រយៈពេល៩ខែ អគ្គនាយកដ្ឋានអន្តោប្រវេសន៍បង្ក្រាបបទល្មើសឆ្លងដែនជិត ៣ពាន់ករណី
អគ្គនាយកដ្ឋានអន្តោប្រវេសន៍ បានជួយសម្រួលបែបបទជូនពលរដ្ឋចេញទៅធ្វើការស្របច្បាប់ជាង ៥ពាន់នាក់ និងរឹតបន្តឹងបង្ក្រាបបទល្មើសឆ្លងដែនជិត៣ពាន់លើក ក្នុងរយៈពេល ៩ខែ ឆ្នាំ២០២៦។
ក្នុងរយៈពេល៩ខែ អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ បានសម្រួលបែបបទជូនប្រជាពលរដ្ឋខ្មែរជាង ៥ ៤០០នាក់ ចេញទៅធ្វើការនៅក្រៅប្រទេសដោយស្របច្បាប់ ព្រមទាំងបានបង្កើនការរឹតបន្តឹងសន្តិសុខនៅតាមច្រកទ្វារព្រំដែន ដោយបង្ក្រាបបទល្មើសចេញ-ចូលប្រទេសបានជិត ៣ ពាន់លើក ទប់ស្កាត់ការជួញដូរមនុស្ស និងបញ្ជូនជនសង្ស័យទៅតុលាការជាបន្តបន្ទាប់។
ជាមួយគ្នានោះសមត្ថកិច្ចក៏បានទទួលពលរដ្ឋខ្មែរដែលអាជ្ញាធរបរទេសបញ្ជូនត្រឡប់មកវិញសរុប ៥.៥៦៨នាក់ ក្នុងនោះមកពីប្រទេសថៃច្រើនជាងគេរហូតដល់ ៤.៤៧៧នាក់ ។ក្រៅពីនេះមានម៉ាឡេស៊ី ចិន កូរ៉េខាងត្បូង សហរដ្ឋអាម៉េរិក វៀតណាម សិង្ហបុរី ជប៉ុន ហ្វីលីពីន ឡាវ និងកាណាដា។ទន្ទឹមនេះមន្ត្រីអន្តោប្រវេសន៍បានទប់ស្កាត់ពលរដ្ឋ ២១៨នាក់ មិនឱ្យចាកចេញពីប្រទេសដោយសង្ស័យពាក់ព័ន្ធនឹងអំពើជួញដូរមនុស្ស។
ស្របពេលជាមួយគ្នានេះ ក្នុងការងារត្រួតពិនិត្យបទល្មើសចេញ-ចូលប្រទេស សមត្ថកិច្ចបានរកឃើញបទល្មើសសរុបជិត ៣ពាន់លើក មានមនុស្ស ៥.២៦២នាក់ ស្មើនឹង ៩៣សញ្ជាតិ។ ចំពោះបទល្មើសចូលប្រទេស មាន ២.២៨៧លើក ស្មើនឹងចំនួនមនុស្ស ៤.២៧១នាក់ ដោយសមត្ថកិច្ចបានឃាត់ខ្លួនបញ្ជូនទៅតុលាការ ១០៣នាក់ និងបដិសេធមិនឱ្យចូលដោយបញ្ជូនត្រឡប់ទៅវិញ ៤.១៦៨នាក់ ដោយសារមានឈ្មោះក្នុងបញ្ជីមុខសញ្ញា ប្រើប្រាស់លិខិតឆ្លងដែន ឬស្ទីកគ័រក្លែងក្លាយ និងគ្មានគោលបំណងច្បាស់លាស់។
ដោយឡែកបទល្មើសពាក់ព័ន្ធនឹងការឆ្លងដែនខុសច្បាប់ចេញពីប្រទេស មាន ៦៣៤លើក ដែលមានមនុស្ស ៩៩១នាក់ ដោយមន្ត្រីអន្តោប្រវេសន៍បានឃាត់ខ្លួនបញ្ជូនទៅតុលាការ ២៧០នាក់ និងបានជួយសង្គ្រោះជនរងគ្រោះ ៧២១នាក់ ឱ្យត្រឡប់ទៅលំនៅឋានវិញ។
បច្ចុប្បន្នអគ្គនាយកដ្ឋានអន្តោប្រវេសន៍បានដាក់ឱ្យដំណើរការប្រព័ន្ធបច្ចេកវិទ្យាទំនើបៗ រួមមានប្រព័ន្ធ Cambodia e-Arrival និង Cambodia v-Pass នៅតាមអាកាសយានដ្ឋានអន្តរជាតិទាំង៣ ព្រមទាំងប្រព័ន្ធ CBMS និង TMS នៅតាមប៉ុស្តិ៍ច្រកទ្វារអន្តរជាតិ ដើម្បីចាប់យកទិន្នន័យលិខិតឆ្លងដែន រូបថត ស្កែនក្រយៅដៃ និងទិដ្ឋាការ សម្រាប់បម្រើការងារស្រាវជ្រាវ និងទប់ស្កាត់បទល្មើសឱ្យកាន់តែមានប្រសិទ្ធភាពខ្ពស់៕
ដោយ៖ទួល សុផល
