ប្រមុខអង្គការសហប្រជាជាតិជំរុញអោយរក្សាភាពអត់ធ្មត់ នៅក្រោយការស្លាប់របស់អ្នកជំនាញកំពូលផ្នែកវិទ្យាសាស្ត្រនុយក្លេអ៊ែរអ៊ីរ៉ង់
អ៊ីរ៉ង់៖ អគ្គលេខាធិការអង្គការសហប្រជាជាតិលោក អាន់តូនីញ៉ូ ហ្គូដទែរ៉េស នៅថ្ងៃសុក្រនេះ បានអំពាវនាវអោយគ្រប់គ្នារក្សាភាពអត់ធ្មត់ បន្ទាប់ពីអ្នកជំនាញកំពូលផ្នែកវិទ្យាសាស្ត្រនុយក្លេអ៊ែររអ៊ីរ៉ង់លោក ម៉ូហ៍សេន ហ្វាគ្រីហ្សាដេហ៍ ត្រូវបានគេធ្វើឃាត នេះបើតាមអ្នកនាំពាក្យអង្គការសហប្រជាជាតិ ចុះផ្សាយដោយ សារព័ត៌មានរ៉យទ័រនៅថ្ងៃទី២៨ ខែវិច្ឆិកា ឆ្នាំ២០២០ ។
អ្នកនាំពាក្យរបស់លោក ហ្គូដទែរ៉េស បានលើកឡើងថា ថ្ងៃនេះយើងបានទទួលដំណឹងថា អ្នកជំនាញកំពូលផ្នែកវិទ្យាសាស្ត្រនុយក្លេអ៊ែររអ៊ីរ៉ង់ត្រូវបានគេធ្វើឃាតស្ថិតនៅក្បែរទីក្រុងតេហេរ៉ង់… យើងសូមជម្រុញអោយគ្រប់គ្នារក្សាភាពអត់ធ្មត់ ហើយត្រូវជៀសវាងការធ្វើសកម្មភាពណាមួយ ដែលអាចនាំទៅរកការផ្ទុះភាពតានតឹងខ្លាំងឡើងនៅក្នុងតំបន់ ។
ការអំពាវនាវរបស់ប្រមុខអង្គការសហប្រជាជាតិ តាមរយៈអ្នកនាំពាក្យរបស់ខ្លួនខាងលើនេះ បានកើតមានឡើងក្រោយអ្នកជំនាញកំពូលផ្នែកវិទ្យាសាស្ត្រនុយក្លេអ៊ែររអ៊ីរ៉ង់លោក ម៉ូហ៍សេន ហ្វាគ្រីហ្សាដេហ៍ បានបាត់បង់ជីវិតនៅថ្ងៃសុក្រនេះ នៅក្នុងការវាយប្រហារមួយនៅខាងក្រៅទីក្រុងតេហេរ៉ង់ ខណៈអ៊ីរ៉ង់បានចោទប្រកាន់រឿងនេះលើអ៊ីស្រាអែល និងព្រមានអំពីការសងសឹកធ្ងន់ធ្ងរ ៕
