ទីបំផុតឥណ្ឌា និងចិនដកកងទ័ពរួចរាល់ចេញពីផ្នែកខ្លះនៃព្រំដែនជម្លោះ ក្រោយភាពតានតឹងបានកើនឡើងជាច្រើនខែ
ឥណ្ឌា៖ មន្រ្តីឥណ្ឌា និងចិននៅថ្ងៃអាទិត្យម្សិលមិញបញ្ជាក់ថា កងទ័ពប្រទេសទាំងពីរបានសំរេចសព្វគ្រប់នូវការដកទ័ពពីផ្នែក ដែលមានជម្លោះមួយនៃព្រំដែនភ្នំហិម៉ាឡៃ របស់ពួកគេ បន្ទាប់ពីភាពតានតឹងបានកើនឡើងជាច្រើនខែ ។
ក្រសួងការពារជាតិឥណ្ឌាបានឱ្យដឹងនៅក្នុងសេចក្តីថ្លែងការណ៍រួមជាមួយចិនថា អំឡុងកិច្ចចរចាជុំទី ១០ កាលពីថ្ងៃសៅរ៍កន្លងទៅ ភាគីទាំងពីរបានវាយតម្លៃជាវិជ្ជ មានចំពោះការបំពេញការដកកងទ័ពជួរមុខដោយរលូនចេញពីតំបន់បឹង ផាងហ្គុង ។ បើតាមសេចក្តីថ្លែងការណ៍ដដែលនេះ វាជាជំហានឆ្ពោះទៅមុខដ៏សំខាន់ ដែលផ្តល់នូវចំណុចចាប់ផ្តើមដ៏ល្អ សម្រាប់ការដោះស្រាយជម្លោះផ្សេងទៀតនៅក្នុងតំបន់ភាគខាងលិចនៃព្រំដែនដែលមានជម្លោះ ។
បន្ថែមលើនេះ ភាគីទាំងពីរបានឯកភាពគ្នា បន្តការប្រាស្រ័យទាក់ទង និងការសន្ទនាគ្នា ធ្វើឱ្យមានស្ថិរភាពនិងគ្រប់គ្រងស្ថានការណ៍ជាក់ស្តែង ក៏ដូចជាជំរុញឱ្យមានដំណោះស្រាយ ដែលអាចទទួលយកបានទៅវិញទៅមកនៃបញ្ហាដែលនៅសេសសល់ ៕ ប្រភព៖ Reuters
