អតីតប្រធានផ្នែកបច្ចេកទេស នៃសមាគមអ្នកផលិតអំបិលខេត្តកំពត-កែប បញ្ជាក់ថា ដោយសារអាកាសធាតុមិនសូវអំណោយផល ធ្វើអោយកន្លែងផលិតអំបិលមួយចំនួនមានសភាពយឺតយ៉ាវ ប៉ុន្តែកន្លែងខ្លះទៀតជិតចាប់ផ្ដើមប្រមូលផលជាបណ្ដើរៗដែរហើយ
រដូវកាលចាប់ផ្ដើមផលិតអំបិលឆ្នាំថ្មីនេះ គឺតាំងពីចុងខែតុលាកន្លងមក ប៉ុន្ដែដោយសារអាកាសធាតុមិនសូវអំណោយផល ទើបធ្វើឱ្យកន្លែងផលិតអំបិលមួយចំនួនមានសភាពយឺតយ៉ាវ ប៉ុន្តែកន្លែងខ្លះទៀតជិតចាប់ផ្ដើមប្រមូលផលជាបណ្ដើរៗដែរហើយ នេះបើតាមការបញ្ជាក់របស់លោក ប៊ុន ណារិន អតីតប្រធានផ្នែកបច្ចេកទេស នៃសមាគមអ្នកផលិតអំបិលខេត្តកំពត-កែប ។
លោកបន្តថា ការងារផលិតអំបិលនេះ គឺពឹងផ្អែកទៅលើអាកាសធាតុ ដោយត្រូវការពន្លឺថ្ងៃល្អ និងគ្មានភ្លៀងធ្លាក់ជាដើម ។ លោកបន្ថែមថា សម្រាប់ឆ្នាំ២០១៩-២០២០នេះ ផលិតផលយើងផ្គត់ផ្គង់ក្នុងស្រុកបាន ដោយសារមាននៅសល់ចុងឆ្នាំ។ ពេលធ្វើស្ថិតិប្រហែលនៅខែ៧ សល់ប្រហែលជាង៣ម៉ឺនតោន ប៉ុន្ដែឥឡូវចុងឆ្នាំនេះ សល់ប្រហែលជាង១ម៉ឺនតោន តែអំបិលថ្មីយើងចាប់ផ្ដើមមានហើយ អ៊ីចឹងតាមខ្ញុំពិនិត្យមើលមេឃឆ្នាំនេះ ផលយើងអាចផ្គត់ផ្គង់បានគ្រប់ក្នុងរដូវកាលបាន ។
លោកបញ្ជាក់ទៀតថា ការផលិតអំបិលឆ្នាំកន្លងទៅនោះ ទទួលបានទិន្នផលខ្ពស់ ដែលអាចគ្រប់គ្រាន់ក្នុងការផ្គត់ផ្គង់តម្រូវការទីផ្សារ ហើយសម្រាប់ចុងឆ្នាំនេះសល់ក្នុងឃ្លាំងប្រហែលជាង១ម៉ឺនតោន ដើម្បីបន្ដផ្គត់ផ្គង់ការប្រើប្រាស់ទៅឆ្នាំថ្មីបន្ដទៀត ។ លោកសង្ឃឹមថា ឆ្នាំនេះអ្នកផលិតអាចបានច្រើនជាងឆ្នាំមុន ដោយអ្នកដែលបោះបង់ការផលិតកាលពីឆ្នាំមុន បាន ចាប់ផ្ដើមផលិតវិញ ។ គួរបញ្ជាក់ថា បច្ចុប្បន្នសមាជិកអ្នកផលិតអំបិលខេត្តកំពត-កែប មានជាង១៧០ក្រុម នៅលើផ្ទៃដីផលិតដែលប្រកាសដោយក្រុមអ្នកផលិតមានជាង៤ពាន់ហិកតា ៕
