លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានលើកឡើងថា អតីតនិស្សិតនៃសាកលវិទ្យាល័យ វិទ្យាសាស្ត្រសុខាភិបាល (ស.វ.ស) ជាច្រើនរូប បាននិង កំពុងបំពេញបេសកកម្មយ៉ាងសកម្មនៅតាមមន្ទីរពេទ្យ និងស្ថាប័នសុខាភិបាលនានានៅទូទាំងប្រទេស ដោយ បានចូលរួមចំណែកយ៉ាងសំខាន់ក្នុងការជួយសង្គ្រោះជីវិត និងលើកកម្ពស់សុខុមាលភាពប្រជាពលរដ្ឋគ្រប់ទិសទី ដើម្បីធានាថា «គ្មានប្រជាពលរដ្ឋណាម្នាក់ត្រូវបានមើល រំលងឡើយ»។

លោកជំទាវបណ្ឌិត ពេជ ចន្ទមុន្នី លើកឡើងបែប នេះកាលពីព្រឹកថ្ងៃទី ៦ ខែតុលា ឆ្នាំ ២០២៦ ក្នុងឱកាស លោកជំទាវ អញ្ជើញ​ជាអធិបតីភាពក្នុងពិធីបើក សន្និសីទ វិទ្យាសាស្ត្រ ដើម្បីអបអរសាទរខួប ៨០ ឆ្នាំ នៃការបង្កើត សាកលវិទ្យាល័យវិទ្យាសាស្ត្រសុខាភិបាល។

ជាមួយនឹងការរំលេចខាងលើលោកជំទាវបណ្ឌិត ក៏បានការកោតសរសើរ និងវាយតម្លៃខ្ពស់ ចំពោះ ថ្នាក់ ដឹកនាំ សាស្ត្រាចារ្យ និងបុគ្គលិក ស.វ.ស គ្រប់ជំនាន់ ដែលបានខិតខំកសាង និងថែរក្សាកេរ្តិ៍ឈ្មោះស្ថាប័នមួយ នេះឱ្យក្លាយជាគ្រឹះស្ថានឧត្តមសិក្សាឈានមុខក្នុងការបណ្តុះបណ្តាលធនធានមនុស្សវិស័យសុខាភិបាលជូនជាតិ។ លោកជំទាវបណ្ឌិត បានបន្ថែមថា សុខភាពប្រជាជន ជាទ្រព្យធនដ៏សំខាន់របស់ជាតិ ហើយការលើកកម្ពស់ វិស័យសុខាភិបាល ក៏ជាអាទិភាពស្នូលនៅក្នុង យុទ្ធសាស្ត្របញ្ចកោណ ដំណាក់កាលទី ១ របស់រាជរដ្ឋា ភិបាលផងដែរ។

ក្នុងសន្និសីទដដែលលោកជំទាវបណ្ឌិត ពេជ ចន្ទមុន្នី បានផ្តល់អនុសាសន៍គន្លឹះសំខាន់ៗមួយចំនួន ក្នុងនេះ៖ ត្រូវបន្តពង្រឹងគុណភាពអប់រំ និងការបណ្តុះបណ្តាល ចំណេះ-ជំនាញ អមដោយក្រមសីលធម៌វិជ្ជាជីវៈខ្ពស់ ,ជំរុញសមត្ថភាពសិក្សាស្រាវជ្រាវ និងនវានុវត្តន៍ ដោយបង្កើន​កិច្ចសហប្រតិបត្តិការជាមួយដៃគូក្នុង និងក្រៅប្រទេស ,និស្សិតទាំងអស់ត្រូវខិតខំអភិវឌ្ឍខ្លួន ឱ្យទាន់ការវិវត្តនៃបច្ចេកវិទ្យា និងចងចាំថា វិជ្ជាជីវៈ សុខាភិបាលទាមទារនូវការទទួលខុសត្រូវខ្ពស់បំផុតនិងស្នើឱ្យអតីតនិស្សិតជួយគាំទ្រដល់សាកលវិទ្យាល័យវិញ តាមរយៈការចែក​រំលែកបទពិសោធន៍ និងការបណ្តុះ បណ្តាល ដល់អ្នកជំនាន់ក្រោយ ។

លោកជំទាវបណ្ឌិត បានសម្តែងនូវក្តីសង្ឃឹមយ៉ាងមុតមាំ ថា សាកលវិទ្យាល័យវិទ្យាសាស្ត្រសុខាភិបាល នឹងបន្ត ដំណើរឆ្ពោះទៅរកឧត្តមភាព នវានុវត្តន៍ ប្រកបដោយ គុណធម៌ សុច្ចរិតភាព និងស្មារតីបម្រើជាតិយ៉ាងពិត ប្រាកដនាពេលអនាគត៕

ដោយ៖វណ្ណលុក