ក្រសួងធនធានទឹក និងឧតុនិយម និង អាជ្ញាធររដ្ឋបាលខេត្តបាត់ដំបង បានសាងសង់នូវទំនប់សណ្តរ ដែលជាសំណង់ស្ទាក់ទឹកមួយកន្លែងនៅក្នុងភូមិសាស្ត្រឃុំតាក្រី ស្រុកកំរៀង ខេត្តបាត់ដំបង ដោយកំណត់ឈ្មោះជា៖”ទំនប់ស្ទាក់ទឹកតាក្រី”ស្ថិតតាមដងស្ទឹងមង្គលបុរី ដើម្បីធានានូវការស្រោចស្រពលើផ្ទៃដីដំណាំកសិកម្ម ដែលភាគច្រើន(ដំណាំចម្ការ) ប្រមាណជាង២.០០០ហិកតាហើយគំរោងអភិវឌ្ឍន៍ហេដ្ឋារចនាសម្ព័ន្ធប្រព័ន្ធធារាសាស្ត្រ នៃទំនប់ស្ទាក់ទឹកនេះ គឺគ្រោងបញ្ចប់ការសាងសង់របស់ខ្លួននៅខែកញ្ញាឆ្នាំ២០២១ ខាងមុខនេះ។

ថ្លែងឲ្យដឹងនូវក្នុងពិធីសែនក្រុងពាលីដើម្បីសុំសេចក្តីសុខដើម្បីបើកការដ្ឋានសាងសង់ទំនប់ស្ទាក់ទឹកតាក្រីដែលស្ថិតនៅភូមិម្នាស់ក័ល្ល(ម្នាស់កាល់) ឃុំអូរដា និង ភូមិកំពង់ចម្លងក្រោម ឃុំចក្រី ស្រុកកំរៀង នៃ ខេត្តបាត់ដំបង នៅព្រឹក ថ្ងៃទី៤ ខែមិនាឆ្នាំ២០២១នេះ។ លោក សុខ ដារ៉ា អនុប្រធាននាយកដ្ឋានវិស្វកម្ម នៃក្រសួងធនធានទឹកនិងឧតុនិយម បានលើកឡើងថា៖ ការសាងសង់ នូវប្រព័ន្ធធារាសាស្ត្រនេះ គឺ៖ដើម្បីឆ្លើយតបទៅនឹងសំណូមពររបស់ពលរដ្ឋនៅក្នុងតំបន់នេះ ក្នុងការនាំទឹក ពីទំនប់នេះទៅប្រើប្រាស់ និងស្រោចស្រព ការដាំដុះដំណាំតាមតម្រូវការរបស់ខ្លួន។ ជាពិសេសនៅអំឡុងរដូវប្រាំងដែលតែងជួបនូវបញ្ហាការខ្វះខាតទឹកជារៀងរាល់ឆ្នាំ ដោយសារតែមិនទាន់មានទំនប់ស្ទាក់ទឹកបានធ្វើឲ្យទឹកហូរទៅក្រោមអស់ ហើយពលរដ្ឋតែងតែខ្វះទឹកប្រើប្រាស់ នៅក្នុងរដូវប្រាំង ។

ឯកឧត្តម ងួន រតនៈ បានថ្លែងថា៖ ការសាងសង់ទំនប់ស្ទាក់ទឹកនៅទីនេះ គឺ៖ជាគម្រោង របស់រាជរដ្ឋាភិបាល តាមរយៈក្រសួងធនធានទឹក និងឧតុនិយម ហើយក៏ជាសំណូមពរ ដែលបងប្អូនប្រជាពលរដ្ឋ ក៏ដូចជាអាជ្ញាធរមូលដ្ឋានមានក្តីកង្វល់អំពីបញ្ហាប្រឈមខ្វះនូវប្រភពទឹកប្រើប្រាស់និងស្រោចស្រពដំណាំផ្សេងៗនៅរដូវប្រាំងកន្លងមក ដែលតែងតែលើកឡើងជាសំណូមពរនូវបញ្ហាប្រឈម ក្នុងអង្គវេទិកាសាធារណៈរបស់ក្រុមប្រឹក្សាខេត្តកន្លង
មកផងដែរ។

ឯកឧត្តម ងួន រតនៈ អភិបាលខេត្តបាត់ដំបង បានសង្កត់ធ្ងន់ទៀតថា៖គម្រោងទំនប់ស្ទាក់ទឹកតាក្រី នេះវានឹងក្លាយជាសមិទ្ធផលប្រព័ន្ធធារាសាស្ត្រថ្មីមួយបន្ថែមទៀតក្នុងខេត្តបាត់ដំបងខណៈការអភិវឌ្ឍនូវប្រព័ន្ធស្រោចស្រពដូចនេះ ត្រូវបានសាងសង់ នៅតាមបណ្តាស្រុកមួយចំនួនទៀត ។

ឯកឧត្តមអភិបាលខេត្តបាត់ដំបង ក៏បានថ្លែងអំណរគុណដល់រាជរដ្ឋាភិបាល តាមរយៈក្រសួងធនធានទឹក និងឧតុនិយម ដែលបាននិងកំពុងអភិវឌ្ឍនូវហេដ្ឋារចនាសម្ព័ន្ធប្រព័ន្ធធារាសាស្ត្រផ្សេងៗនៅក្នុងខេត្តបាត់ដំបង ដើម្បីបម្រើនូវផលប្រយោជន៍ប្រជាពលរដ្ឋនិងធ្វើឲ្យជីវភាពបងប្អូនកាន់តែមានភាពប្រសើរឡើង។

ដោយឡែក លោក សុខ ដារ៉ា អនុប្រធាននាយកដ្ឋានវិស្វកម្ម នៃក្រសួងធនធានទឹកនិងឧតុនិយម ក៏បានលើកឡើងបន្ថែមទៀតថា៖ ចំពោះការអភិវឌ្ឍគម្រោងនេះ ពេលធ្វើរួច វានឹងជួយស្រោចស្រពដំណាំកសិកម្មរបស់ពលរដ្ឋនៅទីនេះ ដែលភាគច្រើនជាដំណាំចម្ការ។ហើយថែមទាំងទទួលបាននូវ “ស្ពាន” ផងដែរ សម្រាប់ប្រជាពលរដ្ឋបានឆ្លងកាត់ នៅពេលដែលទំនប់នេះ គ្រោងនឹងបញ្ចប់នូវការសាងសង់អំឡុងខែកញ្ញាឆ្នាំ២០២១ខាងមុ
ខនេះ ។

សូមបញ្ជាក់ថា៖ នៅក្នុងអាណត្តិទី៦នេះ ខេត្តបាត់ដំបង មានទំនប់ស្ទាក់ជាច្រើនកន្ងែង ដែលបានសាងសង់រួច និងតែកំពុងធ្វើការសាងសង់បន្តជារួមមាន៖ទំនប់ស្ទាក់ទឹកពហុបំណងសេកសក ក្នុង
ស្រុករតនមណ្ឌល, ទំនប់ស្ទាក់ទឹកកង្ហត ស្រុកបាណន់ បានសាងសង់រួចនិងកំពុងប្រើប្រាស់។ និងដោយឡែក ទំនប់ស្ទាក់ទឹក ដែលកំពុងដំណើរការសាងសង់ ដូចជា៖ទំនប់ស្ទាក់ទឹកដូនទ្រី ស្រុករុក្ខគីរី និង ទំនប់ស្ទាក់ទឹក”សាលាតាអន” ក្នុងស្រុកឯកភ្នំ៕អ៊ុក សំអាន