ជប៉ុន៖ ក្រុមហ៊ុនប្រេងជប៉ុនធំៗត្រូវបានគេរំពឹងថា គ្រោងផ្អាករាល់ការនាំចូលប្រេងឆៅពីប្រទេសអ៊ីរ៉ង់ នៅខែតុលាខាងមុខនេះ ដោយសារតែការភ័យខ្លាចការព្រមានរបស់សហរដ្ឋអាម៉េរិក ដែលថា នឹងដាក់ទណ្ឌកម្មលើប្រទេសទាំងឡាយណា ដែលហ៊ានបន្តនាំចូលប្រេងឆៅរបស់ទីក្រុងតេហេរ៉ង់។
 
រដ្ឋាភិបាលទីក្រុងតូក្យូត្រូវគេរាយការណ៍ទៀតថា បាននិងកំពុងស្វែងរកការលើកលែងពីសហរដ្ឋអាម៉េរិក ដែលនឹងអនុញ្ញាតឲ្យខ្លួនបន្តធ្វើការនាំចូលប្រេងពីអ៊ីរ៉ង់ ប៉ុន្តែបច្ចុប្បន្ននេះ ហាក់ដូចជាពុំទទួលបានផលអ្វីឡើយ។ ម្យ៉ាងវិញទៀត ក្រុមហ៊ុនប្រេងធំៗនៅប្រទេសជប៉ុនទំនងជាកំពុងរិះរកមធ្យោបាយ ដើម្បីបង្កើនការនាំចូលប្រេងពីកន្លែងផ្សេងជំនួសអ៊ីរ៉ង់វិញ។