ស្ត្រីទី១អាមេរិក ជំរុញឱ្យមានបទឈប់បាញ់អ៊ុយក្រែនយូរអង្វែង
វ៉ាស៊ីនតោន ៖ ស្ត្រីទី១អាមេរិក លោកស្រី Melania Trump អំពាវនាវឱ្យមានបទឈប់បាញ់ថ្មីមួយ នៅអ៊ុយក្រែន ដែលមានភាពយូរអង្វែងជាងមុន ខណៈដែលលោកស្រីបានទទួលស្វាគមន៍មន្ត្រីមកពីប្រទេសដែលកំពុងរងគ្រោះ ដោយសារសង្គ្រាម រវាងរុស្ស៊ី និងអ៊ុយក្រែន នៅឯសេតវិមាន កាលពីថ្ងៃព្រហស្បតិ៍។
ការអំពាវនាវនេះ បានធ្វើឡើង ក្រោយពេលភរិយារបស់លោកប្រធានាធិបតី ដូណាល់ ត្រាំ រូបនេះ បានជួយសម្របសម្រួលឱ្យមានបទឈប់បាញ់រយៈពេល ៦ ថ្ងៃ នៅក្នុងទីក្រុង Oleshky ដែលស្ថិតក្រោមការកាន់កាប់របស់រុស្ស៊ី ហើយបទឈប់បាញ់នេះបានបញ្ចប់ទៅ នៅថ្ងៃអាទិត្យ។
លោកស្រី Melania Trump បានថ្លែងប្រាប់អ្នកសារព័ត៌មាននៅក្នុងសន្និសីទសារព័ត៌មានរួមមួយ ជាមួយលោក Kirill Dmitriev បេសកជនរបស់ប្រធានាធិបតីរុស្ស៊ី និងលោក David Arakhamia អ្នកចរចាបទឈប់បាញ់របស់អ៊ុយក្រែនថា «ខ្ញុំសង្ឃឹម ករណីនៅ Oleshky នឹងជំរុញឱ្យមានសន្តិភាពកាន់តែធំធេង។ រាល់ការផ្លាស់ប្តូរដ៏សំខាន់ សុទ្ធតែចាប់ផ្តើមពីចំណុចតូចមួយ»។
លោកស្រី Melania Trump បានបន្ថែមថា «ឥឡូវនេះ យើងត្រូវប្រើប្រាស់ភាពក្លាហានដែលយើងបានបង្ហាញនៅ Oleshky ដើម្បីស្វែងរកចំណុចរួមមួយ តាមរយៈការព្រួយបារម្ភដូចគ្នាចំពោះទុក្ខវេទនារបស់ប្រជាជនស្លូតត្រង់។ រួមគ្នា យើងអាចបង្កើតអ្វីមួយដែលមានភាពយូរអង្វែងជាងបទឈប់បាញ់ជាបណ្តោះអាសន្ន»។
ជាការកត់សម្គាល់ លោក Dmytro Lubinets មន្ត្រីទទួលបន្ទុកសិទ្ធិមនុស្សរបស់អ៊ុយក្រែន បានប្រគល់ពានរង្វាន់ថ្នាក់ជាតិជូនលោកស្រី Melania Trump សម្រាប់តួនាទីរបស់លោកស្រីក្នុងការសម្របសម្រួលបទឈប់បាញ់ នៅ Oleshky ដែលបានអនុញ្ញាតឱ្យមានការជម្លៀសប្រជាពលរដ្ឋចេញពីតំបន់នោះ៕
ប្រភព ៖ AFP ប្រែសម្រួល ៖ សារ៉ាត
