សហរដ្ឋអាម៉េរិក៖ សេតវិមានបានលើកឡើងថា ប្រធានាធិបតីអាម៉េរិកលោក ដូណាល់ ត្រាំ បានសម្រេចចិត្តជ្រើសរើសយករដ្ឋធានីហាណូយ របស់ប្រទេសវៀតណាម ជាទីកន្លែងសម្រាប់ជំនួបកំពូលលើកទីពីររវាងលោក និងប្រមុខដឹកនាំកូរ៉េខាងជើង លោក គីម ជុងអ៊ុន ដែលគ្រោងរៀបចំឡើងនៅចុងខែកុម្ភៈនេះ។
 
ការប្រកាសយកទីតាំងជាក់លាក់នៅទីក្រុងហាណូយ ធ្វើជាកន្លែងជួបលោក គីម ជុងអ៊ុន នេះ ត្រូវបានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោក ដូណាល់ ត្រាំ បានសម្រេចយកប្រទេសវៀតណាមធ្វើជាម្ចាស់ផ្ទះ។ ការសម្រេចចិត្តនេះដែរ ក៏វាស្របទៅតាមការចង់បានរបស់រដ្ឋាភិបាលក្រុងហាណួយ ដែលបានចេញមុខមុនគេ ក្នុងការស្វាគមន៍ជំនួបកំពូលរវាងលោក ត្រាំ និងលោក គីម ជាលើកទីពីរ ខណៈវៀតណាមត្រូវបានគេមើលឃើញថា កំពុងមានទំនាក់ទំនងល្អជាមួយកូរ៉េខាងជើងផង និងសហរដ្ឋអាម៉េរិកផង៕ម.ន