ភ្នំពេញ៖ កម្មវិធីសិក្សារបស់កុមារតូចៗដែលមានឈ្មោះថា FasTracKids ដ៏ល្បីល្បាញរបស់ពិភពលោក ត្រូវបានសម្រេចដាក់បញ្ចូលនៅកម្ពុជា តាមរយៈលោកស្រី ផនសារីន មេធី វាឆារាណន នាយកប្រតិបត្តិ FasTracKids Thailand និងលោក លឹម ឡោកចនសុន នាយកប្រតិបត្តិ LVLs Media និងជាដៃគូសហការកម្ពុជា តាមរយៈការចុះហត្ថលេខាលើអនុស្សារណៈយោគយល់ជាមួយនឹងសាលា Princeton ដែលតំណាងដោយលោកជំទាវ ឌិត នីតា  នាយិកាសាលា Princeton នៅកម្ពុជា។

ថ្លែងក្នុងសន្និសិទសារព័ត៌មានក្នុងពិធីចុះហត្ថលេខាលើអនុស្សារណៈយោគយល់គ្នា នាព្រឹកថ្ងៃ២១ ខែកញ្ញានេះ នៅភោជនីយដ្ឋាន ខេម៉ា ឡាប៉ុស្តិ៍ លោកជំទាវ ឌិត នីតា នាយិកាសាលា Princeton នៅកម្ពុជា មានប្រសាសន៍ថា ពិធីចុះហត្ថលេខាលើអនុស្សារណៈយោគយល់គ្នានេះ ធ្វើឡើងក្នុងគោលបំណងជួយពង្រឹងប្រព័ន្ធសិក្សាសម្រាប់កុមារតូចៗក្រោមអាយុ៥ឆ្នាំ ឱ្យមានចំណេះដឹងមូលដ្ឋានរឹងមាំ ក្រោមការបណ្ដុះបណ្ដាលរបស់សាលាអន្តរជាតិ Princeton ដែលមានស្ដង់ដារស្របតាមប្រព័ន្ធសិក្សារបស់ចក្រភពអង់គ្លេសរួចទៅហើយ។

លោកជំទាវបន្តថា ការដាក់បញ្ចូលកម្មវិធី FasTracKids ដែលជំនួយឲ្យកុមារៗកាន់តែមានចំណេះដឹងតាមរយៈការប៉ះស្ទាប និងមើលឃើញនេះ មិនមែនមានន័យថា សាលាលុបចោលទម្រង់បណ្ដុះបណ្ដាលរបស់ខ្លួនចោល ហើយទទួលយកប្រព័ន្ធសិក្សាថ្មីៗនេះដល់កុមារៗទេ ផ្ទុយទៅវិញ គឺគ្រាន់តែបន្ថែមទម្រង់បណ្ដុះបណ្ដាល ដើម្បីឲ្យកុមារតូចៗក្រោមអាយុ៥ឆ្នាំកាន់តែចង់សិក្សា និងទទួលបានអារម្មណ៍រីករាយក្នុងវ័យសិក្សារបស់ខ្លួន ក្នុងកម្រិតមតេយ្យតែប៉ុណ្ណោះ។

លោកជំទាវនាយិកាបន្ថែមថា សម្រាប់កិច្ចសហការក្រៅពី FasTracKids សាលា Princeton នៅមិនទាន់មានគម្រោងសហការជាមួយដៃគូផ្សេងទៀតនៅឡើយទេ ដោយសារយើងចង់ឱ្យមូលដ្ឋានគ្រឹះនេះ បានទៅមុខប្រសើរហើយ យើងនឹងបង្កើតកម្មវិធីសិក្សាថ្មីផ្សេងទៀតសម្រាប់សិស្សផ្សេងទៀតចាប់ពីអាយុ៦ឆ្នាំឡើងទៅ ប៉ុន្តែក្នុងរយៈពេលនេះ យើងសង្កត់ធ្ងន់តែទៅលើសិស្សដែលស្ថិតនៅថ្នាក់មតេ្តយ្យសិន។ លោកជំទាវរំពឹងថា ប្រព័ន្ធសិក្សាថ្មីនឹងកាន់តែធ្វើឲ្យកុមារតូចៗ រៀនសូត្រឆាប់ចាប់បាន ហើយនឹងធ្វើឲ្យកុមារទាំងនោះ កាន់តែមានគ្រឹះរឹងមាំទ្វេដង បន្ថែមពីលើប្រព័ន្ធសិក្សាដែលមានស្រាប់។

លោក លឹម ឡោកចនសុន អគ្គនាយករបស់ LVLs Media ដែលជាដៃគូសហការនាំយក FasTracKids មកកម្ពុជា បានសម្តែងក្ដីសោមនស្សរីករាយជាខ្លាំង ដែលបានចូលរួមចំណែកនាំយកកម្មវិធីសិក្សាដ៏ល្បីល្បាញនេះ មករួមចំណែកបណ្ដុះបណ្ដាលដល់កុមារកម្ពុជា។ លោកអគ្គនាយកមានជំនឿយ៉ាងមុតមាំថា តាមរយៈកិច្ចសហការរវាងសាលា Princeton និង FasTracKids  នឹងផ្លាស់ប្តូររបៀបបង្រៀននៅកម្ពុជាឲ្យកាន់តែប្រសើរជាងមុន ហើយកាន់តែស្របតាមកម្មវិធីសិក្សាដ៏ល្បីល្បាញរបស់សហរដ្ធអាម៉េរិកថែមទៀត៕