ទីបំផុតវ៉ាក់សាំង Covid-19 របស់ក្រុមហ៊ុន Johnson & Johnson ទទួលបានការអនុញ្ញាតពីអង្គការ WHO សម្រាប់ការប្រើប្រាស់ក្នុងករណីបន្ទាន់
ស្វីស៖ វ៉ាក់សាំងការពារជំងឺ COVID-19 របស់ក្រុមហ៊ុនអាមេរិក Johnson & Johnson នៅថ្ងៃសុក្រនេះ បានទទួលការអនុម័តពីអង្គការសុខភាពពិភពលោក (WHO) សម្រាប់ការប្រើប្រាស់ក្នុងករណីបន្ទាន់ ។
នេះជាវ៉ាក់សាំងបង្ការជំងឺ Covid-19 តម្រូវអោយចាក់តែ១ដូសដំបូងគេបំផុត ដែលទទួលបានការអនុម័តឲ្យប្រើប្រាស់ក្នុងករណីបន្ទាន់ទៅក្នុងកម្មវិធី COVAX របស់អង្គការ WHO ហើយប្រទេសទាំងអស់នឹងអាចប្រើប្រាស់វ៉ាក់សាំង Johnson & Johnson នៅពេលដំណើរការពាក់ព័ន្ធនានាត្រូវបានរៀបចំរួចរាល់ ។ ទន្ទឹមគ្នា នាយកអង្គការសុខភាពពិភពលោក (WHO) លោក ថេដ្រូស អាដាណម បាននិយាយថា រាល់អាវុធដែលថ្មីប្រកបដោយសុវត្ថិភាព និងប្រសិទ្ធភាពប្រឆាំងនឹង COVID-19 គឺជាការបោះជំហានបន្ថែមទៀត ទៅរកការគ្រប់គ្រងជំងឺរាតត្បាតសកលនេះ និងថា ការចុះបញ្ជីឲ្យប្រើប្រាស់បន្ទាន់ គឺជាពន្លឺភ្លើងសម្រាប់វ៉ាក់សាំងមួយ ដែលត្រូវទទួលបានដាក់ទៅក្នុងកម្មវិធី COVAX ។
នាយកអង្គការសុខភាពពិភពលោករូបនេះបានសង្កត់ធ្ងន់ទៀតថា ក្រុមជំនាញអង្គការ WHO នឹងបើកកិច្ចប្រជុំមួយនៅសប្តាហ៍ក្រោយនេះ ដើម្បីពិភាក្សាអំពីដំបូន្មានដែលនឹងត្រូវផ្តល់សម្រាប់ការដាក់ឲ្យប្រើប្រាស់វ៉ាក់សាំងបង្ការជំងឺ Covid-19 របស់ក្រុមហ៊ុនផលិតឱសថអាមេរិក Johnson & Johnson ៕ ប្រភព៖ Reuters
