ប្រមុខការទូតអាមេរិកបញ្ជាក់ថា សហរដ្ឋអាមេរិកបើកភ្លើងខៀវចំពោះការលក់គ្រឿងបរិក្ខាយោធាទៅអោយអេមីរ៉ាត់អារ៉ាប់រួម ក្នុងនោះក៏រួមមានយន្តហោះ F-35
អាមេរិក៖ រដ្ឋមន្ត្រីការបរទេសអាមេរិក លោក ម៉ៃ ប៉ុមប៉េអូ ប្រកាសថា ក្រសួងរបស់លោកបានយល់ព្រមលើផែនការលក់គ្រឿងបរិក្ខាយោធាទៅអោយប្រទេសអេមីរ៉ាត់អារ៉ាប់រួម ដែលក្នុងនោះក៏រួមមានទាំងយន្តហោះចម្បាំងបំបាំងកាយ F-35 ជំនាន់ទី៥ផងដែរ នេះបើតាមសារព័ត៌មានស្ព្រូតនីគនៅថ្ងៃទី១១ ខែវិច្ឆិកា ឆ្នាំ២០២០ ។
ក្រសួងការបរទេសអាមេរិកបានបញ្ជូនលិខិតជូនដំណឹងផ្លូវការមួយទៅកាន់សភាស្តីពីការលក់យន្តហោះចម្បាំងបំបាំងកាយ បន្ទាប់ពីប្រទេសសម្ព័ន្ធមិត្តនៅឈូងសមុទ្រមួយនេះបានសុំទិញយូរមកហើយ តែទើបទទួលបានការអនុញ្ញាតកាលពីខែកញ្ញាកន្លងទៅ ក្រោយពីខ្លួនភ្ជាប់ទំនាក់ទំនងជាផ្លូវការវិញជាមួយអ៊ីស្រាអែល ។
ក្រសួងការបរទេសអាមេរិកបានឱ្យដឹងដែរថា សហរដ្ឋអាមេរិកមានផែនការលក់យន្តហោះចម្បាំងបំបាំងកាយ F-35 ទៅអោយអេមីរ៉ាត់អារ៉ាប់រួម ជាផ្នែកមួយនៃការទិញលក់មួយកញ្ចប់តំលៃ២៣.៣៧ពាន់លានដុល្លារ ។ ហើយបើតាមលោក ម៉ៃ ប៉ុមប៉េអូ ការលក់នេះនឹងរួមមានយន្តហោះ F-35 ចំនួន៥០គ្រឿង ដែលអាចប្រើសំរាប់ស៊ើបការណ៍ និងវាយប្រហារ ។ បន្ថែមលើនេះ វាក៏នឹងរួមមានយន្តហោះដ្រូនទំនើប MQ-9B ចំនួន១៨គ្រឿង និងគ្រាប់រំសេវតំលៃ១០ពាន់លានដុល្លារផងដែរ ៕
