អាជ្ញាធរជាតិអប្សរា បានដាក់កំហិតថា ចាប់ពីថ្ងៃទី១៣ ខែកក្កដា ឆ្នាំ២០២៦តទៅ ចំពោះសម្លៀកបំពាក់បុរាណដែលច្នៃខុសពីទម្រង់ដើមនៃបែបផែនខ្មែរ គ្មានក្បួនខ្នាតត្រឹមត្រូវ ឬប្រាសចាកពីទម្រង់ដើម គឺមិនអនុញ្ញាតឱ្យចូលទៅទស្សនាតំបន់អង្គរទៀតឡើយ។ នេះបើយោងតាមទទំព័រហ្វសប៊ុករបស់អាជ្ញាធរជាតិអប្សរានៅថ្ងៃទី១៤ ខែកក្កដា ឆ្នាំ២០២៦។
 
មន្រ្តីអាជ្ញាធរជាតិអប្ស​រា សហការជាមួយមន្ទីរវប្បធម៌ និងវិចិត្រសិល្បៈខេត្តសៀមរាប អាជ្ញាធរដែនដី និងប៉ូលិសការពារបេតិកភណ្ឌ បានចុះជួបសំ​ណេះសំណាលជាមួយក្រុមអាជីវករដែលបម្រើសេវាកម្មជួលសម្លៀកបំពាក់បែបបុរាណខ្មែរឱ្យភ្ញៀវទេសចរ កាលពីថ្ងៃទី១៣ ខែកក្កដា ឆ្នាំ២០២៦។
 
គោលបំណងនៃពិធីជួបសំ​ណេះសំណាលនេះ គឺដើម្បីណែនាំដល់អាជីវករឲ្យយល់ដឹងពីរចនាបថ និងក្បួនខ្នាតសម្លៀកបំពាក់បុរាណខ្មែរ និងជៀសវាងការប្រើប្រាស់សម្លៀកបំពាក់ ឬគ្រឿងតុបតែងដែលបម្រើឲ្យវប្បធម៌បរទេស និងអាចប៉ះពាល់ដល់អត្តសញ្ញាណវប្បធម៌ជាតិ។
 
លោក ចាន់ សោភ័ន មន្ត្រីជំនាញផ្នែកសិល្បៈបុរាណខ្មែរនៃមន្ទីរវប្បធម៌ និងវិចិត្រសិល្បៈខេត្តសៀមរាប សង្កេតឃើញថា បច្ចុប្បន្នសម្លៀកបំពាក់បុរាណប្រហែល ៧០% ដែលអាជីវករជួលនៅមុខប្រាសាទអង្គរវត្ត មានការកែច្នៃខុសពីទម្រង់ដើម។ ជាពិសេស ឈុតបុរាណទាំងនេះប្រើកំណាត់ និងគ្រឿងអលង្ការ នាំចូលពីថៃ ដែលលោកចាត់ទុកថាមិនស្របតាមប្រពៃណីខ្មែរ។
 
លោក ចាន់ សោភ័ន ពន្យល់ថា ការស្លៀកពាក់តាមបែបបុរាណខ្មែរ គឺត្រូវតែប្រើកំណាត់និងគ្រឿងអលង្កា​រ​របស់ខ្មែរ មានទម្រង់ច្បាស់លាស់ទៅតាមឋានៈ យសសក្ដិ រាប់ចាប់ពីព្រះមហាក្សត្រដល់រាស្រ្តសាមញ្ញ។ លោកបានលើកជាឧទាហរណ៍ថា សម្លៀកបំពាក់ហូលដែលធ្វើពីសូត្រ គឺសម្រាប់ព្រះមហាក្សត្រ ម្ចាស់ក្សត្រី រីឯកំណាត់ល្បើក និងលើ្បកជ័រជើង សម្រាប់ឋានៈសេដ្ឋី គហបតី ហើយកំណាត់ត្បាញពីកប្បាស សម្រាប់មនុស្សសាមញ្ញ។
 
លោក ទេស សុធីរ អនុប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌ នៃអាជ្ញាធរជាតិអប្សរា បានលើកឡើងថា ការប្រើប្រាស់សម្លៀកបំពាក់បុរាណមិនត្រឹមត្រូវ បានរងការរិះគន់ជាបន្តបន្ទាប់ និងប៉ះពាល់ដល់តម្លៃវប្បធម៌ខ្មែរ។ លោកបានអំពាវនាវឲ្យអាជីវករកាត់បន្ថយ និងឈានទៅបញ្ឈប់ការប្រើកំណាត់​នាំចូលពីបរទេស ជាពិសេសកំណាត់ដែលនាំចូលពីប្រទេសថៃ។
អាជ្ញាធរជាតិអប្សរាបញ្ជាក់ថា ការប្រើប្រាស់សម្លៀកបំពាក់ឈុតបុរាណ ដែលប្រើប្រាស់កំណាត់មកពីថៃ ត្រូវបញ្ចប់ជាស្ថាពរនៅតំបន់អង្គរ ត្រឹមខែមករា ឆ្នាំ២០២៧ខាងមុខ៕

សេង បារាំង AMS