ភ្នំពេញ៖ ឯកឧត្តម អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានអង្គការមូលនិធិអភិវឌ្ឍន៍មុស្លិមកម្ពុជា បានដឹកនាំគណៈប្រតិភូអញ្ជើញសំណេះសំណាល សាកសួរសុខទុក្ខ និងចែកកញ្ចប់អំណោយ ដល់ប្រជាពលរដ្ឋចំនួន៧០០គ្រួសារ ដែលរង់គ្រោះដោយទឹកជំនន់ នៅភូមិកន្ទុយទឹក សង្កាត់ទាន ខណ្ឌដង្កោ រាជធានីភ្នំពេញ។

ទេសរដ្ឋមន្ត្រី អូស្មាន ហាស្សាន់ លើកឡើងថា ទោះបីជាទឹកជំនន់បានឆ្លងផុតទៅហើយ ប៉ុន្តែតម្រូវការ និងភាពចាំបាច់របស់ប្រជាពលរដ្ឋ នៅតែត្រូវបានយកចិត្តទុកដាក់ ហើយអំណោយគឺជាការឧបត្ថម្ភរបស់អង្គការសម្ព័ន្ធពិភពឥស្លាម (RABITA) ដែលផ្តល់ជាទូទៅ មិនសំដៅលើពូជសាសន៍ និងសាសនា។

ឯកឧត្តម បន្តថា «យើងត្រូវដឹងថាអ្វីទាំងអស់នេះវាផ្តើមចេញពីសុខសន្តិភាព ហើយអ្វីដែលពិសេសបំផុតនោះ គឺសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបង្កើតឲ្យមានគោលនយោបាយសុខដុម្បនីយកម្មជាតិសាសន៍ ដែលទទួលបានការកោតសរសើរពីអង្គការ សហប្រតិបត្តិការឥស្លាម OIC ដែលមានប្រទេសជាសមាជិកចំនួន ៥២ប្រទេស»។

អំណោយដែលចែកជូនប្រជាពលរដ្ឋ គឺជាការឧបត្ថម្ភរបស់អង្គការសម្ព័ន្ធពិភពឥស្លាម (RABITA) សហការជាមួយអង្គការមូលនិធិអភិវឌ្ឍន៍មុស្លិមកម្ពុជា ក្នុងមួយគ្រួសារទទួលបាន អង្ករ២០គីឡូក្រាម, ស្ករស២គីឡូក្រាម, ប្រេងឆា២លីត្រ, ត្រីខ៤កំប៉ុង, មី១០កញ្ចប់, សាប៊ូដុសខ្លួន៤ដុំ, សាប៊ូលាងចាន១ដប និងអំបិល១គីឡូក្រាម៕