ភ្នំពេញ៖កម្ពុជាបានប្រារព្ធទិវាស្តង់ដាពិភពលោក ឆ្នាំ២០២៦ ក្រោមប្រធានបទ «ចក្ខុវិស័យរួមសម្រាប់ពិភពលោកប្រសើរជាងមុន៖ គោលដៅ អភិវឌ្ឍន៍ប្រកបដោយចីរភាពទី៧  ថាមពលស្អាត និងទ្រទ្រង់បាន»។ការរៀបចំពិធីនេះឡើងដើម្បីបង្ហាញការគាំទ្រគោលដៅថាមពលស្អាត និងទ្រទ្រង់បានសម្រាប់មនុស្សគ្រប់រូប។
​  
ថ្លែងក្នុងពិធីបើកទិវាស្តង់ដាពិភពលោក ឆ្នាំ២០២៦ ឯកឧត្តមរដ្ឋមន្ត្រី ហែម វណ្ណឌី ប្រធានក្រុមប្រឹក្សាស្តង់ដាជាតិ បានលើកឡើងថា៖ “យើងត្រូវបង្វែរការអបអរសាទរទិវាស្តង់ដាពិភពលោកឆ្នាំ២០២៦ នេះ ឱ្យទៅជាកម្លាំងចលករ និងយុទ្ធសាស្ត្រមួយ ក្នុងការពង្រឹង​ប្រព័ន្ធ​ផលិតកម្ម និងអាជីវកម្ម ព្រមទាំងលើកកម្ពស់គុណភាព និងសុវត្ថិភាពនៃផលិតផល និងសេវាកម្មរបស់យើងឱ្យឆ្លើយ​តបទៅនឹង​តម្រូវការ​ទីផ្សារ ជាពិសេសទីផ្សារនាំចេញដែលកម្ពុជាមានសក្តានុពលក្នុងការពង្រីក និងចូលរួមប្រកួតប្រជែង”។
 
ឯកឧត្តមបានរំលេចថា គោលដៅអភិវឌ្ឍន៍ប្រកបដោយចីរភាពទី៧ ផ្តោតលើការធានាឱ្យមនុស្សគ្រប់រូបទទួលបានថាមពលដែលមាន​តម្លៃ​សមរម្យ អាចទុកចិត្តបាន មានចីរភាព និងទំនើប ការបង្កើនចំណែកថាមពលកកើតឡើងវិញ និងការបង្កើនប្រសិទ្ធភាពថាមពលជាសកល​ទ្វេដងត្រឹមឆ្នាំ២០៣០។
 
អង្គការស្តង់ដាអន្តរជាតិ រួមមាន ISO, IEC និង ITU បានគាំទ្រគោលដៅនេះតាមរយៈស្តង់ដាសម្រាប់ការគ្រប់គ្រងថាមពល សុវត្ថិភាព​បរិក្ខារ និងបច្ចេកវិទ្យាប្រកបដោយប្រសិទ្ធភាពថាមពល។ ស្តង់ដាទាំងនេះកំណត់លក្ខខណ្ឌបច្ចេកទេសសម្រាប់បរិក្ខារ ដូចជាបន្ទះសូឡា ប្រព័ន្ធផ្ទុកថាមពលដោយថ្ម និងឧបករណ៍សាកយានយន្តអគ្គិសនី ព្រមទាំងជួយរោងចក្រ និងសហគ្រាសកាត់បន្ថយការខ្ជះខ្ជាយ​ថាមពល​ក្នុងផលិតកម្ម។
 
ឯកឧត្តមរដ្ឋមន្ត្រី ហែម វណ្ណឌី បានបន្ថែមថា៖ “ដើម្បីសម្រេចឱ្យបាននូវគោលដៅទាំងនេះ ការពង្រឹងប្រព័ន្ធហេដ្ឋារចនាសម្ព័ន្ធគុណភាពជាតិ (NQI) គឺជាកិច្ចការចាំបាច់បំផុត។”ហេដ្ឋារចនាសម្ព័ន្ធគុណភាពជាតិរួមមានស្តង់ដារូបនីយកម្ម មាត្រាសាស្ត្រ ការវាយតម្លៃទទួលស្គាល់ និងការធ្វើតេស្តពិសោធន៍ ជួយឱ្យផលិតករ និងសេវាករ បំពេញតាមលក្ខខណ្ឌតម្រូវរបស់ទីផ្សារ និងបង្កើនទំនុកចិត្តលើផលិតផល និងសេវាកម្ម​របស់កម្ពុជា។
 
បើតាមការបញ្ជាក់ពី ឯកឧត្តម ចាន់ សូផា អគ្គនាយកវិទ្យាស្ថានស្តង់ដាកម្ពុជាឱ្យដឹងដែរថា កម្ពុជាបានចាប់ផ្តើមអភិវឌ្ឍស្តង់ដា​ជាតិនៅចុង​ឆ្នាំ១៩៩៩ និងបានដាក់ចេញស្តង់ដាជាតិដំបូងស្តីពីស្លាកសញ្ញាផលិតផលនៅឆ្នាំ២០០០។ ក្នុងឆ្នាំ២០២៦ ស្តង់ដាកម្ពុជាចំនួន ១០៦ ត្រូវបានអនុម័តហើយរហូតមកដល់ពេលនេះកម្ពុជាមានស្តង់ដាជាតិចំនួន ១.៣០៩ រួមទាំងស្តង់ដារពាក់ព័ន្ធនឹងថាមពលអគ្គិសនី។

 ដោយ៖ង៉ាន់ ទិត្យ
រូបភាព៖រិន រចនា