ព្រៃវែង​៖ លោក Pravin Patel បានបញ្ជាក់យ៉ាងដូច្នេះថា «​ទូក ង នៃព្រះរាជាណាចក្រកម្ពុជា ដែលមានប្រវែង៨៧.៣ម៉ែត្រ ត្រូវបាន​បំបែកឯតទគ្គកម្មពិភពលោក World Guinness Record ជាផ្លូវការហើយ»។ ទូក «ង» របស់កម្ពុជាដែ​លបំបែកឯតទគ្គកម្មនេះ ត្រូវបានប្រសិទ្ធនាមថា «កម្ពោជិកបុត្តាខេមរាតរី» ដែលមានអត្ថន័យថា «ទូកងរបស់កូនខ្មែររស់នៅក្នុងដែនដីកម្ពុជា»។ សម្ដេចក្រឡាហោម ស ខេង ក៏បានចាត់ទុកថា ការធ្វើទូក «ង» ដែលវែងជាងគេ រហូតបំបែកឯតទគ្គកម្មបាននោះ មិនមែនជារឿងសាមញ្ញនោះទេ ព្រោះបើគ្មានការផ្ដួចផ្ដើមគំនិត គ្មានឆន្ទះ គ្មានការរួបរួមគ្នា គ្មានការតស៊ូ អត់ទ្រាំចំពោះការលំបាក ហើយគ្មានបុព្វហេតុច្បាស់លាស់ទេនោះ គឺមិនអាចធ្វើទូកនេះបានទេ។

សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ នៅព្រឹកថ្ងៃទី១២ ខែវិច្ឆិកា ឆ្នាំ២០១៨នេះ ក្នុងពិធីបំបែកកំណត់ត្រាពិភពលោក ទូក «ង» វែងជាងគេនៅ លើពិភពលោក បានថ្លែងនូវការកោតសរសើរដល់យុវជនខ្មែរគ្រប់ស្រទាប់វណ្ណៈទាំងអស់ ដែលបានចូលរួមផ្ដួចផ្ដើមគំនិត និងកសាងទូក «ង» វែងជាងគេលើនៅពិភពលោក រហូតឈានដល់ការបំបែកបាននូវឯតទគ្គកម្ម World Guinness Record។ ​​សម្ដេច ស ខេង «ក៏បានអបអរសាទរ និងកោតសរសើរ​ដល់ក្មួយៗទាំងអស់ និងអរគុណចំពោះអ្នកពាក់ព័ន្ធទាំងអស់ ដែលមានគំនិតផ្ដួចផ្ដើមនេះ ហើយមានបង្កើតគណៈកម្មការត្រឹមត្រូវណាស់ ហើយបើគ្មានការសាមគ្គី ឆន្ទះ ធ្វើមិនបាននោះទេ​ ចឹងហើយបានគេដាក់ថា រួមគ្នាដើម្បីកម្ពុជារុងរឿង-ខ្មែរសាមគ្គី គឺខ្មែរឈ្នះ​ ចឹងពាក្យនេះមានអត្ថន័យជ្រាលជ្រៅណាស់»។

សម្ដេច ស ខេង ក៏បានគូសបញ្ជាក់ថា តាមការគ្រោងទុកទូក «ង» ដែលវែងជាងគេនេះ នឹងត្រូវយកដាក់បង្ហាញនៅក្នុងព្រះរាជពិធីបុណ្យអុំទូក នៅមុខព្រះបរមរាជវាំង ដែលអាចជនរួមជាតិខ្មែរទាំងអស់ ដែលមកកម្សាន្ដ បានទស្សនាដោយផ្ទាល់ ក៏ដូចជាឲ្យភ្ញៀវទេសចរអន្ដរជាតិ បានឃើញថែមទៀតផង ដែលនេះជាបញ្ហាមួយទាក់ទាញភ្ញៀវទេសចរផងដែរឲ្យយល់កាន់តែច្បាស់អំពីប្រវត្តិសាស្ដ្រខ្មែរ។

ទូកនេះ មានប្រវែងរហូតដល់៨៧.៣ម៉ែត្រ, ទទឹង១.៩៤​ម៉ែត្រ និងជម្រៅ០.៨ម៉ែត្រ ត្រូវរចនាឡើងដោយផ្នែកខាងក្បាលទូក ធ្វើជាក្បាលនាគ និងកន្ទុយហង្ស ប្រកបដោយក្បូរក្បាច់រចនាល្អប្រណិត ដែលផ្ទុកបានចំណុះ រហូត​ដល់១៧៩នាក់ឯណោះ ដោយ១០០នាក់មកពីទាហានជើងទឹក និង៧៩នាក់ មកពីនគរបាលជើងទឹក។

សូមជម្រាបថា ជាមោទនភាពថ្មីមួយទៀតហើយ សម្រាប់ជាតិ និងប្រជាជនរបស់កម្ពុជា​ ដោយទូក «ង» វែងជាងគេដែលផលិតដោយកូនខ្មែរ ដែលមានប្រវែងជិត១០០ម៉ែត្រ និងមានចំណុះទូកជិត២០០នាក់នោះ ត្រូវបានជាប់ឯតទគ្គកម្មពិភពលោក World Guinness Record ជាផ្លូវការហើយ នៅព្រឹកថ្ងៃទី១២ ខែវិច្ឆិកា ឆ្នាំ២០១៨នេះ។

ពិធីបំបែកកំណត់ត្រាពិភពលោកនេះ ធ្វើឡើងក្រោមអធិបតីភាព សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងលោកស្រី និងមានការចូលរួមពី លោក Pravin Patel អ្នកវិច្ឆ័យ World Guinness Record ដែលប្រារព្ធធ្វើនៅតំបន់អ្នកលឿងត្រើយខាងកើត។

សម្រាប់ពិធីដែលជាមោទនភាពថ្មីរបស់ជាតិ និងប្រជាពលរដ្ឋខ្មែរនេះ ក៏មានការចូលរួមពី លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា, លោក ស សុខា អនុប្រធានសហភាពសហព័ន្ធយុវជនកម្ពុជា និងជាប្រធានគណៈកម្មការផលិតទូក «ង» វែងជាងគេនៅលើពិភពលោក ព្រមទាំងលោក លោកស្រី ជាថ្នាក់ដឹកនាំ និងអ្នកពាក់ព័ន្ធជាច្រើនរូបទៀត៕