ភ្នំពេញ៖ ក្នុងគ្រាដែលប្រទេសកម្ពុជាកំពុងរងគ្រោះដោយជំនន់ទឹកភ្លៀងក្រុមយុវជនស្ម័គ្រចិត្តមនុស្សធម៌ជាច្រើននាក់បានដឹកនាំក្រុមការងារ ចុះធ្វើអាហារសម្រន់មានម្ហូប អាហារចែកជូនដល់កងអន្តរាគមន៍ជួយសង្គ្រោះពលរដ្ឋរងគ្រោះដោយជំនន់ទឹកភ្លៀងនៅខណ្ឌដង្កោ រាជធានីភ្នំពេញ។ ក្រុមយុវជនស្ម័គ្រចិត្តបានឲ្យដឹងថាសកម្មភាពនេះគឺ ដើម្បីជាកម្លាំងចិត្តដល់កងអន្តរាគមន៍ដែលបានខិតខំជួយសង្គ្រោះ ពលរដ្ឋដែលរងគ្រោះដោយជំនន់ទឹកភ្លៀង និងក៏ដើម្បីចែករំលែកនៃក្តីស្រឡាញ់ក្នុងគ្រាដែលប្រទេសកម្ពុជា កំពុងយាយីដោយទឹកជំនន់ភ្លៀង។

ក្រុមយុវជនស្ម័គ្រចិត្តបានឲ្យដឹងទៀតថាជួយគ្នាក្នុងគ្រាជួបការលំបាក «យេីងស្ម័គ្រចិត្តដេីម្បីអ្នក » ចំណែកក្រុមការងារយុវជនស្ម័គ្រចិត្តយើង ក៏នៅតែបន្តបេសកកម្មចូលរួមចំណែកក្នុងការផ្គត់ផ្គង់ជូនកងកម្លាំង និងក្រុមការងារទាំងអស់នូវអាហារសម្រន់ខ្លះៗ ដោយស្ម័គ្រចិត្ត ដោយក្តីគោរព និងមានមោទនភាពចំពោះវីរភាពរបស់កងកម្លាំង និងក្រុមការងារនិងប្រជាពលរដ្ឋគ្រប់ៗរូបផងដែរ។

ក្រុមយុវជនស្ម័គ្រចិត្តបានលើកឡើងទៀតថាស្របពេលដែលជំនន់ទឹកភ្លៀងកំពុងតែគំរាមកំហែងលិចផ្ទះសម្បែង  លិចភូមិឋាន  នៅតាមសង្កាត់នានា ក្នុងខណ្ឌដង្កោ យើងរួមគ្នាជាកម្លាំងដើម្បីធ្វើម្ហូបអាហារជូនដល់កងកម្លាំងអន្តរាគមន៍ក្នុងគ្រោះទឹកជំនន់នេះ។

ជាមួយនិងសកម្មភាពមនុស្សធម៍ នេះក្រុមយុវជនស្ម័គ្រចិត្តក៏បានស្នើដល់ប្រជាពលរដ្ឋដែលរងគ្រោះដោយជំនន់ទឹកភ្លៀង ត្រូវមានការប្រុងប្រយ័ត្នចំពោះសុវត្ថិភាពកូន ចៅដែលនៅតូចៗ មិនត្រូវឲ្យចុះលេងទឹក នោះទេ និងសូមអោយមានការប្រុងប្រយ័ត្នចំពោះសត្វអសិរពិស អាចបង្កគ្រោះថ្នាក់ ដល់បងប្អូន ក៍ដូចជាសមាជិកក្នុងក្រុមគ្រួសារជាពិសេសត្រូវមានអនាម័យជាប្រចាំ ទើបជៀសបានពីជំងឺដង្កាត់ផ្សេងៗ៕