ថៃគ្រោងដកការរឹតត្បិតពាក់ព័ន្ធជំងឺ Covid-19 និង បើកប្រទេសឡើងវិញទាំងស្រុងនៅក្នុងខែតុលាខាងមុខនេះ
ថៃ៖ មជ្ឈមណ្ឌលគ្រប់គ្រងជំងឺកូវីដ១៩ (CCSA) របស់ថៃ នៅថ្ងៃពុធនេះបញ្ជាក់ថា ប្រទេសថៃនឹងបើកឡើងវិញទាំងស្រុងនៅត្រឹមខែតុលាខាងមុខ ហើយរាល់ការរឹតត្បិតពាក់ព័ន្ធជំងឺកូវីដ១៩នឹងត្រូវដកចេញ ប្រសិនបើគ្រប់វិស័យទាំងអស់បន្តសហប្រតិបត្តិការជាមួយរដ្ឋាភិបាល សម្រាប់កិច្ចខិតខំប្រឹងប្រែងទប់ស្កាត់ ។
ថ្លែងបន្ទាប់ពីកិច្ចប្រជុំអនុគណៈកម្មាធិការរបស់មជ្ឈមណ្ឌលគ្រប់គ្រងជំងឺកូវីដ១៩ (CCSA) ស្តីពីការបន្ធូរបន្ថយការរឹតត្បិតអាជីវកម្ម និងសកម្មភាព អ្នកនាំពាក្យជំនួយការរបស់ (CCSA) លោកស្រី អាភីសាម៉ៃ ស៊្រីរ៉ាងសុន (Apisamai Srirangson) បានសរសើរក្រុមមន្ត្រីនៅក្នុងខេត្តសាមុតសាខន ដែលជាចំណុចកណ្តាលនៃការផ្ទុះជំងឺកូវីដ១៩រលកថ្មី ។ លោកស្រីបន្តថា កិច្ចសហប្រតិបត្តិការយ៉ាងសកម្មដោយវិស័យឯកជន និង ការឆ្លើយតបយ៉ាងល្អប្រហាក់ប្រហែលគ្នាពីសាធារណៈជន ចំពោះកិច្ចខិតខំប្រឹងប្រែងទប់ស្កាត់ជំងឺកូវីដ១៩ របស់រដ្ឋាភិបាល គឺជាលក្ខណៈវិនិច្ឆ័យសំខាន់ពីរផ្សេងទៀត ដែលត្រូវយកមកពិចារណា មុនពេលអនុម័តការបើកប្រទេសឡើងវិញទាំងស្រុង ។
លោកស្រីបានសង្កត់ធ្ងន់ទៀតថា សំណើនេះនឹងត្រូវពិភាក្សានៅឯកិច្ចប្រជុំនៃគណៈកម្មាធិការធំរបស់មជ្ឈមណ្ឌលគ្រប់គ្រងជំងឺកូវីដ១៩ នៅថ្ងៃទី១៩ ខែមីនាខាងមុខ ។ ជាផ្នែកមួយនៃការបើកឡើងវិញ មជ្ឈមណ្ឌល (CCSA) នឹងពិចារណាពង្រឹងខេត្តសាមុតសាខន ពីតំបន់ត្រួតពិនិត្យអតិបរមា ទៅជាតំបន់ដែលមានការប្រុងប្រយ័ត្នខ្ពស់សម្រាប់ជំងឺកូវីដ១៩ ៕ ប្រភព៖ Bangkok Post
