងដីកម្ពុជានឹងធ្វើឱ្យពាក្យស្លោក «យើងជឿ​ជាក់រាជរដ្ឋា​ភិបាល និង វីរកងទ័ពយើង» នឹងរបេះបន្តិចម្តងៗរហូតរាជរដ្ឋា​ភិបាលបច្ចុប្បន្នជួបវិបត្តិ ។​
សៀមលើក​​នេះ​ចាក់ធំ តែបើចាញ់ក៏​ច្បាស់ជាចាញ់ធំដែរ ! តែយើង​ក៏ប្រយ័ត្នស្នៀតជន្លស្តាំវាយឆ្វេង បើយើងប្រហែសគាត់បែរ​ទៅសង្គ្រប់ទីតាំងមួយចំនួនហើយនៅក្រាញក្នុងឧម្មង្គទប់យើងដែលជាអ្នកឡើងវាយម្តង ៕
ដោយ៖ឯកឧត្តម ខៀវ កាញារីទ្ធ