វៀតណាម៖ ប្រធានាធិបតីអាម៉េរិក​ លោក ដូណាល់ ត្រាំ បានធ្វើដំណើរមកដល់ទីក្រុងហាណូយ ប្រទេសវៀតណាមហើយនៅយប់ ថ្ងៃអង្គារនេះ មុនជំនួបកំពូលជាលើកទី២ ជាមួយមេដឹកនាំកូរ៉េខាងជើង លោក គីម ជុងអ៊ុន។
យន្ដហោះ Air Force One របស់លោក ដូណាល់ ត្រាំបានចុះចតនៅឯអាកាសយានដ្ឋានអន្តរជាតិ Noi Bai International Airport នៃទីក្រុងហាណូយ នៅម៉ោង៩៖០០នាទីយប់នេះ ហើយបន្ទាប់មកលោកនឹងធ្វើដំណើរ ចាកចេញឆ្ពោះទៅកាន់សណ្ឋាគារដែលគេរំពឹងទុកនោះគឺសណ្ឋាគារ JW Marriott។

អ្នកនាំពាក្យសេតវិមានលោកស្រី សារ៉ាហ៍ សេនដឺស៍ បានបញ្ជាក់ប្រាប់ក្រុមអ្នកសារព័ត៌មាននៅលើយន្តហោះ Air Force One ថា លោក ត្រាំ នឹង​ជួបមុខគ្នា​មួយទល់មួយ​ជាមួយ លោក គីម នាវេលាល្ងាច​ថ្ងៃពុធ ស្អែកនេះ ខណៈនា​ពេលព្រឹកលោកនឹង​ជួបមេដឹកនាំ​កំពូលៗវៀតណាម ។ រីឯ​​កិច្ច​ប្រជុំបន្តបន្ទាប់​ទៀតជាមួយ លោក គីម ជុងអ៊ុន នឹងប្រព្រឹត្ត​ទៅនៅនាថ្ងៃ ព្រហស្បតិ៍្តសប្តាហ៍នេះ៕