គណៈកម្មាធិការជាតិ រៀបចំកីឡាអាស៊ីអាគ្នេយ៍ លើកទី៣២ ឆ្នាំ២០២៣ ហៅកាត់ថា CAMSOC ម្សិលមិញនេះ បានកោះហៅមន្រ្តីជំនាញគ្រប់ផ្នែកមកជួប ប្រជុំពិនិត្យលទ្ធផលការងារ សម្រេចបានក្នុងឆ្នាំ២០២០ និងលើកទិសដៅការងារបន្តឆ្នាំ២០២១ ។ កិច្ចប្រជុំនេះ បានធ្វើឡើង ក្រោមវត្តមាន ឯកឧត្តម បណ្ឌិត ថោង ខុន អនុប្រធានគណៈកម្មាធិការអចិន្ត្រៃយ៍ នៃគណៈកម្មាធិការ ជាតិរៀបចំកីឡាអាស៊ីអាគ្នេយ៍ លើកទី៣២ ឆ្នាំ២០២៣ នៅទីស្នាក់ការគណៈកម្មាធិការជាតិអូឡាំ​ពិក​កម្ពុជា។

ឯកឧត្តម វ៉ាត់ ចំរើន អគ្គលេខាធិការ CAMSOC បានបញ្ជាក់ថា ឆ្នាំ២០២០នេះ ទោះបី មានបញ្ហារំខានពីជំងឺកូវីដ១៩យ៉ាងណាក្តី ក៏ CAMSOC នៅតែបន្តដាក់ទិសដៅរៀបចំការងារ ទៅ​តាម​ផែនការ​ការងារ ដែលបានគ្រោងទុក សម្រេចបានលទ្ធផល ជោគជ័យលើសការរំពឹងទុក ក្នុងដំណើរ​ឆ្ពោះទៅរកភាពជោគជ័យ នៅស៊ីហ្គេម លើកទី៣២ ឆ្នាំ២០២៣។

អគ្គលេខាធិការ ខាងលើអះអាងទៀតថា កិច្ចប្រជុំនេះ ក្រៅពីពិនិត្យមើលលទ្ធផលការងារ​ ក្នុងឆ្នាំ២០២០ និងទិសដៅផែនការសម្រាប់ឆ្នាំ២០២១ CAMSOC ក៍បានលើកបញ្ហាប្រឈមមួយ​ចំនួន ដូចជាជំងឺកូវីដ១៩ ដើម្បីជាវិធានការរកដំណោះស្រាយក្នុងឆ្នាំ២០២១ ​ឲ្យរួចរាល់ឈានទៅ​សម្រេច​តាមទិសដៅឬផែនការគ្រោងទុករបស់ CAMSOC ធ្វើយ៉ាងឲ្យជោគជ័យនៅឆ្នាំ២០២៣​ដែល​យើង​ទទួលធ្វើជាម្ចាស់ផ្ទះ។

អគ្គលេខាធិការ ខាងលើ បន្ថែមទៀតថា ទិសដៅបន្តឆ្នាំ២០២១ ត្រូវសម្រេចអោយរួចរាល់ នាចុងឆ្នាំ២០២១ ក្នុងនោះត្រូវរៀបចំផែនការបច្ចេកទេស ទីលានប្រកួត និងរៀបចំបញ្ចូលវិញ្ញា​សាត្រៀមប្រកួតប្រជែងជាដើម។

សូមបញ្ជាក់ថា របាយការណ៍ការងារសម្រេច របស់គណៈកម្មាធិការ CAMSOC ក្នុងឆ្នាំ​២០២០ និងទិសដៅអនុវត្តការងារបន្ត​ក្នុងឆ្នាំ២០២១​ ដូចជា រៀបចំធ្វើ​មហាសន្និបាត​ធំៗ នៅថ្ងៃទី១៨ ខែមករា ឆ្នាំ២០២១ ក្រោមអធិបតីភាពសម្តេចពិជ័យសេនា ទៀបាញ់ ប្រធានគណៈ​កម្មាធិការ​ជាតិ​រៀប​ចំ​កីឡា​អាស៊ីអាគ្នេយ៍លើកទី៣២ ឆ្នាំ ២០២៣៕