សេតវិមានបញ្ជាក់ថា នឹងបន្តរក្សាទុកវ៉ាក់សាំង Covid-19 របស់ AstraZeneca ដើម្បីចាក់ជូនពលរដ្ឋអាមេរិក ប្រសិនបើមានការយល់ព្រមពីនិយ័តករសុខភាព
អាមេរិក៖ សេតវិមាននឹងបន្តរក្សាទុកវ៉ាក់សាំងបង្ការជំងឺ Covid-19 របស់ក្រុមហ៊ុនផលិតឱសថអង់គ្លេស អាស្ត្រាហ្សេណេកា (AstraZeneca) ដូច្នេះវ៉ាក់សាំងនេះនឹងត្រូវចាក់ឱ្យពលរដ្ឋអាមេរិកបានយ៉ាងឆាប់រហ័ស ប្រសិនបើមានការយល់ព្រមពីនិយ័តករសុខភាព នេះបើតាមការអះអាងរបស់មន្ត្រីរដ្ឋបាលកំពូលម្នាក់អាមេរិក ។
អ្នកសម្របសម្រួលរបស់អង្គភាពឆ្លើយតបនឹងជំងឺកូវីដ១៩របស់សេតវិមាន លោក ជេហ្វហ្វ្រេ ហ្ស៊ីន បាននិយាយក្នុងសន្និសីទកាសែតនៅថ្ងៃសុក្រនេះថា យើងមានស្តុកមួយចំនួនតូចនៃវ៉ាក់សាំងអាស្ត្រាហ្សេណេកា ដូច្នេះប្រសិនបើមានការយល់ព្រម… យើងអាចយកស្តុកនោះទៅចាក់ឱ្យប្រជាជនអាមេរិក ។ ក្រុមហ៊ុនអាស្ត្រាហ្សេណេកា បានផលិតវ៉ាក់សាំងកូវីដ១៩របស់ខ្លួនជាច្រើនលានដូសនៅសហរដ្ឋអាមេរិក ដែលវាមិនទាន់ត្រូវបានអនុម័តនៅឡើយទេ ។
សូមរំលឹកផងដែរថា ក្រុមហ៊ុន អាស្ត្រាហ្សេណេកា កាលពីខែកុម្ភៈបញ្ជាក់ថា ខ្លួនរំពឹងថា វ៉ាក់សាំងរបស់ខ្លួនអាចនឹងទទួលបានការអនុញ្ញាតឱ្យប្រើប្រាស់ក្នុងគ្រាអាសន្ននៅសហរដ្ឋអាមេរិកនាដើមខែមេសាខាងមុខនេះ ហើយអាចចែកចាយចំនួន៣០ លានដូសភ្លាមៗទៅទីតាំងនានានៅជុំវិញសហរដ្ឋអាមេរិក ៕ ប្រភព៖ Reuters
