មានក្រុមហ៊ុន៤បោះទុនវិនិយោគថ្មីបង្កើតការងារជាង៤០០០កន្លែង
ក្រុមប្រឹក្សាអភិវឌ្ឍន៍កម្ពុជាបានអនុម័តឱ្យក្រុមហ៊ុនឱ្យក្រុមហ៊ុន៤បោះទុនវិនិយោគនៅកម្ពុជាដែលបង្កើតការងារបានចំនួន៤០៦៥កន្លែងដែលមានទឹកប្រាក់វិនិយោគ៦២.៤លានដុល្លារ។
ក្រុមហ៊ុនទី១មានឈ្មោះថា ១-“HUA TE BANG (CAMBODIA) CO., LTD.ជាក្រុមហ៊ុនរោងចក្រផលិតផលិតផលពីប្លាស្ទីកគ្រប់ប្រភេទ ដែលមានទីតាំងវិនិយោគស្ថិតនៅភូមិត្រពាំងត្រប់ សង្កាត់បឹងធំ ខណ្ឌកំបូល រាជធានីភ្នំពេញ មានទុនវិនិយោគប្រមាណ ២,៨លានដុល្លារអាមេរិក និងអាចបង្កើតការងារបានចំនួន ២១៦កន្លែង។
ក្រុមហ៊ុនទី២ មានឈ្មោះថា “PRINTX GP (CAMBODIA) FACTORY CO., LTD.” ជារោងចក្រផលិតកាបូបគ្រប់ប្រភេទ និងគ្រឿងបន្សំកាបូប ដែលមានទីតាំងវិនិយោគស្ថិតនៅផ្លូវជាតិលេខ៥១ ភូមិត្រពាំងផ្លុង ឃុំដំណាក់រាំង ស្រុកឧដុង្គ ខេត្តកំពង់ស្ពឺ មានទុនវិនិយោគប្រមាណ ៦,៦លានដុល្លារអាមេរិក និងអាចបង្កើតការងារបានចំនួន ១.៤១៤កន្លែង។
ក្រុមហ៊ុនទី៣ មានឈ្មោះថា “DIZE (CAMBODIA) NONG YE FAZHAN CO., LTD.” ជាកសិដ្ឋានដាំដំណាំចេក ដែលមានទីតាំងវិនិយោគស្ថិតនៅភូមិមាឃ ឃុំព្រែកកក់ ស្រុកស្ទឹងត្រង់ ខេត្តកំពង់ចាម មានទុនវិនិយោគប្រមាណ ១៧,៨លានដុល្លារអាមេរិក និងអាចបង្កើតការងារបានចំនួន ១.៩០០កន្លែង។
និងទី៤ ជាក្រុមហ៊ុន “SUN & MOON HOTEL CO., LTD.” គម្រោងសាងសង់និងអាជីវកម្មសណ្ឋាគារថ្នាក់ផ្កាយ៤ ចំនួន ២០០បន្ទប់ ដែលមានទីតាំងវិនិយោគស្ថិតនៅដីឡូតិ៍លេខ ២៨៥ មហាវិថីព្រះនរោត្តម ជាប់ស្ពានព្រះមុនីវង្ស កែងផ្លូវលេខ២៣៣ សង្កាត់ទន្លេបាសាក់ ខណ្ឌចំការមន រាជធានីភ្នំពេញ មានទុនវិនិយោគប្រមាណ ៣៥,២លានដុល្លារអាមេរិក និងអាចបង្កើតការងារបានចំនួន ៥៣៥កន្លែង។
ការបង្កើតរោងចក្រនេះគឺនៅចំពេលដែលកម្ពុជារងសម្ពាធខ្លាំងពីជំងឺកូវីដ១៩ដែលធ្វើឱ្យមនុស្សរាប់ម៉ឺននាក់បាត់បង់ការងារធ្វើ៕
