ហ្សាកាតា ៖ ស្ងាត់ៗ នាវាចម្បាំង ជាមួយនឹងកប៉ាល់មុជទឹករបស់រុស្ស៊ី ធ្វើដំណើរទៅកាន់កំពង់ផែTanjung Priok ស្ថិតក្នុងទីក្រុង Jakarta របស់ប្រទេសឥណ្ឌូនេស៊ី កាលពីថ្ងៃអង្គារ។

ឯកអគ្គរដ្ឋទូតរុស្ស៊ី ប្រចាំឥណ្ឌូនេស៊ី លោក Sergei Tolchenov ចាត់ទុកវត្តមាន នៃនាវាទាំងនេះថា ជាសារនៃភាពជាដៃគូ និង ការត្រៀមខ្លួន សម្រាប់កិច្ចសហប្រតិបត្តិការ ។

ថ្លែងទៅកាន់សារព័ត៌មាន នៅឯកំពង់ផែ​, លោក Tolchenov បានបន្ថែមថា «សូមបង្ហាញ ដល់កងទ័ពជើងទឹក ឥណ្ឌូណេស៊ី ដល់ពលរដ្ឋ នៃ ប្រទេសឥណ្ឌូនេស៊ី ថា នេះ ពិតជាគំរូទំនើប នៃសម្ភារៈយោធា និងនាវាចម្បាំង»។

យោងតាមស្ថានទូតរុស្ស៊ី នៅទីក្រុងហ្សាកាតា បានចេញផ្សាយបន្ថែមថា នាវាទាំងនោះ រួមមាន Gromkiy, នាវាមុជទឹក Petropavlovsk-Kamchatsky និង នាវាមុជទឹក Andrey Stepanov។

សេចក្តីថ្លែងការណ៍ សង្កត់ធ្ងន់ លើទំនាក់ទំនងសហប្រតិបត្តិការ ដ៏ជិតស្និទ្ធ និងយូរអង្វែង នៅក្នុងវិស័យកងទ័ពជើងទឹក។ គេក៏បានគូសបញ្ជាក់ផងដែរនូវ ​ការប្តេជ្ញាចិត្តរួមគ្នា ដើម្បីបន្តពង្រឹងទំនាក់ទំនង ដើម្បីរក្សាសន្តិភាព និងស្ថិរភាពនៅក្នុងតំបន់អាស៊ីប៉ាស៊ីហ្វិក​។ ក្នុងរយៈពេលប៉ុន្មានថ្ងៃ ខាងមុខនេះ កប៉ាល់ទាំងនេះ នឹងធ្វើការហ្វឹកហាត់រួមគ្នា ក្នុងការធ្វើសមយុទ្ធ និង ទំនាក់ទំនង។

ទីក្រុង ហ្សាកាតា ដែលតែងតែការពារជំហរការទូត មិនចូលបក្សសម្ព័ន្ធរបស់ខ្លួន កាលពីឆ្នាំមុន ស្រាប់តែបានចូលរួម ជាមួយប្លុក BRICS នៃសេដ្ឋកិច្ចកំពុងរីកចម្រើន ដែលរួមមាន ទាំង រុស្ស៊ី និង ចិន៕

ប្រភពពី AFP ប្រែសម្រួល ៖ សារ៉ាត