បញ្ជាការដ្ឋានកងទ័ពជើងគោក បានទទួលរថយន្តចំនួន១០គ្រឿងពីក្រុមហ៊ុនឯកជនកម្ពុជាតេលា។ រថយន្ត ទាំង១០គ្រឿងរបស់ក្រុមហ៊ុនកម្ពុជាតេលាក្នុងនោះរួមមានរថយន្តប្រភេទដឹកជញ្ជូនអ្នកដំណើរ ចំនួន ៤គ្រឿង និងរថយន្តដឹកប្រេងឥន្ធនៈ ចំនួន០៦គ្រឿង ត្រូវបានប្រគល់នាព្រឹកមិញនេះ ជូនដល់បញ្ជាការដ្ឋានកងទ័ព ជើងគោក និងបញ្ជាការដ្ឋានជាតិកម្លាំងពិសេសប្រឆាំងភេរវកម្ម។ ពិធីប្រគល់និងទទួលរថយន្ត បានធ្វើឡើង នៅទីបញ្ជាការកងទ័ពជើងគោ ក្រោមវត្តមានរបស់លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក។ លោកឧកញ៉ា ឈុន អូន អគ្គនាយកក្រុម ហ៊ុនកម្ពុជាតេលា បានអញ្ជើញចូលរួមក្នុងវេលានោះផងដែរ។

លោកឧត្តមសេនីយ៍ឯក ហ៊ុន ម៉ាណែត បានថ្លែងអំណរគុណដល់ក្រុមហ៊ុនកម្ពុជាតេលា ដែលជានិច្ចកាលតែង តែបានជួយឧត្ថម្ភគាំទ្រដល់កងទ័ព ទាំងការជួយផ្គត់ផ្គង់ប្រេងឥន្ធនៈ និងការជួយដោះស្រាយតម្រូវការផ្សេងៗ របស់កងទ័ពនាពេលកន្លងមក។  លោកបានចាត់ទុក ការផ្តល់រថយន្តទាំង១០គ្រឿងនៅពេលនេះ គឺពិតជាបាន ឆ្លើយតបទៅនឹងសេចក្តីត្រូវការជាក់ស្តែងរបស់អង្គភាពលើមធ្យោបាយដឹកជញ្ជូន ជាពិសេសការធានាម្ចាស់ការ ចល័តផ្គត់ផ្គង់ប្រេងឥន្ទនៈឱ្យបានទាន់ពេលវេលា នៅពេលមានតម្រូវការបន្ទាន់។ លោកឧកញ៉ា ឈុន អូន បាន សម្តែងនូវទឹកចិត្តរីករាយ និងប្តេជ្ញាបន្តជួយដល់កងទ័ពជានិច្ច ជាពិសេសនៅពេលមានតម្រូវការគ្រប់កាលៈ ទេសៈ៕