ភ្នំពេញ៖ កម្លាំងកងរាជអាវុធហត្ថខណ្ឌមានជ័យ បានឃាត់ខ្លួនជនសង្ស័យ២នាក់ ក្រោយពេលពួកគេធ្វើសកម្មភាពលួចយកម៉ូតូបានសម្រេច កាលពីវេលាម៉ោង១១និង០០នាទី ថ្ងៃទី៧ ខែធ្នូ ឆ្នាំ២០១៨ នៅចំណុចបន្ទប់ជួល ផ្លូវបេតុងភូមិទ្រា២ សង្កាត់ស្ទឹងមានជ័យ១ ខណ្ឌមានជ័យ។ អាវុធហត្ថខណ្ឌមានជ័យបានឲ្យដឹងថា ជនសង្ស័យទាំង២ គឺទី១)ឈ្មោះ សុខ គា អាយុ១៧ឆ្នាំ មុខរបរលក់ដូរ និងទី២)ឈ្មោះ ជា ណារិទ្ធ ហៅអាខុង អាយុ១៨ឆ្នាំ ជាមុខសញ្ញាចាស់ធ្លាប់ជាប់ពន្ធនាគារ។ ចំណែកវត្ថុតាងដកហូតមាន ម៉ូតូចំនួន៣គ្រឿង ស្លាកលេខម៉ូតូ១បន្ទះ។

បើយោងតាមពាក្យបណ្តឹងពីជនរងគ្រោះ ទើបកម្លាំងអាវុធហត្ថបើកការស្រាវជ្រាវតាមជំនាញ និងឆែកតាមប្រពន្ធ័កាំម៉ារ៉ាសុវត្ថិភាពឈានដល់ការឃាត់ខ្លួនបានជនសង្ស័យ២នាក់ ដែលជាមុខសញ្ញាចាស់លួច និងឆក់យ៉ាងសកម្មក្នុងរាជធានីភ្នំពេញ យកមកសួរនាំតែម្ដង។ បច្ចុប្បន្នជនសង្ស័យរួមនឹងវត្ថុតាងត្រូវបានកម្លាំងអាវុធហត្ថខណ្ឌមានជ័យបញ្ជូនទៅឃុំខ្លួនបណ្តោះអាសន្ននៅទីបញ្ជាការដ្ឋានកងរាជអាវុធហត្ថរាជធានីភ្នំពេញដើម្បីកសាងសំណុំរឿងបញ្ជូនទៅតុលាការចាតការតាមនីតិវិធី៕