ភ្នំពេញ៖ ដោយមានគោលការណ៍ដឹកនាំផ្ទាល់ពី លោក ពេជ្រ កែវមុនី អភិបាល ខណ្ឌមានជ័យ គណៈបញ្ជាការឯកភាពខណ្ឌ លោក ឌី រ័ត្នខែមរុណ អភិបាលរង ខណ្ឌមានជ័យ នាព្រឹកថ្ងៃ ព្រហស្បតិ៍ ៦រោច ខែជេស្ឋ ឆ្នាំជូត ទោស័ក ព.ស ២៥៦៤ ត្រូវ និងថ្ងៃទី១១ ខែមិថុនា ឆ្នាំ២០២០ បានដឹកនាំ មន្ត្រីជំនាញខណ្ឌ សង្កាត់ ប្រជុំពិនិត្យប្រព័ន្ធលូ ដែលមានការកកស្ទះបង្ករឡើងដោយការដ្ឋាន ស្តុក-លក់ខ្សាច់ អ៊ីលីថុង ដែលមានម្ចាស់ឈ្មោះ សួន ណាផា  ស្ថិតនៅតាមបណ្តោយផ្លូវជាតិលេខ ២ ភូមិព្រែកតាគង់៣ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។

ក្នុងនោះដែរ លោក ឌី រ័ត្នខេមរុណ អភិបាលរង ខណ្ឌមានជ័យ បានដឹកនាំមន្ត្រីជំនាញប្រជុំលើផែនការដែរត្រូវដោះស្រាយបញ្ហាលិចលង់លំនៅដ្ឋានប្រជាពលរដ្ឋរួច បន្តធ្វើការចុះពិនិត្យប្រព័ន្ធលូចំនួន ៥ទីតាំង និងផ្លូវសំបុកមាន់ចំនួន ២កន្លែង ដែលរងផលប៉ះពាល់ដល់ប្រជាពលរដ្ឋធ្វើដំណើរលើផ្លូវសាធារណៈ និងស្នើសុំអោយ ដោះស្រាយបញ្ហាលិចលង់តាមផ្ទះរបស់ ពួកគាត់ផងដែរ ។

បន្ទាប់មក លោក ឌី រ័ត្នខេមរុណ អភិបាលរង ខណ្ឌមានជ័យ៖
– ស្នើឲ្យខាងក្រុមហ៊ុន ដែលបានបង្ករ អោយខ្សាច់ហូរចូលលូដែរបណ្តាលឲ្យស្ទះ និងតំរូវធ្វើការស្តារអោយបានរួចរាល់ និង ធ្វើការជួសជុលផ្លូវអោយបានស្អាតទើបអោយក្រុមហ៊ុនធ្វើការដឹកជញ្ជូនខ្សាច់បន្តទៀត ។
– ស្នើសុំក្រុមហ៊ុន ផ្អាកជាបណ្តោះអាសន្នរងចាំធ្វើប្រពន្ធ័លូ កាយខ្សាច់ចេញ អោយរួចរាល់សិនទើបអនុញ្ញាតិដឹកបន្ត ។
– ស្នើអោយក្រុមហ៊ុន ពន្លឿនការស្តារលូ និង ធ្វើផ្លូវអោយបានឆាប់រហ័សមុនរដូវវស្សាចូលមកដល់ ។
– ស្នើអោយក្រុមហ៊ុនរៀបចំប្រព័ន្ធចំរុះបង្ហូរកាកសំណល់តាមលក្ខណៈបទដ្ឋានបច្ចេកទេសអោយបានត្រឹមត្រូវ ។
– ស្នើអោយក្រុមហ៊ុន ដឹកជញ្ជូនគ្របតុង អោយបានត្រឹមត្រូវ និងដឹកត្រឹមទ្រុងកំអោយហូរហៀ ឬធ្លាក់ប្រឡាក់មកលើផ្លូវវាអាចធ្វើអោយប៉ះពាល់ដល់សោភ័ណភាពទីក្រុង ឬក៏អាចគ្រោះថ្នាក់ដល់ប្រជាពលរដ្ឋកំពង់ធ្វើដំណើរលើដងផ្លូវសាធារណៈផងដែរ ៕