ឱសថខុសច្បាប់ ផលិតផលវេជ្ជសាស្ត្រ និងផលិតផលក្លែងក្លាយខុសច្បាប់ទូទៅ​បានជិត​៦០០តោនត្រូវ​បានគណៈកម្មាធិការប្រយុទ្ធប្រឆាំងផលិតផលក្លែងក្លាយបង្ក្រាបានក្នុងរយ:ពេល៩ខែឆ្នាំនេះ។ការបង្ក្រាបនោះគឺបានឲ្យដឹងនៅក្នុងកិច្ចប្រជុំស្តីពី «យន្តការអនុវត្តន៍ការប្រយុទ្ធប្រឆាំងផលិតផលក្លែងក្លាយ និងទិសដៅ​អនុវត្តន៍បន្ត» នៅថ្ងៃទី២០ ខែតុលា ឆ្នាំ២០២០ នៅទីស្តីការក្រសួងមហាផ្ទៃ។​គណៈកម្មាធិការប្រយុទ្ធ​ប្រឆាំង​ផលិតផលក្លែងក្លាយ បានឲ្យដឹងថា លេខាធិការដ្ឋាន បានបូកសរុបលទ្ធផលអនុវត្តន៍ការងារ របស់គណៈ​កម្មាធិការ ដោយបង្ហាញថា រយៈពេល ៩ខែ ឆ្នាំ២០២០ បានចុះបង្ក្រាបឱសថខុសច្បាប់ ផលិតផលវេជ្ជ​សាស្ត្រ និងផលិតផល ដែលក្លែងក្លាយខុសច្បាប់ទូទៅ សរុបចំនួន ១៣៤ករណី ស្មើនឹងចំនួន ៥៩៤.៦៥​តោន។

កម្ពុជាក្នុងមួយឆ្នាំៗបានរងការខាតបង់ច្រើនលានដុល្លារដោយសារទំនិញក្លែងក្លាយនិងខូចគុណភាព។ ទំ​និញ ក្លែងក្លាយដែលមិនមានសុវត្តិភាព ត្រូវគេឃើញបានយកមកលក់ក្នុងទីផ្សារក្នុងស្រុកមួយចំនួន​ក្រោ​ម​ស្លាកថា ផលិតមកពីប្រទេសជប៉ុន…ប្រទេសចិន…ប្រទេសបារាំងឬសហរដ្ឋអាមេរិក  ជាដើម… ប៉ុន្តែមន្ត្រី​ជំនាញ​ក្រសួង មហាផ្ទៃ កន្លងមកធ្លាប់បានបញ្ជាក់ថាផលិតផលក្លែងក្លាយទាំងនោះ ភាគច្រើនបាន ផលិត​ក្នុង ខេត្តកណ្តាល និងក្នុងរាជ ធានី ភ្នំពេញនេះទេ។