ក្រោមជំនួយ ១៩លានដុល្លារពីជប៉ុន មន្ទីរពេទ្យបង្អែកខេត្តសៀមរាប ពង្រឹងសមត្ថភាពផ្តល់សេវាសុខាភិបាលកម្រិតឯកទេស ឆ្ពោះទៅរកការក្លាយជាមន្ទីរពេទ្យថ្នាក់តំបន់។

មន្ទីរពេទ្យបង្អែកខេត្តសៀមរាប កំពុងខិតខំប្រឹងប្រែងយ៉ាងសកម្មក្នុងការធ្វើទំនើបកម្មហេដ្ឋារចនាសម្ព័ន្ធ និងពង្រីកសមត្ថភាពផ្តល់សេវាសុខាភិបាលរបស់ខ្លួន ដើម្បដើរតួនាទីជាមណ្ឌលផ្តល់សេវាសុខាភិបាលកម្រិត CPA-3 ដែលជាកម្រិតខ្ពស់បំផុតនៃមន្ទីរពេទ្យបង្អែក និងឈានទៅជាមន្ទីរពេទ្យថ្នាក់តំបន់ សម្រាប់ឆ្លើយតបទៅនឹងតម្រូវការថែទាំសុខភាពរបស់ប្រជាពលរដ្ឋប្រមាណ ១លាន ១សែននាក់នៅក្នុងខេត្ត។

នេះបើតាមការបញ្ជាក់ពីលោកស្រី លាក់ ឡាំលាវ ប្រធានមន្ទីរពេទ្យបង្អែកខេត្តសៀមរាប នៅក្នុងកម្មវិធី «ដំណើរទស្សនកិច្ចសម្រាប់អ្នកសារព័ត៌មានស្តីពីជំនួយអភិវឌ្ឍន៍ផ្លូវការ » នាខេត្តសៀមរាប រៀបចំកាលពីពេលថ្មីៗនេះ ដោយស្ថានទូតជប៉ុន។

លោកស្រីបញ្ចាក់បន្ថែមថា សមិទ្ធផលដ៏លេចធ្លោមួយក្នុងការកែប្រែមុខមាត់មន្ទីរពេទ្យ គឺការទទួលបានជំនួយឥតសំណងពីប្រទេសជប៉ុន តាមទីភ្នាក់ងារ JICA ក្នុងទំហំថវិកាប្រមាណ ១៩ លានដុល្លារអាមេរិក សម្រាប់សាងសង់អគារមជ្ឈមណ្ឌលសេវាវះកាត់ថ្មី កម្ពស់ ៤ ជាន់ បំពាក់ដោយបរិក្ខារវេជ្ជសាស្ត្រទំនើបៗ។

គម្រោងសាងសង់បានចាប់ផ្តើមពីខែធ្នូ ឆ្នាំ២០២១ និងបានបញ្ចប់ជាស្ថាពរនៅខែតុលា ឆ្នាំ២០២៣ ដោយបានសម្ពោធដាក់ឱ្យប្រើប្រាស់ជាផ្លូវការកាលពីថ្ងៃទី ២០ ខែមេសា ឆ្នាំ ២០២៤។ អគារថ្មីនេះបានចូលរួមចំណែកយ៉ាងសំខាន់ក្នុងការបង្កើនសមត្ថភាពព្យាបាល និងផ្តល់សេវាថែទាំសុខភាពឯកទេសជូនប្រជាពលរដ្ឋឱ្យកាន់តែមានប្រសិទ្ធភាព។

មន្ទីរពេទ្យបង្អែកខេត្តសៀមរាប មានទីតាំងស្ថិតនៅក្នុងសង្កាត់ស្វាយដង្គំ ខេត្តសៀមរាប មានអគារសរុបចំនួន ១៨ ខ្នង។ បច្ចុប្បន្ន មន្ទីរពេទ្យនេះមានគ្រែសម្រាកព្យាបាលចំនួន៤៧០ គ្រែ, បន្ទប់វះកាត់ចំនួន ១០ បន្ទប់, ផ្នែកសេវាកម្ម សរុប ៣៧ ផ្នែក (រួមមាន ផ្នែកសេវាឯកទេស ២៥ និងផ្នែកសេវាគាំទ្រ ១២) និងបុគ្គលិកសរុបចំនួន ៧៩០ នាក់ ។

តំណាង JICA បានគូសបញ្ជាក់ថា គម្រោងកែលម្អមន្ទីរពេទ្យខេជាសៀមរាបនេះ គឺជាផ្នែកមួយនៃការគាំទ្រដ៏យូរអង្វែងរបស់ជប៉ុនចំពោះវិស័យសុខាភិបាលនៅកម្ពុជា។ ចាប់តាំងពីឆ្នាំ ១៩៩៥ មក JICA បានអនុវត្តគម្រោងជំនួយឥតសំណងចំនួន ៩ ក្នុងវិស័យសុខាភិបាល ដែលរួមបញ្ចូលទាំងការអភិវឌ្ឍមន្ទីរពេទ្យខេត្តចំនួន ៦ ហើយគម្រោងនៅសៀមរាបនេះគឺជាគម្រោងចុងក្រោយគេនៅក្នុងស៊េរីអភិវឌ្ឍន៍មន្ទីរពេទ្យខេត្តទាំងនោះ។

ក្រៅពីការអភិវឌ្ឍហេដ្ឋារចនាសម្ព័ន្ធ អង្គការ JICA នៅតែបន្តគាំទ្រកម្ពុជាលើការងារជាច្រើនទៀត រួមមាន ការគ្រប់គ្រងជំងឺមិនឆ្លង សុខភាពមាតា និងទារក ការបណ្តុះបណ្តាលបន្តសម្រាប់បុគ្គលិកសុខាភិបាល ការកែលម្អអាហារូបត្ថម្ភ សេវាសង្គ្រោះបន្ទាន់ ការពង្រឹងប្រព័ន្ធបញ្ជូនអ្នកជំងឺ និងការរៀបចំគោលនយោបាយសុខាភិបាល។
កិច្ចខិតខំប្រឹងប្រែងរួមគ្នានេះ មានគោលដៅលើកកម្ពស់លទ្ធភាពទទួលបានសេវាថែទាំសុខភាពប្រកបដោយគុណភាព និងសមធម៌ ដើម្បីចូលរួមចំណែកដល់ការសម្រេចបាននូវ «ការគ្របដណ្តប់សុខភាពជាសកល (Universal Health Coverage)» របស់កម្ពុជានាពេលអនាគត៕

ដោយ៖ង៉ាន់ ទិត្យ
រូបភាព៖រិន រចនា