ភ្នំពេញ៖ កាលពីវេលាម៉ោង០១និង៤០នាទី ថ្ងៃទី១១ ខែមិថុនា ឆ្នាំ២០២០ កម្លាំងល្បាតប៉ុស្ដិ៍នគរបាលរដ្ឋបាលនិរោធ  នៃអធិការដ្ឋាននគរបាលខណ្ឌច្បារអំពៅ បានឃាត់ខ្លួនជនសង្ស័យ២នាក់ ដែលពាក់ព័ន្ធករណី ប៉ុនប៉ងលួច នៅចំណុចមុខផ្ទះគ្មានលេខ ភូមិតាងៅកណ្តាល សង្កាត់និរោធ ខណ្ឌច្បារអំពៅ។

លោកវរសេនីយ៍ឯក ម៉ៅ សឿត អធិការនគរបាលខណ្ឌច្បារអំពៅ បានឲ្យដឹងថា ជនសង្ស័យដែលឃាត់ខ្លួនរួមមាន៖ ទី១-ឈ្មោះជឿង តឹង ភេទប្រុស អាយុ ៣៣ឆ្នាំ ជនជាតិវៀតណាម មុខរបរ ជាងបាញ់ថ្នាំឈើ។ និងទី២-ឈ្មោះ​ ជុង ញុក ភេទប្រុស អាយុ ១៩ឆ្នាំ ជនជាតិវៀតណាម មុខរបរ គ្មាន ។ ជនសង្ស័យទាំង០២នាក់ ស្នាក់នៅភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ។

ក្នុងរបាយការណ៍របស់លោកអធិការខណ្ឌច្បារអំពៅបានឲ្យដឹងថា៖ នៅថ្ងៃទី១១ ខែមិថុនា ឆ្នាំ២០២០ វេលាម៉ោង ០១និង៤០នាទី សមត្ថកិច្ចប៉ុស្តិ៍និរោធ ល្បាត មកដល់ចំណុចកើតហេតុ ក៏បានជួបជនសង្ស័យ០២នាក់ កំពុងឈរនៅទីនោះ  សមត្ថកិច្ចមានការសង្ស័យក៏ឃាត់ត្រួតពិនិត្យរកឃើញដែកកែច្នៃចុងស្រួចសម្រាប់ឆ្កឹះសោចំនួន២ ដែលជនសង្ស័យឈ្មោះ ជឿង តឹង លាក់ទុកក្នុងហោប៉ៅខោ ក៏ធ្វើការឃាត់ខ្លួនជនសង្ស័យទាំង ០២នាក់ រួមនឹងវត្ថុតាងបញ្ជូនមកអធិការដ្ឋាន នគរបាលខណ្ឌច្បារអំពៅ សាកសួរ។

គួររំលឹកថា កន្លងមកជនសង្ស័យឈ្មោះ ជុង ញុក ធ្លាប់ជាប់ពន្ធនាគារព្រៃសរយៈពេល ២ឆ្នាំ ៦ខែ ក្នុងឆ្នាំ២០១៧ ពីបទ ៖ ជួញដូរដោយខុសច្បាប់នូវសារធាតុញៀន៕ធ.ដ

ដោយ៖ ភារ៉ា និងប៊ុនធី