ក្រសួងកសិកម្ម គ្រោងរៀបចំវេទិកា និងពិព័រណ៍កសិកម្មកម្ពុជា ឆ្នាំ២០២៦ រយៈពេល ៣ថ្ងៃ ដើម្បីទាក់ទាញការវិនិយោគ និងជំរុញបច្ចេកវិទ្យាក្នុងវិស័យកសិកម្មនៅកម្ពុជា។

ក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមសហការពីក្រសួង ស្ថាប័នពាក់ព័ន្ធ អង្គការស្បៀង និងកសិកម្មនៃសហប្រជាជាតិ (FAO) ដៃគូអភិវឌ្ឍន៍ និងវិស័យឯកជននានា គ្រោងរៀបចំវេទិកា និងពិព័រណ៍កសិកម្មកម្ពុជាឆ្នាំ២០២៦ ហៅកាត់ថា (កាហ្វេ២៦ – CAFE26) រយៈពេល ៣ថ្ងៃ ចាប់ពីថ្ងៃទី២៣ ដល់ថ្ងៃទី២៥ ខែតុលា ឆ្នាំ២០២៦ នៅមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ ដោយមានការប្រមូលផ្តុំគ្រប់តួអង្គក្នុងខ្សែច្រវាក់តម្លៃកសិកម្ម ដើម្បីបង្កើតឱកាសពាណិជ្ជកម្ម និងកិច្ចសហការវិនិយោគជាក់ស្តែង ។

ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានប្រាប់អ្នកសារព័ត៌មាន នៅថ្ងៃទី១ ខែតុលា ឆ្នាំ២០២៦ ថា ព្រឹត្តិការណ៍ CAFE26 នឹងលើកយកដំណាំយុទ្ធសាស្ត្រ ៩មុខ អមជាមួយឱកាសថ្មីបន្ថែមលើការវិនិយោគទៅលើដំណាំឧស្សាហកម្ម ដូចជា កៅស៊ូ និងការជំរុញផលិតកម្មជីក្នុងស្រុកជាដើម ។

ឯកឧត្តម ប្រាក់ ដាវីដ បានបន្ថែមថា យោងលើភាពជោគជ័យនៃការរៀបចំលើកទី១ នៃព្រឹត្តិការណ៍ CAFE25 វេទិកានិងពិព័រណ៍កសិកម្មកម្ពុជាឆ្នាំ២០២៦នឹងរួមបញ្ចូលវេទិកាវិនិយោគកសិកម្មរយៈពេល ២ថ្ងៃ នៅថ្ងៃទី២៣-២៤ ខែតុលា, វេទិកានវានុវត្តន៍សម្រាប់យុវជន និងវេទិកាចែករំលែកចំណេះដឹងសម្រាប់សហគមន៍កសិកម្ម នៅថ្ងៃទី២៥ ខែតុលា និងពិព័រណ៍កសិកម្មរយៈពេល ៣ថ្ងៃ ចាប់ពីថ្ងៃទី២៣-២៥ ខែតុលា។ ព្រឹត្តិការណ៍នេះ រំពឹងថា នឹងមានស្តង់ពិព័រណ៍ជាង ៤០០កន្លែង ហើយទាក់ទាញអ្នកចូលរួមទស្សនាប្រមាណ ២៥ ០០០នាក់ និងកសិករជាង ២ ០០០នាក់ ។

បើតាមឯកឧត្តមដរដ្ឋលេខាធិការក្រសួងកសិកម្ម ព្រឹត្តិការណ៍នេះក៏មានការចូលរួមពីថ្នាក់ដឹកនាំរាជរដ្ឋាភិបាល និងសហគមន៍កសិកម្ម ធុរជន វិនិយោគិនជាតិ និងអន្តរជាតិ ស្ថាប័នហិរញ្ញវត្ថុ អ្នកនវានុវត្តន៍ យុវជន ដៃគូអភិវឌ្ឍន៍ និងតួអង្គពាក់ព័ន្ធនានាទាំងក្នុង និងក្រៅប្រទេស ។

សូមបញ្ជាក់ថា វេទិកា និងពិព័រណ៍កសិកម្មកម្ពុជា គឺជាព្រឹត្តិការណ៍ក្នុងវិស័យ កសិស្បៀងអាហារ ដែលមានទំហំ និងវិសាលភាពធំបំផុតមួយនៅព្រះរាជាណាចក្រកម្ពុជា។ លក្ខណៈពិសេសរបស់ CAFE គឺការប្រមូលផ្តុំគ្រប់តួអង្គទាំងអស់ក្នុងប្រព័ន្ធអេកូឡូស៊ីកសិស្បៀងអាហារទាំងមូល មកជួបជុំគ្នានៅលើថ្នាលតែមួយ ។

 CAFE រួមបញ្ចូលកិច្ចសន្ទនា គោលនយោបាយ ការជំរុញវិនិយោគ ការផ្គូផ្គងអាជីវកម្ម ការបង្ហាញ និងសាកល្បងបច្ចេកវិទ្យា ការផ្លាស់ប្តូរចំណេះដឹង និង ពិព័រណ៍កសិកម្មទ្រង់ទ្រាយធំ ដើម្បីឱ្យអ្នកចូលរួមពិភាក្សាអំពីបញ្ហាប្រឈម ឱកាស និងការតភ្ជាប់ទំនាក់ទំនងដោយ ផ្ទាល់ ក៏ដូចជាស្វែងរកដំណោះស្រាយ និងបង្កើតភាពជាដៃគូអាជីវកម្ម និងវិនិយោគជាក់ស្តែង ៕
អត្ថបទ៖ វណ្ណលុក
រូប៖ រិន រចនា