ភ្នំពេញ៖ កម្លាំងជំនាញ នៃអធិការដ្ឋាននគរបាលខណ្ឌឫស្សីកែវ សហការជាមួយនឹងកម្លាំងនគរបាលប៉ុសិ៍តស្វាយប៉ាក នៅវេលាម៉ោង១៥ និង៣០នាទីរសៀល ថ្ងៃទី១០ ខែមិថុនា ឆ្នាំ២០២០ បានចុះស្រាវជ្រាវ និងបង្ក្រាបជនសង្ស័យ៣នាក់ រួមទាំងដកហូតម្សៅក្រាមពណ៌សថ្លាសង្ស័យជាគ្រឿងញៀនចំនួន៣កញ្ចប់ តូចនៅចំណុចក្រុមទី១០​ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។

អធិការនគរបាលខណ្ឌឫស្សីកែវ ហ៊ាង ថារ៉េត បានឲ្យដឹងថា ក្នុងប្រតិបត្តិការនោះសមត្ថកិច្ចយើងឃាត់ខ្លួនបាន ជនសង្ស័យចំនួន៣នាក់រួមមាន៖
ទី១-ឈ្មោះ វ៉ែន សម្បត្តិ ភេទប្រុស អាយុ២០ឆ្នាំ ជនជាតិខ្មែរ មានទីលំនៅភូមិទូលអំពិល ឃុំទួលអំពិល ស្រុកពញាឮខេត្តកណ្តាល មុខរបកម្មកររោងចក្រ។
ទី២-ឈ្មោះ ផាត់ រិទ្ធ ភេទប្រុស អាយុ១៩ ឆ្នាំ ជនជាតិខ្មែរ មានទីលំនៅភូមិស្ដុក ឃុំភ្នំបាត ស្រុកពញាឮ ខេត្តកណ្តាល មុខរបរជាងដែក។

ទី៣-ឈ្មោះ ទូច កែវ ភេទប្រុសអាយុ២១ឆ្នាំ ជនជាតិខ្មែរ មានទីលំនៅ ភូមិកោះចិន ឃុំកោះចិន ស្រុកពញាឮខេត្តកណ្តាល មុខរបកម្មករ។ ចំណែកសម្ភារដកហូតបានមានម្សៅក្រាមពណ៌សថ្លាចំនួន៣កញ្ចប់តូច។

បច្ចុប្បន្ននេះ ជនសង្ស័យ រួមនឹងវត្ថុតាងត្រូវបានកម្លាំងជំនាញបញ្ជូនទៅកាន់អធិការដ្ឋាន នគរបាលខណ្ឌឫស្សីកែវ ដើម្បីកសាងសំណុំរឿងបញ្ជូនទៅតុលាការផ្ដន្ទាទោសតាមច្បាប់៕ធ.ដ

ដោយ៖  ភារ៉ា  និងប៊ុនធី