ភ្នំពេញ ៖ ស្ត្រីពីរនាក់ជិះម៉ូតូឌុបគ្នាចេញពីផ្សារស្ទឹងមានជ័យត្រូវរថយន្តធន់ធំបើកបុកពីក្រោយជ្រុលកិនស្ត្រីម្នាក់ស្លាប់ កាលពីវេលាម៉ោង​១០នឹង៣០នាទីព្រឹកថ្ងៃទី​ ១២​ ខែ​មីនា​ ឆ្នាំ​២០១៩​ ស្ថិតនៅផ្លូវព្រះមុនីរ៉េត​ ក្បែរផ្សារស្ទឹងមានជ័យថ្មី​ សង្កាត់ស្ទឹងមានជ័យទី១​ ខណ្ឌមានជ័យ​ រាជធានីភ្នំពេញ​។

យោងតាមសម្តីស្ត្រីជាអ្នកឌុបបានឲ្យដឹងថា ដំបូងឡើយរូបគាត់រួមទាំងស្ត្រីរង់គ្រោះបានចូលទិញសម្ភារក្នុងផ្សារស្ទឹងមានជ័យថ្មី​ ដើម្បីយកទៅរួមបុណ្យចម្រើនព្រះជន្ម​ ក្រោយទិញរួចរាល់ក៏បានជិះម៉ូតូមួយគ្រឿងម៉ាក​ TODAY ពណ៌ត្រួយចេក​ ធ្វើដំណើរទិសដៅពីជើងទៅត្បូង​ ជិះដល់ចំណុចកើតហេតុក៏មានរថយន្តធន់ធំមួយគ្រឿងម៉ាក​ ហីុយ៉ាន់ដាយ​  ពាក់ស្លាកលេខភ្នំពេញ​ 3E 0515 បើកលឿនស្របគ្នាបុកពីក្រោយបណ្តាលឱ្យស្ត្រីជាអ្នកជិះពីក្រោយធ្លាក់ពីលើម៉ូតូត្រូវរថយន្តកិនក្បាលផ្ទុះធ្លាយខួរខ្ទេតពេញផ្លូវស្លាប់នៅនឹងកន្លែងកើតហេតុ​ ចំណែករូបខ្លួនជាអ្នកឌុបមិនមានរងរបួសនោះទេ​ ។

សមត្ថកិច្ចបានឲ្យដឹងថា ក្រោយមានករណី​នេះ​តៃកុងរថយន្តរួមនឹងរថយន្តបង្កត្រូវបានសមត្ថកិច្ចឃាត់បានភ្លាមៗ​  ហើយចំពោះអត្តសញ្ញាណសពស្ត្រីខាងលើមានឈ្មោះ​ ស៊ុន​ សួង អាយុ៥៣ឆ្នាំ​ មានស្រុកកំណើតនៅខេត្តស្វាយរៀង​ ។  ប្រភពដដែលបន្តថា ជុំវិញគ្រោះថ្នាក់ចរាចរាណ៍នេះ សមត្ថកិច្ចជំនាញបានចុះមកវាស់វែងអូសយករថយន្តបង្ក និងម៉ូតូយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយនាពេលក្រោយ​ ចំណែកសាកសពស្ត្រីខាងលើត្រូវបានធ្វើលិខិតប្រគល់ជូនសាច់ញាតិផងដែរ៕ម.ន