ភ្នំពេញ៖ភ្លាមៗ បន្ទាប់ពីរដ្ឋមន្រ្តីក្រសួងការពារជាតិនៃប្រទេសទាំង​ពីរ​កម្ពុជា ថៃ បានចុះហត្ថលេខាលើ​បទឈប់បាញ់​ជា​បន្ទាន់ ឯកឧត្តម អានវ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ីនិងជាប្រធានប្តូរវេនដែល​ហៀប​នឹងបញ្ចប់​អាណត្តិបាន​បង្ហោះសារអបអរ​ចំពោះ​ដំណោះ​ស្រាយនេះ។

លើបណ្ដាញសង្គម ឯកឧត្តម អានវ៉ា អ៊ីប្រាហ៊ីម នាយករដ្ឋមន្ត្រី​ម៉ាឡេស៊ី បានសរសេរថា «ខ្ញុំសូមស្វាគមន៍​បទឈប់​បាញ់ដែលព្រម​ព្រៀងដោយកម្ពុជា និងថៃ ដែលចូលជាធរមាននៅម៉ោង ១២៖០០ថ្ងៃត្រង់ (UTC+7) ថ្ងៃទី២៧ ខែធ្នូ ឆ្នាំ២០២៥នេះ។ ការសម្រេច​ចិត្តបញ្ឈប់ ការប្រយុទ្ធគ្នានិងរក្សាកម្លាំងនៅនឹង​កន្លែងឆ្លុះបញ្ចាំងឱ្យ​ឃើញពីការទទួល​ស្គាល់រួម ដែលតម្រូវឱ្យមានការអត់ធ្មត់ជាសំខាន់ លើផលប្រយោជន៍របស់ជនស៊ីវិល។

ឯកឧត្តម អានវ៉ា អ៊ីប្រាហ៊ីម ដែលជាអ្នកសម្របសម្រួល និងប្រឹង​ប្រែងខ្នះ​ខ្នែងបញ្ចប់ជម្លោះកម្ពុជា ថៃ ចាប់តាំងពី​ការចាប់ផ្តើមដំបូង​នាថ្ងៃទី២៤ ខែកក្កដា ឆ្នាំ២០២៥ បានបង្ហាញនូវការយល់ឃើញ​របស់​លោកថា “សេចក្តីថ្លែង​ការណ៍​រួមបានកំណត់នូវវិធាន​ការជាក់​ស្តែង និងវិជ្ជមាន រួមទាំងការផ្ទៀងផ្ទាត់ដោយក្រុមអ្នកសង្កេត​ការណ៍​អាស៊ាន (AOT) និងការទំនាក់ទំនងដោយផ្ទាល់រវាងថ្នាក់ដឹកនាំ​ការពារ​ជាតិ។ ទាំងនេះផ្តល់ជាមូលដ្ឋានសម្រាប់ស្ថិរភាពហើយ​ខ្ញុំសង្ឃឹម​​ថាភាគីទាំងពីរនឹងអនុវត្តដោយស្មោះត្រង់”។

ប្រធានអាស៊ានប្តូរវេនរូបនេះបន្ថែមថា នៅពេលដែលម៉ាឡេស៊ី​ប្រគល់​ប្រធានអាស៊ានទៅហ្វីលីពីននៅ​ពាក់កណ្តាល​អធ្រាត្រថ្ងៃទី០១ ខែមករា ឆ្នាំ២០២៦ យើងនឹងគាំទ្ររាល់កិច្ចខិតខំប្រឹងប្រែងដើម្បី​ធានាថាកិច្ចការទាំងនេះ​ត្រូវបាន​ផ្តល់កិត្តិយសហើយកិត្យានុភាព និងភាពជឿជាក់របស់អាស៊ានជាតំបន់សន្តិភាពដែលត្រូវបានរក្សា។

សូមជម្រាបថា កាលពីព្រឹកថ្ងៃទី២៧ ខែធ្នូ ឆ្នាំ២០២៥ កម្ពុជា ថៃ បានឈានដល់ការរៀបចំកិច្ចប្រជុំពិសេសលើកទី៣ នៃគណៈកម្មា​ធិការ​​ព្រំដែនទូទៅកម្ពុជា-ថៃ (GBC) នៅច្រកអន្តរជាតិព្រំ-ផាកកាត ខេត្តប៉ៃលិន ប្រទេសកម្ពុជាទល់​នឹង​ខេត្តចន្ទបុរី ប្រទេសថៃ ក្រោមការ​សង្កេតការណ៍ពីក្រុមអ្នកសង្កេតការណ៍អាស៊ាន (AOT) ប្រចាំកម្ពុជា និងថៃ។​នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិនិង នាយឧត្តមសេនីយ៍ ណាត់ថាក់ផុន ណាកផានីត រដ្ឋមន្ត្រីក្រសួងការពារជាតិបាន​ឈានដល់ការចុះ​ហត្ថលេខាលើ​សេចក្តីប្រកាសរួមដែលមាន៣ចំណុច​ធំ និង១៦​ចំណុចតូច។

ក្នុងនេះភាគីទាំងពីរឯកភាពគ្នាលើបទឈប់បាញ់ជាបន្ទាន់ ក្រោយ​ការចុះហត្ថលេខាលើសេចក្តីប្រកាសរួមនេះ គិតចាប់ពី​ម៉ោង១២:០០ ថ្ងៃត្រង់(ម៉ោងក្នុងស្រុក) ថ្ងៃទី២៧ ខែធ្នូ ឆ្នាំ២០២៥ពាក់ព័ន្ធនឹង​ការ​ប្រើប្រាស់អាវុធ​គ្រប់ប្រភេទ ក្នុងគ្រប់ករណី និងនៅគ្រប់តំបន់ ដោយរាប់បញ្ចូលទាំងការវាយប្រហារលើជនស៊ីវិល គោលដៅ​និងហេដ្ឋារចនាសម្ព័ន្ធស៊ីវិល ។ស្របតាមស្មារតីនៃសេចក្ដីប្រកាសរួមទីក្រុងគូឡាឡាំពួរ ចុះថ្ងៃទី២៦ ខែតុលា ឆ្នាំ២០២៥យោធិនកម្ពុជា​ចំនួន ១៨ រូប នឹងត្រូវបញ្ជូន​ត្រឡប់មកកម្ពុជាវិញ បន្ទាប់ពីបទឈប់បាញ់ត្រូវបាន​​គោរព​​យ៉ាងពេញលេញក្នុងរយៈពេល ៧២ ម៉ោង។

ជាមួយគ្នានេះភាគីទាំងពីរឯកភាពអនុញ្ញាតឱ្យជនស៊ីវិលរស់នៅក្នុងតំបន់ព្រំដែនដែលរងផលប៉ះពាល់វិលត្រឡប់​ទៅផ្ទះសម្បែង និងប្រកប​ជីវភាពរស់នៅ​ធម្មតារបស់ពួកគេវិញ ក្នុងពេលឆាប់ៗបំផុតដោយគ្មាន​ការរារាំង និងដោយ​មានសុវត្ថិភាព និងសេចក្តីថ្លៃថ្នូរ នៅក្នុងតំបន់​រៀងៗខ្លួន៕
ដោយ៖មុនី