មន្ត្រីទី២របស់គណបក្សសម្ព័ន្ធជាតិដើម្បីប្រជាធិបតេយ្យ NLD របស់លោកស្រី ស៊ូជី បានស្លាប់ក្នុងទីឃុំឃាំង ខណៈបាតុកម្មតវ៉ានៅតែបន្តទូទាំងប្រទេស
មីយ៉ាន់ម៉ា៖ អតីតសមាជិកសភាម្នាក់បាននិយាយថា មន្ត្រីម្នាក់ទៀតមកពីគណបក្សសម្ព័ន្ធជាតិដើម្បីប្រជាធិបតេយ្យ (NLD) របស់មេដឹកនាំដែលត្រូវបានទម្លាក់លោកស្រី អោងសាន ស៊ូជី បានស្លាប់ក្នុងទីឃុំខ្លួន បន្ទាប់ពីត្រូវបានចាប់ខ្លួនកាលពីថ្ងៃទី៩ ខែមីនាកន្លងទៅ ។
សមាជិកសភាជាន់ខ្ពស់ដែលត្រូវបានរំលាយគឺលោក Ba Myo Thein បានប្រាប់សារព័ត៌មានរ៉យទ័រថា មន្ត្រីគណបក្សលោក ហ្ស ម្យ៉ាត លីន (Zaw Myat Linn) ដែលជាប្រធានវិទ្យាស្ថានវិជ្ជាជីវៈ ស៊ូយូ វ៉ាក់ខេសិនណល អ៊ីនស្ទីជូត (Suu Vocational Institute) នៅក្នុងតំបន់ ស្វេ ផ្យី ថា (Shwe Pyi Thar) ត្រូវបានចាប់ខ្លួននៅពេលកម្លាំងសន្តិសុខវាយឆ្មក់វិទ្យាស្ថាន កាលពីយប់ថ្ងៃចន្ទឈានចូលថ្ងៃអង្គារនេះ ។ លោកជាមន្ត្រីទី២របស់គណបក្សសម្ព័ន្ធជាតិដើម្បីប្រជាធិបតេយ្យ (NLD) បានស្លាប់ក្នុងទីឃុំខ្លួន ហើយថា ឥឡូវនេះ សាច់ញាតិកំពុងព្យាយាមយកសពពីមន្ទីរពេទ្យទាហាន ។
សូមបញ្ជាក់ថា ការតវ៉ាដែលធ្វើឡើងនៅទីក្រុងរ៉ង់ហ្គូន និង តាមទីប្រជុំនានាទូទាំងប្រទេសមីយ៉ាន់ម៉ាកាលពីថ្ងៃអង្គារនេះ ត្រូវបានកងកម្លាំងសន្តិសុខធ្វើការបង្ក្រាបដោយបាញ់ឧស្ម័នទឹកភ្នែក និងបំផ្ទុះគ្រាប់បែក ខណៈមនុស្សពីរនាក់រងរបួស ក្នុងនោះម្នាក់របួសដោយគ្រាប់កាំភ្លើងនៅទីប្រជុំជន ម៉ូនីន ភាគខាងជើង ៕ ប្រភព៖ AP
