កងកម្លាំងឆ្មាំជាតិ១២នាក់ត្រូវដកចេញពីតួនាទី នៅមុនពិធីស្បថឡើងកាន់តំណែងរបស់លោក ចូ បៃដិន (Video)
អាមេរិក៖ សមាជិក១២នាក់នៃកងកម្លាំងឆ្មាំជាតិអាមេរិក ត្រូវបានដកចេញពីក្រុមរក្សាសន្តិសុខ និងសុវត្ថិភាពក្នុងពិធីស្បថឡើងកាន់តំណែងរបស់លោក ចូ បៃដិន ក្រោយមានការស៊ើបអង្កេតពីសំណាក់ក្រុមភ្នាក់ងារ FBI ។
បើតាមអគ្គមេបញ្ជាការនៃកងកម្លាំងឆ្មាំជាតិអាមេរិក នាយឧត្ដមសេនីយ៍ ដានីញែល ហូកាន់សុន សមាជិក០២នាក់ក្នុងចំណោមពួកគេ ត្រូវបានដកចេញពីតួនាទី ក្រោយពួកគេបានបញ្ចេញយោបល់មិនត្រឹមត្រូវ និង មានលក្ខណៈជ្រុលនិយម នៅលើបណ្ដាញសង្គម ។ ដោយឡែកសមាជិក១០នាក់ទៀតក៏ត្រូវបានដកតួនាទីផងដែរ បន្ទាប់ពីពួកគេមានជាប់ពាក់ព័ន្ធនឹងសកម្មភាពបទល្មើសមុនៗ ប៉ុន្តែមិនមានជាប់ពាក់ព័ន្ធដោយផ្ទាល់ ជាមួយពិធីស្បថចូលកាន់តំណែងឡើយ ។
សូមជម្រាបជូនថា ការដកចេញនូវកងកម្លាំងឆ្មាំជាតិអាមេរិកទាំង១២នាក់ខាងលើនេះ បានកើតមានឡើងស្របពេលដែលកងកម្លាំងឆ្មាំជាតិប្រមាណ២ម៉ឺន៥ពាន់នាក់ត្រូវបានដាក់ពង្រាយការពារសន្តិសុខ និងសុវត្ថិភាព នៅថ្ងៃលោក ចូ បៃដិន ស្បថចូលកាន់តំណែងជាប្រធានាធិបតីទី៤៦ របស់សហរដ្ឋអាមេរិក នៅថ្ងៃពុធនេះ (ម៉ោងក្នុងតំបន់) ៕
