បាតុករប្តេជ្ញាបន្តធ្វើបាតុកម្ម ក្រោយសភាថៃច្រានចោលសេចក្តីព្រាងច្បាប់វិសោធនកម្មរដ្ឋធម្មនុញ្ញ ដែលស្នើឡើងដោយសង្គមស៊ីវិល
ថៃ៖ សភាថៃ នៅថ្ងៃពុធនេះ បានបោះឆ្នោតបដិសេធសេចក្តីព្រាងច្បាប់វិសោធនកម្មរដ្ឋធម្មនុញ្ញាដែលស្នើដោយសង្គមស៊ីវិល ហើយមានតែសេចក្តីព្រាងច្បាប់ចំនួន០២ប៉ុណ្ណោះ ដែលនឹងត្រូវពិភាក្សាបន្ត គឺសេចក្តីព្រាងរបស់រដ្ឋាភិបាល និងបក្សប្រឆាំងដែលមិនមានចែងពីការកែទម្រង់ស្ថាប័នមហាក្សត្រ នេះបើតាមសារព័ត៌មានបាងកកប៉ុស្តិ៍នៅថ្ងៃទី១៩ ខែវិច្ឆិកា ឆ្នាំ២០២០ ។
ជុំវិញការបដិសេធសេចក្តីព្រាងច្បាប់ខាងលើនេះ ក្រុមបាតុករបាននិយាយថា ពួកគេគ្មានជម្រើសផ្សេងក្រៅពីត្រូវបន្តធ្វើបាតុកម្ម រហូតសម្រេចគោលបំណងរបស់ខ្លួនឡើយ ។ សេចក្តីព្រាងច្បាប់របស់អង្គការ អាយឡ (iLaw) ដែលត្រូវបានហៅថា «សេចក្តីព្រាងប្រជាជន» គាំទ្រដោយមនុស្សជាង១សែននាក់ត្រូវបានសភាថៃបដិសេធក្នុងការបោះឆ្នោតក្រោយពីបានអានចប់សព្វគ្រប់នៅថ្ងៃទី១៨ ខែវិច្ឆិកានេះ ។ សេចក្តីព្រាងច្បាប់នេះ ទទួលបានការគាំទ្រសឹងតែទាំងអស់ពីតំណាងរាស្ត្រគាំទ្រប្រជាធិបតេយ្យ តែត្រូវបដិសេធ និងអនុប្បវាទដោយសមាជិកព្រឹទ្ធសភាសឹងតែទាំងអស់ ។
ខណៈសភាកំពុងធ្វើការបោះឆ្នោតនៅថ្ងៃទី១៨ ខែវិច្ឆិកានេះ បាតុករបានជួបជុំគ្នានៅមុខទីស្នាក់ការប៉ូលិសទាមទារឲ្យប៉ូលិសចេញមុខទទួលខុសត្រូវ ចំពោះការបំបែកបាតុករនៅថ្ងៃទី១៧ ខែវិច្ឆិកា ដែលធ្វើឲ្យមនុស្ស៥៥នាក់រងរបួស ក្នុងនោះ៦នាក់កំពុងសម្រាកក្នុងមន្ទីរពេទ្យ ។ ការជួបជុំនៅថ្ងៃទី១៨ ខែវិច្ឆិកាត្រូវបានរំសាយដោយសន្តិវិធីនៅម៉ោង៨យប់ ប៉ុន្តែក្រុមបាតុករអះអាងថា នឹងជួបជុំជាថ្មីនៅថ្ងៃទី២៥ ខែវិច្ឆិកា នៅមុខការិយាល័យទ្រព្យសម្បត្តិព្រះមហាក្សត្រ ៕
