ភ្នំពេញ៖ព្រឹត្តិការណ៍រត់ប្រណាំងចម្ងាយឆ្ងាយអន្តរជាតិអង្គរលើកទី៩ ឆ្នាំ២០២៦( 9th Angkor Ultra-Trail 2026)នឹង​ប្រព្រឹត្ត​ទៅនៅ​ថ្ងៃទី២៤ ខែមករា ឆ្នាំ២០២៦ នៅខេត្តសៀមរាប។ក្នុងព្រឹត្តិការណ៍​នេះឯកឧត្តម បួនហ៊ីង សុធីយ៉ា អគ្គលេខាធិការ សហព័ន្ធកីឡា​តេក្វាន់ដូ ITF កម្ពុជា ដែលអ្នកផងបាន​ស្គាល់​លោកយ៉ាងច្បាស់តាម​រយៈការចូលរួមរត់យ៉ាងសកម្ម​នៅក្នុងកម្មវិធី​រត់ប្រណាំងធំៗកន្លងទៅ​ដូចជា ព្រឹត្តិការណ៍ម៉ារ៉ាតុង នោះបាន​ប្រកាសថា លោកនឹងបន្តចូល​រួមរត់ប្រណាំង​ចម្ងាយឆ្ងាយអន្តរ​ជាតិ​អង្គរលើកទី៩ ឆ្នាំ២០២៦ លើវិញ្ញាសា ១០០គីឡូម៉ែត្រ ដើម្បីបន្តរៃអង្គាសថវិកាជួយមន្ទីរពេទ្យ​កុមារ​អង្គរខេត្តសៀមរាប។

ប្រាប់បណ្ដាញព័ត៌មានAMS កាលពីព្រឹកថ្ងៃទី១០ ខែមករា ឆ្នាំ២០២៦​នេះ ឯកឧត្តម បួនហ៊ីង សុធីយ៉ា បានរំលឹកថា ព្រឹត្តិការណ៍​រត់​ប្រណាំងចម្ងាយឆ្ងាយអន្តរជាតិបានរៀបចំឡើង៨លើករួចមកហើយៗ។ឯកឧត្តមធ្លាប់បានចូលរួមរត់ប្រណាំងចំនួន៥លើកក្នុងនេះ​ធ្លាប់​រត់លើវិញ្ញាសា ៦៤គីឡូម៉ែត្រ២លើកនិងរត់១០០គីឡូម៉ែត្រចំនួន​៣​លើក ។ចំណែក​ឆ្នាំ២០២៦​នេះឯកឧត្តម​នឹងបន្ត​រត់វិញ្ញាសា១០០​គីឡូ​ម៉ែត្រម្តងទៀតជាលើកទី៤។ខណៈនេះឯកឧត្តមបានចុះឈ្មោះ​រត់​ចម្ងាយ១០០ គីឡូម៉ែត្ររួចហើយដែរ។

ចំពោះការរៃអង្គាសថវិកាជួយដល់មន្ទីរពេទ្យកុមារអង្គរខេត្តសៀមរាប ឯកឧត្តមធ្លាប់បានធ្វើឡើងចំនួន២លើករួចហើយ គឺនៅ​ឆ្នាំ២០២៤​និង​ឆ្នាំ២០២៥ ដោយប្រមូលបានថវិកាសរុបចំនួន ២០.១៦៨ ដុល្លារ​អាម៉េរិក។​ដោយឡែកឆ្នាំនេះ ឯកឧត្តម បួនហ៊ីង សុធីយ៉ា មិនរំពឹង​ខ្ពស់ពេកទេ ពីព្រោះសប្បុរសនិងអ្នកចូលរួមត្រូវជួយទៅច្រើនទិសដៅ ដូចជាជួយដល់វីរកងទ័ពជួរមុខ និងប្រជា​ពលរដ្ឋភៀសសឹកជាដើម។ ដូច្នេះការបរិច្ចាគថវិការបស់បងប្អូនក្នុងក្រុម KKRC ប្រហែលមិនអាច​លើស ឬប្រហាក់​ប្រហែល​នឹងឆ្នាំ២០២៥កន្លងទៅនោះទេ ប៉ុន្តែប្រសិន​បើបានប្រហាក់ប្រហែលនឹងឆ្នាំមុន ក៏ល្អដែរ ដើម្បីបន្តបេសកកម្មជួយ​ទ្រទ្រង់ដល់​មន្ទីរពេទ្យកុមារអង្គរ សម្រាប់ការព្យាបាលកុមារកម្ពុជា។

ទាក់ទងនឹងការចូលរួមបរិច្ចាគវិញ សប្បុរសជនអាចចូលផ្ទាល់​តាមរយៈ​លោកបានចាប់ពីថ្ងៃនេះតទៅ។ថវិកាបរិច្ចាគទទួល​បាន​ពីសប្បុរសជន ឯកឧត្តមនឹងយកទៅជូនមន្ទីរពេទ្យកុមារអង្គរ ខេត្តសៀមរាប។

គួរជម្រាបថា ព្រឹត្តិការណ៍រត់ប្រណាំងចម្ងាយឆ្ងាយ Angkor Ultra-Trail លើកទី៩ ឆ្នាំ២០២៦ មានវិញ្ញាសារត់ប្រណាំងចំនួន ៨ រួមមាន៖ ១០០ គីឡូម៉ែត្រ ,៦៤គីឡូម៉ែត្រ ,៤២គីឡូម៉ែត្រ ,៣២គីឡូម៉ែត្រ ,១៨គីឡូម៉ែត្រមាន ៣ ប្រភេទ និង ៨គីឡូម៉ែត្រ ។ព្រឹត្តិការណ៍នេះ​រៀបចំដោយក្រុមហ៊ុនទេសចរណ៍ Phoenix Voyages ក្រោមកិច្ច​សហការជាមួយ​គណៈកម្មាធិការ​ជាតិអូឡាំពិកកម្ពុជា អាជ្ញាធរជាតិ​អប្សរា រដ្ឋបាលខេត្តសៀមរាប និងដៃគូឧបត្ថម្ភជាច្រើនទៀត។

ព្រឹត្តិការណ៍ឆ្នាំនេះគណៈកម្មការរៀបចំកម្មវិធីរំពឹងថា មានអ្នកចូលរួម​ប្រហាក់ប្រហែលនឹងឆ្នាំ២០២៤ គឺប្រមាណ​ជា១.៧០០​នាក់ ​ខណៈការ​ចុះឈ្មោះប្រកាសក្នុងសន្និសីទកាសែតកាលពីថ្ងៃទី៦ ខែមករា ឆ្នាំ២០២៦ មានអ្នកចុះឈ្មោះចំនួន​១.២២៩​នាក់​រួចហើយ ក្នុងនោះ​កម្ពុជា​ឈរនៅលេខ១ ដោយមាន៥០០នាក់ ,លេខ២ បារាំង ជាង ៤០០នាក់ និងលេខ៣ វៀតណាម៕
ដោយ៖ជាវ ចន្ធូ