ភ្នំពេញ៖ យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា នាថ្ងៃទី១១ ខែមិថុនា ឆ្នាំ២០២០ បានឱ្យដឹងថា សម្ដេចអគ្គមហាសេនាបតីតេជោ ហ៊ុន សែន នាយកមន្ត្រីនៃព្រះរាជាណាចក្រកម្ពុជា បានសន្ទនាគ្នាតាមរយៈទូរស័ព្ទជាមួយឯ,ឧ នរិន្ទ្រៈ មុឌី (Narendra Modi) នាយករដ្ឋមន្ត្រីឥណ្ឌា ពីការជួយប្រជាជនរបស់ខ្លួននៅក្រៅប្រទេស ដើម្បីបញ្ជៀសពីការរាតត្បាតជំងឺកូវីដ-១៩។

តាមការប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា បានបន្តថា កិច្ចសន្ទនាតាមរយៈទូរស័ព្ទរវាងនាយកមន្រ្តីប្រទេសទាំងពីរនេះ បានធ្វើឡើងនាថ្ងៃទី១០ ខែមិថុនា ឆ្នាំ២០២០ ក្នុងនោះថ្នាក់ដឹកនាំកំពូលទាំង២ បានពិភាក្សាអំពីជំងឺរាតត្បាត COVID-19 ដោយព្រមព្រៀងជាមួយគ្នាក្នុងការបន្តកិច្ចសហប្រតិបត្តិការ ដើម្បីជួយប្រជាជនរបស់ខ្លួននៅក្រៅប្រទេស និងសម្រួលដល់ការជម្លៀសពួកគេ។

ក្នុងជំនួបនេះ ឯ,ឧ នរិន្ទ្រៈ មុឌី បានបង្ហាញពីការប្តេជ្ញាចិត្តរបស់ឥណ្ឌា ក្នុងការពង្រឹងទំនាក់ទំនងរបស់ខ្លួនជាមួយប្រទេសកម្ពុជា ដែលជាសមាជិកសំខាន់មួយរបស់អាស៊ាន ហើយក៏ជាប្រទេសមិត្តមួយដែលមានទំនាក់ទំនងអរិយធម៌ និងវប្បធម៌ស្រដៀងគ្នាជាមួយឥណ្ឌា។ ថ្នាក់ដឹកនាំទាំង២ ក៏បានពិនិត្យឡើងវិញនូវភាពជាដៃគូអភិវឌ្ឍន៍ដ៏រឹងមាំរវាងប្រទេសទាំង២ រួមមានកម្មវិធីកសាងសមត្ថភាព ក្រោមគ្រោងកិច្ចសហប្រតិបត្តិការបច្ចេកទេសសេដ្ឋកិច្ចឥណ្ឌា (ITEC) និងគម្រោងទទួលផលរហ័សក្រោមក្របខណ្ឌសហប្រតិបត្តិការទន្លេមេគង្គ-ទន្លេគង្គា។

សម្ដេចតេជោ ហ៊ុន សែន បានសង្កត់ធ្ងន់លើសារសំខាន់ ដែលប្រទេសកម្ពុជាយកចិត្តទុកដាក់ចំពោះទំនាក់ទំនងជាមួយឥណ្ឌា។ ជាមួយគ្នានេះ សម្តេចនាយករដ្ឋមន្រ្តី ក៏បានឆ្លើយតបប្រកបដោយមនោសញ្ចេតនា និងបានសង្កត់ធ្ងន់លើតួនាទីដ៏មានតម្លៃ របស់ប្រទេសកម្ពុជា ក្នុងគោលនយោបាយច្បាប់បូព៌ារបស់ប្រទេសឥណ្ឌា។

ក្នុងសេចក្តីប្រកាសព័ត៌មានបានបញ្ជាក់ទៀតថា ថ្នាក់ដឹកនាំទាំងពីរ ក៏បានប្តេជ្ញាបន្តពង្រឹង និងពង្រីកសហប្រតិបត្តិការទ្វេភាគីឲ្យកាន់តែស៊ីជម្រៅថែមទៀត ដោយនាយករដ្ឋមន្ត្រីឥណ្ឌា ចាត់ទុកប្រទេសកម្ពុជា ថាជាផ្នែកដ៏សំខាន់មួយនៃនយោបាយ ធ្វើសកម្មភាពឆ្ពោះទៅទិសខាងកើតរបស់ឥណ្ឌា ។ ថ្នាក់ដឹកនាំទាំងពីរ ថែមទាំងបានប្តេជ្ញាបន្តពង្រឹង សហប្រតិបត្តិការតំបន់ ក្នុងនោះរួមមានក្របខ័ណ្ឌ ASEAN-India និងមេគង្គ-គង្គា។ ពាក់ព័ន្ធនឹងសហប្រតិបត្តិការផ្នែកវប្បធម៌ និងបុរាណវិទ្យា នាយករដ្ឋមន្ត្រី ម៉ូឌី បានសម្ដែងការពេញចិត្តចំពោះការទុកចិត្តឲ្យឥណ្ឌា ធ្វើជាសហប្រធាននៃគណៈកម្មាធិការ សម្របសម្រួលអន្តរជាតិ ដើម្បីស្តារ និងអភិវឌ្ឍន៍ប្រាសាទព្រះវិហាររបស់កម្ពុជា។

សេចក្តីប្រកាសព័ត៌ដដែល បានឱ្យដឹងទៀតថា នៅថ្ងៃទី១២ ខែមិថុនា យន្តហោះ១គ្រឿង នឹងដឹកប្រជាពលរដ្ឋ និងនិស្សិតកម្ពុជាចំនួន៦០នាក់ ពីប្រទេសឥណ្ឌាមកកម្ពុជាវិញ ហើយនៅថ្ងៃទី១១ ខែមិថុនានេះ ប្រជាពលរដ្ឋឥណ្ឌា បានវិលត្រឡប់ទៅប្រទេសវិញ និងមួយជើងទៀតនឹងដឹកពលរដ្ឋឥណ្ឌា២៨០នាក់ ត្រឡប់ទៅស្រុកកំណើតវិញ នៅថ្ងៃទី១៩ ខែមិថុនា ឆ្នាំ២០២០។

ជាមួយគ្នានេះដែរ ថ្នាក់ដឹកនាំប្រទេសទាំងពីរ បានឯកភាពគ្នាថា ដំណើរទៅមុខដើម្បីស្តាស្ថានភាពសេដ្ឋកិច្ចសង្គមក្រោយវិបត្តិជំងឺកូវីដ១៩ ទាមទារឱ្យមានកិច្ចសហប្រតិបត្តិការ និងការសម្របសម្រួលជាអន្តរជាតិកាន់តែខ្លាំងជាងមុន។

ឯ,ឧនាយករដ្ឋមន្ត្រីឥណ្ឌា ក៏បានកោតសរសើរចំពោះការដាក់ចេញវិធានការទាំងឡាយរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ក្នុងការគ្រប់គ្រងស្ថានភាពជំងឺកូវីដ១៩ រហូតទទួលបានលទ្ធផលល្អប្រសើរ។ ឯ,ឧ នាយករដ្ឋមន្ត្រីឥណ្ឌា បានចាត់ទុកវិធានការរបស់សម្តេចតេជោ អាចធ្វើជាគំរូមួយសម្រាប់ពិភពលោក ក្នុងការប្រយុទ្ធប្រឆាំងនឹងជំងឺកូវីដ១៩នេះ៕