សមុទ្រឈើ-ភ្នំបាយឆៅគឺជាកន្លែងទេសចរណ៍គយគន់ទេសភាពព្រៃឈើដ៏ស្រស់ត្រកាល ក្នុងខេត្តមណ្ឌលគិរី
ដោយ៖ម៉ាដេប៉ូ
មណ្ឌលគិរី៖សមុទ្រឈើគឺជាកន្លែងតែមួយគត់ដែលអ្នកទេសចរបានលឺពាក្យនេះកាលបើធ្វើដំណើរទៅដល់ ខេត្ត មណ្ឌលគិរី។ទីកន្លែងដែលអ្នកទេសចរអាចធ្វើដំណើរទៅកាន់ទីនោះ ហើយដែលគេបានស្គាល់ស្ទើរគ្រប់គ្នានោះគឺសមុទ្រឈើ ភ្នំបាយឆៅ ដែលមានទីតាំងស្ថិតនៅ ភូមិឡៅកា ឃុំសុខដុម ក្រុងសែនមនោរម្យ ខេត្តមណ្ឌលគិរី និងមានចម្ងាយប្រហែល៦គីឡូម៉ែត្រ ពីរង្វង់មូលគោព្រៃ។
តាមពិតសមុទ្រឈើ ភ្នំបាយឆៅស្ថិតនៅក្នុងប្រភេទ រមណីយដ្ឋាន ព្រៃភ្នំ។ទីនេះជាកន្លែង ទេសចរណ៍កែច្នៃឬរមណីយដ្ឋានកែច្នៃ មានទេសភាពស្រស់ត្រកាលនៃព្រៃភ្នំ។ អ្វីដែលជាចំណុចសំខាន់ៗ ក៏ដូចជាភាពទាក់ទាញនៃរមណីយដ្ឋានសមុទ្រឈើ ភ្នំបាយឆៅដែលអាចធ្វើឱ្យភ្ញៀវទេសចរមានចំណាប់អារម្មណ៏នោះ មានដូចជា៖ ទស្សនាទេសភាពព្រៃឈើពីកំពូលភ្នំ គយគន់ថ្ងៃរះពេលព្រឹកព្រលឹម គយគន់ថ្ងៃលិច សួនផ្កាកែច្នៃ កន្លែងបោះតង់ និងខ្យល់អាកាសបរិសុទ្ធនាព្រៃភ្នំជាដើម។
ស្ទើរជារៀងរាល់ថ្ងៃតំបន់ទេសចរណ៍ ភ្នំបាយឆៅនេះគេតែងតែសង្កេតឃើញមានអ្នកដំណើរ និងភ្ញៀវទេសចរឈប់ចតរថយន្ត ដើម្បីថតរូបទេសភាពដែលចេញពីធម្មជាតិដ៏ស្រស់ត្រកាល ដែលគេអាចមើលឃើញនូវព្រៃភ្នំដ៏ខៀវស្រងាត់គ្រប់រដូវកាល ដោយធ្វើឱ្យអ្នកដែលបានទៅដល់ម្តងហើយ នឹងចង់ទៅម្តងទៀតមិនចេះនឿយណាយ។
ជាមួយគ្នា នៅលើកំពូលភ្នំដ៏ខ្ពស់ភ្ញៀវទេសចរទាំងឡាយបាននាំគ្នាទៅឈរពីលើកំពូលភ្នំសម្លឹងចុះមកក្រោមឃើញទេសភាពធម្មជាតិព្រៃភ្នំដាច់កន្ទុយភ្នែក គួរឱ្យចង់គយគន់ក្រៃលែង។ ភ្ញៀវខ្លះបានត្រេកត្រអាលជាមួយនឹងការថតរូបទេសភាពដ៏ស្រស់បំព្រងគ្មានពីរនៅទីនោះ។
ក្រៅពីកន្លែងទស្សនាព្រៃឈើ ការស្រូបយកខ្យល់អាកាសភ្ញៀវទេសចរក៏អាចរកកន្លែងអង្គុយលំហែរកាយដោយក្នុងនេះ មានខ្យូសអង្គុយ រឺក៏តូបអង្គុយជាច្រើនសម្រាប់ភ្ញៀវទេសចរ។ក្រៅពីនេះក៏មានសេវាកម្មទទួលកម្មង់អាហារបរិភោគផងដែរ។
យ៉ាងណាក្តីតំបន់ទេសចរណ៍កន្លែងនេះពុំទាន់មានសណ្ឋានគារ ផ្ទះសំណាក់ឬកន្លែងសម្រាកពេលយប់នៅឡើយទេក្រៅអំពីបោះតង់ ។ហេតុនេះអ្នកទេសចរណ៍ទៅកាន់កន្លែងនេះត្រូវធ្វើដំណើរទៅសម្រាកនៅកន្លែងផ្សេងវិញ។
អ្នកទេសចរទៅកាន់ខេត្តមណ្ឌលគិរីមិនគួរមើលរំលងតំបន់សមុទ្រឈើភ្នំបាយឆៅមួយកន្លែងនេះឡើយ៕
