មន្ត្រីជាន់ខ្ពស់ក្រសួងព័ត៌មាន ជំរុញការធ្វើបរិវត្តកម្មប្រព័ន្ធផ្សព្វផ្សាយដើម្បីឆ្លើយតបយុគសម័យឌីជីថល
ភ្នំពេញ៖ ក្នុងបទអន្តរាគមន៍ស្តីពី «វឌ្ឍនភាពការងារនីតិកម្ម និងបរិវត្តកម្មនៃប្រព័ន្ធផ្សព្វផ្សាយឌីជីថលវិស័យព័ត៌មាន និងសោតទស្សន៍» កាលពីថ្ងៃអង្គារទី២០ ខែមករា ឆ្នាំ២០២៦ ឯកឧត្តម ហួត ឃាងវេង រដ្ឋលេខាធិការក្រសួងព័ត៌មានបានគូសរំលេចថា ក្នុងបរិបទដែលបច្ចេកវិទ្យាសកលកំពុងអភិវឌ្ឍ និងផ្លាស់ប្តូរយ៉ាងឆាប់រហ័ស ប្រព័ន្ធផ្សព្វផ្សាយបានក្លាយជាឧបករណ៍សំខាន់មួយក្នុងការផ្សព្វផ្សាយព័ត៌មាន និងភ្ជាប់ទំនាក់ទំនងរវាងរដ្ឋាភិបាល ក្រសួងស្ថាប័ន វិស័យឯកជន និងប្រជាពលរដ្ឋ។ ដើម្បីឆ្លើយតបទៅនឹងតម្រូវការនៃយុគសម័យឌីជីថល បច្ចេកវិទ្យាប្រព័ន្ធផ្សព្វផ្សាយត្រូវការការធ្វើបច្ចុប្បន្នភាព និងទំនើបកម្មជាបន្តបន្ទាប់ ដើម្បីធានាឱ្យប្រជាពលរដ្ឋអាចទទួលបានព័ត៌មានបានឆាប់រហ័ស ត្រឹមត្រូវ និងគ្រប់ទីកន្លែង។
ក្នុងបទអន្តរាគមន៍ដែលបានធ្វើឡើងនៅក្នុងសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦របស់ក្រសួងព័ត៌មាន ឯកឧត្តម ហួត ឃាងវេង បានទាញអារម្មណ៍អ្នកចូលរួមដែលសុទ្ធសឹងជាមន្រ្តីព័ត៌មានថា ការធ្វើទំនើបកម្មប្រព័ន្ធផ្សព្វផ្សាយ គឺជាកត្តាចម្បងមួយក្នុងការពង្រឹងប្រសិទ្ធភាពការផ្សព្វផ្សាយព័ត៌មាន និងការបម្រើប្រជាពលរដ្ឋ ឱ្យសមស្របនឹងបរិបទសង្គមទំនើប។
ការអភិវឌ្ឍប្រព័ន្ធផ្សព្វផ្សាយឌីជីថល មិនត្រឹមតែជួយបង្កើនភាពងាយស្រួលក្នុងការទទួលបានព័ត៌មានប៉ុណ្ណោះទេ ប៉ុន្តែថែមទាំងជួយលើកកម្ពស់គុណភាពមាតិកាព័ត៌មាន និងកម្សាន្តឱ្យស្របតាមការផ្លាស់ប្តូររបៀបរស់នៅ និងទម្លាប់ប្រើប្រាស់បច្ចេកវិទ្យារបស់ប្រជាពលរដ្ឋជាពិសេសយុវជន។ឯកឧត្តមរដ្ឋលេខាធិការបញ្ជាក់បន្ថែម។
ទន្ទឹមនេះ ឯកឧត្តម ហួត ឃាងវេង បានផ្តោតសំខាន់លើការធានាឱ្យសាធារណជនទទួលបានព័ត៌មានពិតប្រាកដ មានប្រភពច្បាស់លាស់ និងមានគុណភាពខ្ពស់ ខណៈដែលបញ្ហាព័ត៌មានក្លែងក្លាយ និងព័ត៌មានបំភាន់ កំពុងរីករាលដាលយ៉ាងទូលំទូលាយតាមបណ្តាញសង្គម និងវេទិកាឌីជីថលផ្សេងៗ។ឯកឧត្តមបានបញ្ជាក់ថា ការគ្រប់គ្រង និងទប់ស្កាត់ព័ត៌មានក្លែងក្លាយ គឺជាការងារចាំបាច់ និងទាមទារការចូលរួមពីគ្រប់ភាគីពាក់ព័ន្ធ។
តើអ្វីក្រសួងព័ត៌មានបានធ្វើអ្វីខ្លះក្នុងបរិបទបែបនេះ?ឯកឧត្តមរដ្ឋលេខាធិការបានអធិប្បាយថាដើម្បីឆ្លើយតបនឹងបញ្ហាប្រឈមទាំងនេះ ក្រសួងព័ត៌មានកំពុងអនុវត្ត និងអភិវឌ្ឍប្រព័ន្ធគ្រប់គ្រងការផ្សាយមាតិកា និងពាណិជ្ជកម្មឌីជីថល ព្រមទាំងការកសាងប្រព័ន្ធផ្សព្វផ្សាយបែបថ្មី ដែលស្ថិតក្រោមការគ្រប់គ្រងរបស់រដ្ឋ ដើម្បីធានាបាននូវប្រសិទ្ធភាព តម្លាភាព និងការទុកចិត្តពីសាធារណជន។លើសពីនេះការពង្រឹងសមត្ថភាពធនធានមនុស្សក្នុងវិស័យព័ត៌មាន និងសោតទស្សន៍ ក៏ត្រូវបានចាត់ទុកថា ជាផ្នែកមួយដ៏សំខាន់នៃការធ្វើបរិវត្តកម្មឌីជីថលផងដែរ។
ឯកឧត្តមបានសង្កត់ធ្ងន់ថា ការធ្វើបរិវត្តកម្មប្រព័ន្ធផ្សព្វផ្សាយឌីជីថលនេះ ត្រូវបានចាត់ទុកថា ជាជំហានយុទ្ធសាស្ត្រសំខាន់ ក្នុងការលើកកម្ពស់វិស័យព័ត៌មាន និងសោតទស្សន៍ឱ្យមានភាពទំនើបស្របតាមការរីកចម្រើននៃបច្ចេកវិទ្យាសកល និងរួមចំណែកជំរុញការអភិវឌ្ឍសង្គម និងសេដ្ឋកិច្ចជាតិឱ្យកាន់តែប្រកបដោយចីរភាព៕
ដោយ៖ម៉ាដេប៉ូ
